រយ:ពេលពីរថ្ងៃនៃសប្តាហ៍នេះ (09 -10,12,2022) អង្គការកសាងអនាគតរបស់អ្នកថ្ងៃនេះ សហការជាមួយអាជ្ញាធរមូលដ្ឋាន និងគណ:គ្រប់គ្រងសាលា បានដឹកនាំសិស្សានុសិស្ស និងប្រជាពលរដ្ឋក្នុងមូលដ្ឋានរៀបចំកម្មវិធីទទួលគណ:ប្រតិភូសមាគមតោអន្តរជាតិនៃប្រទេសសឹង្ហបុរីចំនួន ៥៤នាក់ ដើម្បីធ្វើសកម្មភាពមនុស្សធម៌ ជាមួយសិស្សនុសិស្ស លោកគ្រូអ្នកគ្រូ និងបងប្អូនប្រជាពលរដ្ឋនៅទីជនបទដូចជា នៅអនុវិទ្យាល័យ ភ្នំដងរែក ស្ថិតក្នុងឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។ សមាគមនេះបាននាំយកកង់ចំនួន ៨៤គ្រឿង ចែកដល់សិក្សានុសិស្សសរុបចំនួន ៨៤នាក់ មកពី ៤សាលា ផ្តល់សម្ភារសិក្សា ស្បែកជើង សំលៀកបំពាក់ ដល់សិស្សសរុបចំនួន ២៥០នាក់ ផ្តល់សំលៀកបំពាក់ជូនខោអាវដល់មាតាបិតាអាណាព្យាបាលសិស្ស និងបានរៀបចំអាហារថ្ងៃត្រង់សាមគ្គី ជូនដល់ពួកគាត់ សរុបប្រមាណជាង ១ពាន់នាក់ មកពី ៤ភូមិ ជុំវិញសាលាភ្នំដងរ៉ែក។ ជាមួយនឹង ក៏បានខួងអណ្ដូងស្នប់ខ្នាតធំជូនសហគមន៍ប្រើប្រាស់ ចំនួន ៦អណ្តូងផងដែរ រួមមាន÷ ១កន្លែងនៅភូមិប្រាសាទត្បែង និង៥អណ្តូងទៀត នៅភូមិ ក្រាលក្របី និងភូមិព្រៃសង្ហារ នៃឃុំបន្ទាយឆ្មាស្រុកថ្មពួកខេត្តបន្ទាយមានជ័យ។ ដែលជាគោលដៅថ្មីលើកដំបូងរបស់សមាគមតោអន្តរជាតិ នៃប្រទេសសឹង្ហបុរី។ ដោយឡែក នៅថ្ងៃបន្ទាប់ សមាគមនេះ បានចុះទៅកាន់សាលាបឋមសិក្សាព្រៃរងៀង ស្ថិតក្នុងភូមិព្រៃរងៀង ឃុំកន្ទួត ស្រុកស្វាយលើ ខេត្តសៀមរាប ដែលជាគោលដៅធ្លាប់បានធ្វើសកម្មភាពកាលពីឆ្នាំ២០១៩កន្លងមក ដោយបាននាំយក សម្ភារសិក្សា, សំលៀកបំពាក់, ឧបករណ៍ក្មេងលេង ចែកដល់សិស្សជាង ២០០នាក់, ផ្តល់គ្រឿងឧបភោគបរិភោគដល់គ្រួសារ ខ្វះខាតក្នុងជីវភាពប្រចាំថ្ងៃសរុបចំនួន ៣០០គ្រួសារ មកពីភូមិ ចំនួន៣ រួមមាន ព្រៃល្ងៀង, ផ្ជិកជ្រុំ និងភូមិរុងរឿងនៃឃុំកន្ទួត ដោយក្នុង១គ្រួសារៗទទួលបាន អង្ករ ៣០គ.ក្រ, ស្ករស ៣គ.ក្រ, ម្សៅមី ៣គ.ក្រ, ខ្ទឹម ៣គ.ក្រ, ប្រេងឆារ ២លីត្រ, ត្រីខ ១យួរ, មី ១កេស,
ទឹកស៊ីអុីវ ១យួរ និងអំបិល ៣គ.ក្រ។ បាន ផ្ដល់ណ្ដូងខ្នាតធំ សរុបចំនួន ១៥អណ្តូង ក្នុងនោះ ៧អណ្តូង នៅភូមិព្រៃល្លៀង ៥អណ្តូង នៅភូមិផ្ចឹកជ្រុំ និង ៣ទៀតនៅភូមិរុងរឿង។ ចំណាយថវិកាអស់ប្រមាណជាង ៧ម៉ឺនដុល្លារអាមេរិក សរុបទាំងពីរគោលដៅគឺអនុវិទ្យាល័យភ្នំដងរ៉ែក និងសាលាបឋមសិក្សាព្រៃរងៀង ។
