អគារសិក្សាថ្មីមួយខ្នងមានកម្ពស់ ២ជាន់ ស្មើនឹង ១០បន្ទប់ និងសមិទ្ធផលនានា រួមមានរបងសាលា ក្លោងទ្វារ និងក្រាលការ៉ូឡា ស្ថិតក្នុងសាលាបឋមសិក្សាវត្តដំណាក់ ក្នុងសង្កាត់សាលាកំរើក ក្រុងសៀមរាប ត្រូវបានដាក់សម្ពោធឱ្យប្រើប្រាស់ជាផ្លូវការ នៅថ្ងៃទី១២ ខែធ្នូ ឆ្នាំ២០២២ ក្រោមអធិបតីភាព ឯកឧត្តម អ្នកឧកញ៉ា បណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប ព្រះសង្ឃ និង លោកប្រធានមន្ទីរអប់រំខេត្តសៀមរាប។
មានសង្ឃដីកាក្នុងពិធីនោះ ព្រះគ្រូធម្មវិសុទ្ធិរង្សី ឡាច ចន្ថា ចៅអធិការវត្តដំណាក់ បង្ហាញថា តាំងពីបុរាណមកវត្តអារាម ជាទីកន្លែងផ្ដល់ចំណេះដឹង និងអប់រំមនុស្សឱ្យដើរតាមផ្លូវល្អ លុះក្រោយមកសាលារៀនបានក្លាយជាកន្លែងអប់រំចម្បង សម្រាប់សិស្សានុសិស្សទូទៅ។ ដើម្បីចូលរួមលើកតម្កើងវិស័យអប់រំក្នុងប្រទេស វត្តដំណាក់ ក្រៅពីបានផ្ដល់តាំង និង សាងសង់អគារសិក្សាសម្រាប់សាលាបឋមសិក្សាវត្តដំណាក់ផងដែរ។ ជាក់ស្ដែង ការសាងសង់អគារសិក្សា និងសមិទ្ធផលនានាក្នុងសាលានាពេលនេះ បានប្រើប្រាស់បច្ច័យក្នុងវត្ត និងសទ្ធាជ្រះថ្លារបស់សប្បុរសជនជិតឆ្ងាយ សរុបទាំងអស់ចំនួន២៥៨,០៥០ដុល្លារ។ ដោយឡែកក្រៅពីសាលាបឋមសិក្សានេះ វត្តក៏បានបើកដំណើរការសាលាពុទ្ធិកបឋមសិក្សា ឬហៅថាសាលាបាលី តាំងពីទសវត្សឆ្នាំ៩០មកម្លេះ។
ព័ត៌មានជាតិ ថ្មីៗ
លោក លី ប៊ុនណា ប្រធានមន្ទីរអប់រំយុវជន និងកីឡាខេត្តសៀមរាប បានឱ្យដឹងថា ក្រោមការអភិវឌ្ឍឥតឈប់ឈរលើគ្រប់វិស័យ វិស័យអប់រំជាតិក៏មានការរីកចម្រើនយ៉ាងឆាប់រហ័សផងដែរ ទន្ទឹមនោះ សាលារៀនជាច្រើន ត្រូវបានសាងសង់ស្ទើគ្រប់ភូមិទាំងអស់នៅទូទាំងប្រទេស។ ជាមួយនោះ វត្តអារាមមិនត្រឹមតែជាកន្លែងផ្ដល់ឱវាទក្នុងវិស័យសាសនាប៉ុណ្ណោះទេ ប៉ុន្តែវត្តអារាម ក៏ជាកន្លែងប្រមូលផ្ដុំ និងជំរុញសិស្សានុសិស្សឱ្យមកសាលាផងដែរ។ សម្រាប់ខេត្តសៀមរាប សាលារៀនចំនួន ៥០កន្លែង បានសាងសង់នៅក្នុងបរិវេណវត្ត និងទទួលបានការឧបត្ថម្ភគាំទ្រពីវត្ត។ ជាក់ស្តែងដូចជា សាលាបឋមសិក្សាវត្តដំណាក់នេះជាដើម។
ក្នុងឱកាសនោះដែរ ឯកឧត្តម អ្នកឧកញ៉ា សៀង ណាំ បានបំពាក់គ្រឿងឥស្សរិយស្ស ដល់ព្រះថេរានុត្ថេរ និងសប្បុរសជន ដែលមានស្នាដៃចូលរួមសាងសង់អគារ ព្រមទាំងបានប្រគេនថវិកាចំនួន១ម៉ឺនដុល្លារអាមេរិក ឧបត្ថម្ភដល់ការសាងសង់អគារសិក្សា ព្រមទាំងជូនតាជីដូនជី ៣៥នាក់ម្នាក់ៗក្រណាត់ស១ដុំ ថវិកា២ម៉ឹនរៀល ប្រជាពលរដ្ឋ១៨៥នាក់ម្នាក់ៗសារុង១ ជូនលោកគ្រូអ្នកគ្រូនិងគរុសិស្ស១៤២នាក់ម្នាក់ៗទទួលបាន ៥ម៉ឺនរៀល សិស្សានុសិស្ស១៥០នាក់ ម្នាក់ៗទទួលបានសៀវភៅ៤ក្បាល ប៊ិក២ដើម និងថវិកា៥ពាន់រៀល។
សូមជម្រាបថា៖ បច្ចុប្បន្នក្នុងខេត្តសៀមរាប មានគ្រឺះស្ថានមត្តេយ្យសិក្សាដាច់ដោយឡែកប្រមាណជា២០ទីតាំង មានថ្នាក់មត្តេយ្យសិក្សានៅក្នុងបឋមសិក្សា៤៣៦កន្លែង ផ្តល់សេវាអប់រំដល់កុមារជាង៤ម៉ឺននាក់ គ្រឺះស្ថានបឋមសិក្សាមាន៥២២កន្លែង កំពុងផ្តល់សេវាអប់រំដល់សិស្សានុសិស្សជាង១៦ម៉ឺននាក់ គ្រឺះស្ថានមធ្យមសិក្សាមាន អនុវិទ្យាល័យ៨០ទីតាំង មានសិស្សានុសិស្សជាង៥ម៉ឺននាក់ វិទ្យាល័យមានចំនួន៤៤ មានសិស្សានុសិស្សជាង៣ម៉ឺននាក់៕
អត្ថបទ និងរូបភាព៖ លោក យូ វង្ស និងលោក ស៊ាន សុផាត
កែសម្រួល៖ លោក អ៊ុន ណារាជ្យ
