ក្រសួងពាណិជ្ជកម្ម នៅថ្ងៃទី០២ ខែធ្នូ ឆ្នាំ២០២២នេះ បានបើកកិច្ចប្រជុំផ្សព្សផ្សាយបើកការិយាល័យចុះឈ្មោះបោះឆ្នោតជ្រើសរើសសមាជិកជ្រើសតាំងសភាពាណិជ្ជកម្មខេត្តសៀមរាប-ឧត្តរមានជ័យ អាណត្តិទី៣ លើកទី១ ក្រោមអធិបតីភាព ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម លោក នាក់ ណេរ៉ុន អភិបាលរងខេត្តសៀមរាប រួមនឹងប្រតិភូអមដំណើរ តំណាងមន្ទីរ ប្រធាន-អនុប្រធាន សមាជិកសមាជិកាសភាពាណិជ្ជកម្មមណ្ឌលសៀមរាប-ឧត្តរមានជ័យ និងអាជីវករ ពាណិជ្ជករជាច្រើនរូប។
លើកឡើងក្នុងឱកាសនោះ ឧកញ៉ាបណ្ឌិត ហ៊ុយ ភាវ ប្រធានសភាពាណិជ្ជកម្មមណ្ឌលសៀមរាប-ឧត្តរមានជ័យ បង្ហាញថា សភាពាណិជ្ជកម្មកម្ពុជា នឹងរៀបចំការបោះឆ្នោតជ្រើសរើសសមាជិក សមាជិកា សម្រាប់បំពេញការងារការិយាល័យប្រតិបត្តិអាណត្តិថ្មី សភាពាណិជ្ជកម្មមណ្ឌលសៀមរាប-ឧត្តរមានជ័យ នៅថ្ងៃទី២២ ខែមករា ឆ្នាំ២០២៣។ ការបោះឆ្នោតអាណត្តិថ្មីនេះ សភាពាណិជ្ជកម្មកម្ពុជា ត្រូវបោះឆ្នោតជ្រើសរើសសមាជិក សមាជិកា ចំនួន១០រូប បង្រ្គប់កូរ៉ុម ដើម្បីបោះឆ្នោតជ្រើសរើសប្រធាន អនុប្រធាន ហិរញ្ញិក លេខាធិការ សម្រាប់បំពេញការជាប្រចំាថ្ងៃជាមួយស្ថាប័នអង្គភាពផ្សេងៗ។ ក្នុងនោះសមាជិក សមាជិកាទាំងអស់ ដែលចង់ឈរឈ្មោះជាសមាជិក សមាជិកាជ្រើសតំាង ត្រូវមកដាក់ពាក្យឈរឈ្មោះឲ្យបានមុនថ្ងៃទី២៨ ខែធ្នូនេះ។
លោក នាក់ ណេរ៉ុន បានបង្ហាញថា ជាមួយសក្ដានុពលនៃវិស័យទេសចរណ៍ រួមនឹងវិស័យផ្សេងៗជាច្រើនទៀត បានជំរុញដល់សេដ្ឋកិច្ចខេត្តមានការរីកចម្រើនជាបន្តបន្ទាប់។ ក្រោយការបើកសេដ្ឋកិច្ចពេញលេញឡើងវិញ បន្ទាប់ពីវិបត្តិជំងឺកូវីដ១៩បានធូរស្រាល សមិទ្ធផលផ្លូវ ៣៨ខ្សែ ក៏ជាចំណុចខ្លាំងសម្រាប់របស់ខេត្តផងដែរ។ សម្រាប់ថ្ងៃអនាគត គម្រោងផ្លូវតភ្ជាប់ផ្លូវពីខេត្តសៀមរាប ទៅកាន់បណ្ដាខេត្តផ្សេងៗ ក៏នឹងត្រូវបានរាជរដ្ឋាភិបាលយកចិត្តទុកដាក់ជាបន្តបន្ទាប់ ជាក់ស្ដែងផ្លូវពីខេត្តសៀមរាប ទៅកាន់ខេត្តបាត់ដំបង នឹងក្លាយជាសមិទ្ធផលដ៏លេចធ្លោបន្ថែមទៀត ក្នុងវិស័យដឹកជញ្ជូនក្នុងប្រទេស។
ឯកឧត្តម ម៉ៅ ថូរ៉ា មានប្រសាសន៍ថា សភាពាណិជ្ជកម្មពុំមានគោលនយោបាយផ្ទាល់ខ្លួននោះទេ គឺត្រូវអនុវត្តទៅតាមគោលនយោបាយរបស់រាជរដ្ឋាភិបាល ដែលបានកំណត់។ ក្នុងនោះក្រសួងមហាផ្ទៃកាលពីពេលថ្មីៗនេះ ក៏បានចេញនូវលិខិតមួយណែនាំដល់អាជ្ញាធរខេត្ត សហការជាមួយសភាពាណិជ្ជកម្ម ដើម្បីដោះស្រាយបញ្ហាផ្សេងៗ ដែលកើតមានឡើងក្នុងខេត្តរបស់ខ្លួន។ សព្វថ្ងៃនេះនៅតាមបណ្ដាខេត្តមួយចំនួន មានបញ្ហាចម្បងមួយ គឺការតាំងពិពរណ៌ ជាពិសេសសំណើសុំតាំងពិពរណ៌របស់ប្រទេសជិតខាង នៅលើទឹកដីប្រទេសកម្ពុជា ហើយភាគច្រើនផលិតផលរបស់ប្រទេសជិតខាងនោះ មានច្រើនជាងផលិតផលក្នុងស្រុក ដូចនេះសភាពាណិជ្ជកម្ម គួរតែធ្វើការសហការជាមួយប្រទេសជិតខាងរៀបចំជាពិពរណ៌ ដោយនាំយកផលិតផលរបស់យើង ទៅតាំងបង្ហាញនៅក្នុងប្រទេសជិតខាងវិញ។
ឯកឧត្តមរដ្ឋលេខាធិការ បានថ្លែងការកោតសរសើរ និងវាយតម្លៃខ្ពស់ ចំពោះខេត្តសៀមរាប ដែលមានសមាជិកសភាពាណិជ្ជកម្មក្នុងខេត្តច្រើនគួរឲ្យកត់សម្គាល់ ដើម្បីពង្រឹងសភាពាណិជ្ជកម្មឲ្យកាន់តែរឹងមាំ។ ជាមួយគ្នានោះដើម្បីទទួលបានលទ្ធផលជាវិជ្ជមាន ក្នុងកិច្ចប្រជុំបើកការិយាល័យចុះឈ្មោះបោះឆ្នោតនាពេលនេះដែរ ឯកឧត្តម ក៏សូមសំណូមពរដល់អ្នកចូលរួមទាំងអស់ ធ្វើការសាកសួរឲ្យបានផុលផុស សម្រាប់ជាប្រយោជន៍ដល់ការរីកចំរើនក្នុងសកម្មភាពធុរកិច្ចរបស់ខ្លួន៕
អត្ថបទ និងរូបភាព៖ លោក អ៊ុន ណារាជ្យ
កែសម្រួល៖ លោក សេង ផល្លី