លោក ឡុង សេដ្ឋា នាយកអង្គការកសាងអនាគតរបស់អ្នកថ្ងៃនេះថា៖ កម្មវិធីចែកសម្ភារសិក្សា និងគ្រឿងបរិភោគនាពេលនេះគឺជាចំណែកមួយចូលរួមកាត់បន្ថយភាពខ្វះខាតដល់ប្រជាពលរដ្ឋក្នុងសហគមន៍ទាំងអស់ខាងលើ។កន្លងមកដោយបានការជួយសហការពីអាជ្ញាធរមូលដ្ឋាន និងលោកគ្រូ អ្នកគ្រូ ក្នុងសហគមន៍ព្រមទាំងបានការជួយឧបត្ថម្ភជាបន្តបន្ទាប់ពីសមាគមតោអន្តរជាតិ និងបណ្តាប្រទេសមួយចំនួនផង អង្គការនេះ បានសម្រេចលទ្ធផលជាច្រើននឹងកំពុងបន្តដំណើរការលើគម្រោងផ្សេងៗទៀតទៅតាមគោលដៅក្នុងខេត្ត។សម្ភារ:អំណោយដែលសមាគមតោអន្តរជាតិនៃប្រទេសសឹង្ហបុរីនាំយកមកផ្តល់ជូននេះ សុទ្ធតែជាអំណោយសប្បុរសធម៌បានមកពីការកៀងគរ ពីសប្បុរសជនជាសមាជិក សមាជិកាក្នុងសមាគម។
សូមជម្រាបថា ក្នុងមួយឆ្នាំ សមាគមតោអន្តរជាតិ បានមកបំពេញបេសកកម្មមនុស្សធម៌យ៉ាងតិចមួយដងដែរ តែដោយសារវិបត្តិជំងឺកូវីដ-១៩ សមាគមត្រូវបានអាក់ខានអស់រយ:ពេល ២ឆ្នាំ ក្នុងការមកកាន់គោលដៅ នៅប្រទេសកម្ពុជា។
តំណាងប្រជាពលរដ្ឋ លោកគ្រូអ្នកគ្រូ និងអាជ្ញាធរមូលដ្ឋាន បានសម្តែងក្តីត្រេកអរ សាទរចំពោះសកម្មភាពសប្បុរសធម៌នេះ។ លោកគ្រូអ្នកគ្រូ និងអាជ្ញាធរមូលដ្ឋាន បានសំណូមពរដល់មាតាបិតាសិស្សជួយជម្រុញកូនចៅឱ្យចូលរៀនបានចប់ចុងចប់ដើម ព្រោះតាមការលើកឡើងរបស់លោកគ្រូ អ្នកគ្រូ បានសម្តែងការព្រួយបារម្ភសិស្សបោះបង់ការសិក្សានៅទីជនបទ ដោយសារតែជីវភាពគ្រួសារ និងភូមិខ្លះសាលានៅឆ្ងាយពិបាកក្នុងការធ្វើដំណើរជាដើមផង។
លោក MICHAEL wong និងលោក Alvin Goh ប្រធានដឹកនាំប្រតិភូសមាគមតោអន្តរជាតិសឹង្ហបុរី បានបង្ហាញនូវភាពស្និទ្ឋស្នាលសោមនស្សរីករាយ និងបានចាត់ទុកការងារមនុស្សធម៌មកកាន់ខេត្តសៀមរាប ថាជាបេសកកម្មមួយដ៏មានសារសំខាន់ និងតម្លៃដ៏ឧត្តុង្គឧត្តមសម្រាប់ចែករំលែកជួយដល់មនុស្សជាតិផងគ្នា ទៅតាមលទ្ធភាពរបស់សមាគមអាចធ្វើបាន។ នេះជាលើកទី៨ហើយ ថ្វីត្បិតតែយូរៗបានមកកាន់ទីនេះម្តង ប៉ុន្តែក្រុមយើងនឹងមកជារៀងរាល់ឆ្នាំ ដើម្បីផ្តល់ជូនស្បៀងអាហារ, សម្ភារសិក្សា, សំលៀកបំពាក់, អណ្តូងទឹក ឬអគារសិក្សាទៅតាមលទ្ធភាព ដែល សមាគមមាន តាមរយ:ការសហការចង្អុលបបង្ហាញ និងសម្របសម្រួលរបស់អង្គការកសាងអនាគតរបស់អ្នកថ្ងៃនេះនិងអាជ្ញាធរមូលដ្ឋាន៕
អត្ថបទ និងរូបភាព: លោកយូ វង្ស
កែសម្រួលដោយ លីវ សុខុន!!!
