ចាប់ពីថ្ងៃទី១៣ ខែធ្នូស្អែកនេះ វិទ្យាស្ថានបារាំងចុងបូព៌ាប្រចាំសាខាខេត្តសៀមរាប នឹងធ្វើការតាំងបង្ហាញរូបថតចាស់ៗ ដែលមានអាយុកាលប្រមាណជាង៥០ ដែលសាធារណជនកម្របានឃើញ និងពាក់ព័ន្ធទៅនឹង ប្រាសាទបុរាណ ជីវភាពរស់នៅប្រជាជន និងទិដ្ឋភាពមួយចំនួនរបស់ខេត្តសៀមរាប។
លោកបណ្ឌិត Brice Vincent ប្រធានវិទ្យាស្ថានបារាំងចុងបូព៌ាប្រចាំសាខាខេត្តសៀមរាប បានឱ្យដឹងថា ពិពរណ៍រូបថត ក្រោមប្រធានបទ “អង្គររស់រវើក” នេះ រៀបចំឡើងដើម្បីអបអរសាទរខួប៣០ឆ្នាំ នៃការបើកអោយដំណើរការឡើងវិញនៃវិទ្យាស្ថានបារាំងចុងបូព៌ា។ គោលបំណងនេះការតាំងពរណ៍រូបថតនេះដែរ គឺដើម្បីឱ្យសាធារណជនជាពិសេសប្រជាជនក្នុងខេត្តសៀមរាបខ្លួនឯង បានឃើញនិងស្វែងយល់ពីទីក្រុងសៀមរាប ពីអំឡុងទសវត្សទី៦០តើមានភាពខុសប្លែកគ្នាយ៉ាងណាពីសម័យបច្ចុប្បន្ន។
លោកបណ្ឌិត បន្ថែមថា សម្រាប់ការតាំងពិពរណ៍រូបថតនេះ មានរយៈពេល ១ខែ ដោយឡែកការបង្ហាញពីជំនាញដុតកុលាលភាជន៍ និងឡ ព្រមទាំងជំនាញស្លដែកសម័យបុរាណ នឹងបញ្ចប់នៅរសៀលថ្ងៃទី១៣ ខែធ្នូស្អែកនេះ។
លោកបណ្ឌិត បានអំពាវនាវដល់សាធារណជនទាំងអស់ ចូលទស្សនាការតាំងពិពរណ៍រូបថត និងសកម្មភាពផ្សេងជាច្រើនទៀតនៃព្រឹត្តិការណ៍នេះ ជាពិសេសអ្នកស្រាវជ្រាវ សិស្សនិស្សិត ដើម្បីយល់ដឹងកាន់តែច្បាស់ពីអត្តសញ្ញាណរបស់ប្រជាជនខ្មែរ ក៏ដូចជាទំនៀមទម្លាប់ប្រពៃណីរបស់បុព្វបុរសខ្មែរ ដែលបានរក្សាទុកនូវកេរដំណែលដ៏ល្អសម្រាប់កូនចៅជំនាន់ក្រោយ។
អត្ថបទ និងរូបថត៖ លោក បូ សាវី
កែសម្រួល៖ លោក សេង ផល្លី
