ថ្ងៃទី១៦ ខែធ្នូ ឆ្នាំ២០២២នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប និងលោក ពិន ប្រាកដ អភិបាលរងខេត្ត តំណាងឯកឧត្តម ទៀ សីហាអភិបាលខេត្តសៀមរាប បានអញ្ជើញជាអធិបតីក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៣ ឆ្នាំ២០២២ស្ថិតនៅបរិវេណសាលាស្រុកវ៉ារិន ខេត្តសៀមរាប។
គោលបំណង នៃវេទិកានេះ រៀបចំឡើង ដើម្បីផ្ដល់ព័ត៌មានជូនប្រជាពលរដ្ឋពីសមិទ្ធផល ដែលក្រុមប្រឹក្សាខេត្តសម្រេចបានកន្លងមក និងបញ្ហាប្រឈមដែលត្រូវដោះស្រាយបន្ត តាមរយៈការទទួលសំណួរ និងសំណូមពររបស់ប្រជាពលរដ្ឋដែលជាបញ្ហា និងក្ដីកង្វល់ ក៏ដូចជាធ្វើការឆ្លើយតប និងដោះស្រាយជូនម្ចាស់សំណួរ សំណូមពរ ដែលជាការបង្កើនភាពជិតស្និតរវាងប្រជាពលរដ្ឋ និងអាជ្ញាធរ ក្នុងការផ្ដល់សេវាសាធារណៈនានា ជូនពលរដ្ឋក្នុងមូលដ្ឋានឱ្យកាន់តែមានភាពល្អប្រសើរឡើង។
តាមរយៈការលើកជាសំណួរ សំណូមពរក្នុងវេទិកាផ្សព្វផ្សាយ និងពិគ្រោះយោបល់នាពេលនេះ ក្រុមការងារបានទទួល សំណួរផ្ទាល់មាត់ ១២ សំណួរ សំណូមពរ និង សរសេរលាយល័ក្ខអក្សរ ១៤ សំណួរ សំណូមពរ ក្នុងនោះ បានលើកអំពីបញ្ហា អគ្គិសនី ផ្លូវថ្នល់ ការរៀបអាពាហ៍ពិពាហ៍មិនទាន់គ្រប់អាយុ ស្នើសុំមណ្ឌលសុខភាព ការធ្វើអត្តសញ្ញាណបណ្ណសញ្ជាតិខ្មែរ បច្ចេកទេសកសិកម្ម និងករណីសមត្ថកិច្ចចាប់ពិន័យអ្នកបើកបរត្រាក់ទ័រ ពាក់ព័ន្ធលើបណ្ណបើកបរ។ ទន្ទឹមនោះ មន្ទីរ អង្គភាពពាក់ព័ន្ធ នឹងសំណួរសំណូមពររបស់ប្រជាពលរដ្ឋ បានឡើងធ្វើការបំភ្លឺជូនប្រជាពលរដ្ឋ និងអង្គវេទិកាទាំងមូល ពីមូលដ្ឋានច្បាប់ ដំណោះស្រាយ ដើម្បីឱ្យភាគីពាក់ព័ន្ធទាំងអស់យល់កាន់តែច្បាស់។
ព័ត៌មានជាតិ ថ្មីៗ
មានប្រសាសន៍បិទវេទិកានេះ ឯកឧត្តមប្រធានក្រុមប្រឹក្សាខេត្ត បានគូសបញ្ជាក់ថា វេទិកាសាធារណៈនេះ ពិតជាមានសារៈសំខាន់ណាស់ ក្នុងការជួយជំរុញដល់ដល់ការអនុវត្តមុខងាររបស់អ្នកពាក់ព័ន្ធ រួមនឹងអាជ្ញាធរមូលដ្ឋានឲ្យកាន់តែមានប្រសិទ្ធភាពបន្ថែមទៀត ដែលស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។ ក្នុងនោះការពិនិត្យ និងដោះស្រាយបញ្ហា សំណូរ-សំណូមពរបស់ប្រជាពលរដ្ឋ នឹងជួយជំរុញដល់ការអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិត កាត់បន្ថយភាពក្រីក្ររបស់បងប្អូនប្រជាពលរដ្ឋនៅតាមបណ្ដាក្រុង-ស្រុក នៃខេត្តសៀមរាបទាំងមូល។
សូមបញ្ជាក់ថា ជារៀងរាល់ឆ្នាំក្រុមប្រឹក្សាខេត្តសៀមរាប តែងតែរៀបចំបើកវេទិកាផ្សព្វផ្សាយ និងពិគ្រោះយោបល់ទៅតាមគោលដៅទាំង៦ ដែលបានកំណត់ ហើយសម្រាប់ឆ្នាំ២០២២នេះ រួមមាន៖ គោលដៅទី១.ស្រុកក្រឡាញ់ និងស្រុកស្រីស្នំ នៅថ្ងៃទី១៤ ខែធ្នូ ឆ្នាំ២០២២ ក្នុងបរិវេណវត្តប្រាសាទបូទុមមោង ស្រុកស្រីស្នំ ,គោលដៅទី២.ស្រុកអង្គរជុំ និងស្រុកវ៉ារិន នៅថ្ងៃទី១៦ ខែធ្នូ ឆ្នាំ២០២២ ក្នុងបរិវេណសាលាស្រុកវ៉ារិន ,គោលដៅទី៣.ស្រុកបន្ទាយស្រី និងស្រុកអង្គរធំ នៅថ្ងៃទី២០ ខែធ្នូ ឆ្នាំ២០២២ ក្នុងបរិវេណសាលាស្រុកអង្គរធំ ,គោលដៅទី៤.ស្រុកសូទ្រនិគម និងស្រុកប្រាសាទបាគង នៅថ្ងៃទី២២ ខែធ្នូ ឆ្នាំ២០២២ ក្នុងបរិវេណវត្តសុវណ្ណបុប្ផារាម ស្រុកប្រាសាទបាគង ,គោលដៅទី៥.ស្រុកស្វាយលើ និងស្រុកជីក្រែង នៅថ្ងៃទី២៧ ខែធ្នូ ក្នុងបរិវេណវត្តពុទ្ធត្ថេរារាម ស្រុកជីក្រែង និងគោលដៅទី៦.ក្រុងសៀមរាប និងស្រុកពួក នៅថ្ងៃទី២៩ ខែធ្នូ ឆ្នាំ២០២២ ក្នុងបរិវេណសាលាក្រុងសៀមរាប៕
អត្ថបទ និងរូបភាព៖ លោក ស៊ាន សុផាត និងលោក ម៉ី សុខារិទ្ធ
កែសម្រួល៖ លោក សេង ផល្លី
