នៅព្រឹកថ្ងៃទី២ ខែធ្នូ ឆ្នាំ២០២២ នៅក្រុងសៀមរាប មានរៀបចំពិធីអបអរសាទរខួបអនុស្សាវរីយ៍លើកទី៤៤ ទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា (០២ ធ្នូ ១៩៧៨ – ០២ ធ្នូ ២០២២) ដែលមានឈ្មោះដើមថា “រណសិរ្សសាមគ្គី សង្រ្គោះជាតិកម្ពុជា” ក្នុងគោលបំណងរំលឹកពីការធ្វើដំណើរដ៏វែងឆ្ងាយ ឆ្លងកាត់ឧបសគ្គជាច្រើន ដោយមានសម្តេចអគ្គមហាពញាចក្រី ហេង សំរិន សម្តេចអគ្គមហាធម្មពោធិសាល ជា ស៊ីម សម្តេចអគ្គមហាសេនាបតីតេជោ ហ៊ុន សែន ព្រមទាំង ឥស្សរជន និងកម្លាំងអ្នកស្នេហាជាតិមកពីគ្រប់ទិសទីទាំងក្នុង និងក្រៅប្រទេស រួបរួមគ្នាក្រោកឈរធ្វើចលនាតស៊ូក្នុងគោលដៅរំដោះជាតិ មាតុភូមិ និងប្រជាជនកម្ពុជា ឱ្យរួចផុតពីការកាប់សម្លាប់ និងរំដោះប្រទេសជាតិចេញពីរបបប្រល័យពូជសាសន៍ ប៉ុល ពត។
ក្នុងឱកាសនោះ មានការអញ្ជើញជាអធិបតី ឯកឧត្ដមអ្នកឧកញ៉ា សៀង ណាំ តំណាងរាស្ដ្រ និងជាអនុប្រធានគណៈកម្មាធិការរណសិរ្យសាមគ្គីអភិវឌ្ឍន៍មាតុភូមិកម្ពុជា ខេត្ដសៀមរាប និងឯកឧត្តម អ៊ាន ឃុន ប្រធានក្រុមប្រឹក្សាខេត្ត និង ជាអនុប្រធានគណៈកម្មាធិការរណសិរ្សសាមគ្គី អភិវឌ្ឍន៍មាតុភូមិកម្ពុជា ខេត្តសៀមរាប ព្រមទាំងមានអ្នកចូលរួមមកពី ស្ថាប័នជាតិ មន្ទីរ អង្គភាព អង្គការ សមាគម និងប្រជាពលរដ្ឋជុំវិញខេត្ត សរុបប្រមាណ ៣ពាន់នាក់។
ឯកឧត្ដមអ្នកឧកញ៉ា សៀង ណាំ បញ្ជាក់ថា រណសិរ្ស ២ធ្នូ មិនត្រឹមតែសង្គ្រោះយើងទាំងអស់គ្នាឲ្យចាកផុតពីគ្រោះមហន្តរាយនៃរបបប្រល័យពូជសាសន៍ប៉ុណ្ណោះទេ ប៉ុន្តែរណសិរ្ស ២ធ្នូ ក៏បានរួមចំណែកយ៉ាងធំធេងជាមួយរាជរដ្ឋាភិបាល និងគណបក្សប្រជាជនកម្ពុជាក្នុងការស្តារ កសាង និងអភិវឌ្ឍន៍សង្គមជាតិនៅគ្រប់ដំណាក់កាល ធ្វើឲ្យមាតុភូមិកម្ពុជា ប្រែមុខមាត់ថ្មីជាបន្តបន្ទាប់ ។
ព័ត៌មានជាតិ ថ្មីៗ
ឯកឧត្ដម ក៏ដូចជាប្រជាពលរដ្ឋ មន្ដ្រីរាជការ កងកម្លាំងប្រដាប់អាវុធ ពិតជាមានមោទនភាពក្រៃលែង ចំពោះជោគជ័យទាំងឡាយដែលយើងសម្រេចបាន បន្ទាប់ពីថ្ងៃប្រវត្តិសាស្ត្រ២ធ្នូ ដែលបានរួមចំណែកអភិវឌ្ឍន៍ប្រទេសជាតិ និងលើកកម្ពស់ជីវភាពរស់នៅរបស់ជនរួមជាតិនៅទូទាំងប្រទេស និងបន្ទាប់ពីជោគជ័យដ៏ធំធេងដែលគណបក្សប្រជាជនកម្ពុជា ទទួលបានពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ កាលពីពេលកន្លងទៅ ។ ជាងនេះទៅទៀត យើងទាំងអស់គ្នាក៏បាននឹងកំពុងត្រៀមខ្លួនចូលរួមក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧ ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។ ឈរលើមូលដ្ឋាន នៃសុខសន្តិភាព និងស្ថិរភាពនយោបាយ ក្រោមការដឹកនាំរបស់គណបក្ស ប្រជាជនកម្ពុជា និងរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ ដឹកនាំដ៏ឈ្លាសវៃ និងមានចក្ខុវិស័យវែងឆ្ងាយគ្រប់ជ្រុងជ្រោយ កម្ពុជាបានដាក់ចេញនូវគោលដៅអភិវឌ្ឍ ដើម្បីក្លាយជាប្រទេស មានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់ នៅឆ្នាំ២០៥០។
គួរបញ្ជាក់ថា ក្រៅពីក្រុងសៀមរាប ពិធីអបអរសាទរខួបអនុស្សាវរីយ៍លើកទី៤៤ ទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា ក៏ត្រូវបានរៀបចំយ៉ាងអធិកអធមក្នុងថ្ងៃដដែល នៅតាមបណ្ដាស្រុកទាំង១១ផ្សេង នៃខេត្តសៀមរាប។ ក្នុងនោះ គេឃើញមាន ការចូលរួមពីមន្ត្រីជាន់ខ្ពស់ក្នុងជួររាជរដ្ឋាភិបាល អាជ្ញាធរស្រុកគ្រប់លំដាប់ថ្នាក់ និងប្រជាជាពលរដ្ឋក្នុងមូលដ្ឋានផងដែរ។
អត្ថបទ និងរូបភាព៖ លោក បូ សាវី លោក ស៊ាន សុផាត និងលោក ម៉ី សុខារិទ្ធ
កែសម្រួល៖ លោក សេង ផល្លី
