បច្ចុប្បន្ននេះប្រទេសកម្ពុជាកំពុងតែមានអភិវឌ្ឍលើគ្រប់វិស័យធ្វើកំណើនយានយន្តជាមានការកើនឡើងជាច្រើន នឹងមមាញឹកក្នុងការធ្វើចរាចរណ៍នៅលើដងផ្លូវ ទាមទារឱ្យកងកម្លាំងត្រូវតែពង្រឹងសមត្ថភាពបន្ថែម លើការការពារសុវត្ថិភាព និងអាយុជីវិតប្រជាពលរដ្ឋនៅលើដងផ្លូវ ជាពិសេសពេលជួបបញ្ហាប្រឈមដោយគ្រោះថ្នាក់ចរាចរណ៍។ ជាមួយគ្នានោះការសង្គ្រោះបឋម គឺជាកត្តាដ៏សំខាន់ក្នុងចូលរួមកាត់បន្ថយអត្រាជនពិការ និងអត្រាស្លាប់ដោយគ្រោះថ្នាក់ផ្សេងៗ ជាពិសេសគ្រោះថ្នាក់ចរាចរណ៍ផងដែរ។
នេះបើតាមប្រសាសន៍លោកឧត្តមសេនីយ៍ត្រី ជិម សុវណ្ណ ស្នងការរងនគរបាលខេត្តសៀមរាប ក្នុងឱកាសបិទវគ្គបណ្តុះបណ្តាលរបៀបសង្គ្រោះបឋមបន្ទាន់ជូនដល់មន្ត្រីនគរបាលចរាចរណ៍ មន្ត្រីកងរាជអាវុធហត្ថ ព្រមទាំងមន្រ្តីបច្ចេកទេសទទួលបន្ទុកសុវត្ថិភាពចរាចរណ៍ផ្លូវគោក ដែលជាគ្រូបង្គោលមកពីខេត្តបាត់ដំបង រាជធានីភ្នំពេញ និងខេត្តសៀមរាប នៅព្រឹកថ្ងៃ០២ ខែធ្នូឆ្នាំ២០២២នេះ។
លោក ប្រូសហ៍ ហែន ជាស្ថាបនិកនៃអង្គការនៃក្តីស្រឡាញ់ បានបញ្ជាក់ថា វគ្គបណ្តុះបណ្តាលរបៀបសង្គ្រោះបឋមបន្ទាន់ដល់សមត្ថកិច្ច និងមន្រ្តីពាក់ព័ន្ធ ដែលមានរយៈ ៥ថ្ងៃមកនេះ ជាលទ្ធផលនៃការសិក្សាការសង្គ្រោះបឋម គឺជាវិធីសាស្រ្តដ៏សំខាន់ នឹងបានរួមចំណែកដ៏ធំមួយជួយធ្វើឱ្យជនរងគ្រោះរួចផុតពីការពិការភាព និងការស្លាប់ មុននឹងរថយន្តមន្ទីរពេទ្យមកដល់។ ដូចនេះសមត្ថកិច្ចដែលឈរជើងនៅតាមគោលដៅនានា គួរតែចេះវិធីសាស្រ្តសង្គ្រោះបឋមឱ្យបានគ្រប់គ្នា ដើម្បីជួយដល់ជនរងគ្រោះឱ្យបានទាន់ពេលវេលា នៅពេលមានគ្រោះថ្នាក់ណាមួយកើតឡើង។
លោកឧត្តមសេនីយ៍ត្រី ជិម សុវណ្ណ បានបញ្ជាក់ថា នៅក្នុងវគ្គបណ្តុះបណ្តាលនេះ អ្នកជំនាញបានបង្ហាត់បង្រៀនអំពីរបៀបជួយជនរងគ្រោះ ដែលស្ទះដង្ហើម តាមរយ:ការក្អួត ស្រវឹង គ្រោះថ្នាក់ចរាចរណ៍ ជួយសង្គ្រោះជនរងគ្រោះ បាក់ឆ្អឹងជំនីមុតដល់សួត ផ្តល់បច្ចេកទេសជំនាញសង្រ្គោះ របៀបរុំរហូតបញ្ជូនជនរងគ្រោះទៅមន្ទីរពេទ្យ វិធីរុំរបួសមុតដោយសម្ភារ: លើភ្នែក ដើម្បីងាយស្រួលដល់ការបញ្ជូនជនរងគ្រោះទៅមន្ទីរពេទ្យ ចំណុចការហូរឈាមបាក់ភ្លៅ ដែលជាចំណុចជនរងគ្រោះស្លាប់បាន របៀបអបឆ្អឹងដើម្បីបញ្ជូនទៅមន្ទីរពេទ្យឱ្យទាន់ពេលវេលា ដើម្បីជៀសផុតពីពិការភាព។ ជំនាញសែងជនរងគ្រោះ ក្នុងស្ថានភាពលំបាក ដែលមិនចាំបាច់សម្ភារ:ទ្រទ្រង់ និងទទួលបានជំនាញវាស់សម្ពាតឈាម និងខ្យល់ដង្ហើមសួត សម្រាប់សង្គ្រោះជនរងគ្រោះនៅពេលដែលមានភាពចាំបាច់ របៀបរុំក្បាលដែលមានឈាមហូរខ្លាំង ជាពិសេសគឺបានផ្តល់ជំនាញការទប់ស្កាត់ការហូរឈាមដោយខ្លួនឯង នៅពេលជនល្មើសបាញ់ត្រូវ។
ជាមួយគ្នានោះដែរ លោក រ៉ន ផាវវ័រ នាយកសកលអង្គការមូនិធិអន្តរជាតិ ដើម្បីសុវត្ថិភាព និងជាគ្រូជំនាញអន្តរជាតិ បានសម្ដែងភាពរីករាយដែលបានផ្តល់ចំណេះដឹងពីរបៀបសង្គ្រោះបឋមដល់មន្ត្រីនគរបាលចរាចរណ៍ មន្ត្រីកងរាជអាវុធហត្ថ ព្រមទាំងមន្រ្តីបច្ចេកទេសទទួលបន្ទុកសុវត្ថិភាពចរាចរណ៍ផ្លូវគោក។ លោករំពឹងថា ចំណេះដឹងទាំងនេះ នឹងរួមចំណែកកាត់បន្ថយអត្រាជនពិការភាព និងអត្រាស្លាប់ដោយគ្រោះថ្នាក់ផ្សេងៗ ជាពិសេសគ្រោះថ្នាក់ចរាចរណ៍នៅកម្ពុជា៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
