នៅពេលមានគ្រោះថ្នាក់អ្វីមួយកើតឡើងសមត្ថកិច្ចតែងតែបានទៅដល់គោលដៅមុនក្រុមគ្រូពេទ្យ ជាពិសេសពាក់ព័ន្ធគ្រោះថ្នាក់ចរាចរណ៍ ដូចនេះបើសមត្ថកិច្ចទាំងអស់ចេះពីរបៀបសង្គ្រោះបឋម គេអាចនឹងជួយជនគ្រោះបានទាន់ពេលវេលា ធ្វើឱ្យជនគ្រោះរួចផុតពីការស្លាប់បាន។ នេះបើតាមលោក ជឹម សុវណ្ណ ស្នងការរងនគរបាលខេត្តសៀមរាប ក្នុងពិធីបើកវគ្គបណ្តុះបណ្តាលពីរបៀបសង្គ្រោះជនរងគ្រោះជាបឋមជូនមន្ត្រីនគរបាលចរាចរណ៍ មន្ត្រីកងរាជអាវុធហត្ថ ព្រមទាំងមន្រ្តី បច្ចេកទេសទទួលបន្ទុកសុវត្ថិភាពចរាចរណ៍ផ្លូវគោក មកពីខេត្តបាត់ដំបង រាជធានីភ្នំពេញ និងខេត្តសៀមរាប នៅព្រឹកថ្ងៃទី២៨ ខែវិច្ឆិកា ឆ្នាំ២០២២នេះ។
លោក ជឹម សុវណ្ណ បានបញ្ជាក់ថា ដើម្បីជួយសង្គ្រោះប្រជាពលរដ្ឋឱ្យទាន់ពេលវេលានៅពេលជួបគ្រោះថ្នាក់ផ្សេងៗ កន្លងមកនេះស្នងការនគរបាលខេត្តសៀមរាប ក៏បានរៀបចំបំពាក់បំពង់ពន្លត់អគ្គីភ័យតូចៗ នៅតាមម៉ូតូនគរបាលចរាចរណ៍ដែលឈរជើងនៅតាមគោលដៅ ជាលទ្ធផលឃើញថា មានប្រសិទ្ធភាពល្អ ដោយបានមន្រ្តីនគរបាលចរាចរណ៍ដែលបានទៅគោលដៅមានអគ្គីភ័យឆេះផ្ទះ និងរថយគ្រោះថ្នាក់ចរាចរណ៍បង្កឱ្យមានអភ្គីភ័យ គឺមន្រ្តីរបស់យើងបានជួយបឋមទាន់ពេល មុនរថយន្តពន្លត់អគ្គីភ័យទៅពន្លត់បន្ថែមឱ្យរលត់បានទាំងស្រុង។ ហើយសម្រាប់ពេលនេះ អង្គការឡូវអ៊ីនអែកសិន (LOVE IN ACTION) និងអង្គការខេមសេហ្វ (CAMSAFE) បានជួយបណ្តុះបណ្តាលពីរបៀបសង្គ្រោះជនរងគ្រោះជាបឋម និងផ្តល់នូវបទពិសោធន៍ប្រព័ន្ធសង្គ្រោះបន្ទាន់ EMS នៅសហរដ្ឋអាមិរិក ដែលធ្វើមន្រ្តីរបស់យើងកាន់តែមានចេះដឹងក្នុងជួយសង្គ្រោះបន្ថែមទៀត។
លោក Bruce Hein ស្ថាបនិកអង្គការឡូវអ៊ីនអែកសិន (LOVE IN ACTION) បានថ្លែងថា អង្គការរបស់លោក នៅបន្តលទ្ធភាពសហការអនុវត្តសកម្មភាពដើម្បីចូលរួមចំណែកជាមួយនឹងរាជរដ្ឋាភិបាលកម្ពុជា ឱ្យកាន់តែមានប្រសិទ្ធិភាពខ្ពស់ ក្នុងកាត់បន្ថយនូវអត្រាអ្នកស្លាប់ និងរបួសធ្ងន់ធ្ងរដោយសាគ្រោះថ្នាក់ចរាចរណ៍។ហើយសម្រាប់ការបណ្តុះបណ្តាលជូន មន្ត្រីនគរបាលចរាចរណ៍ មន្ត្រីកងរាជអាវុធហត្ថ ព្រមទាំងមន្រ្តី បច្ចេកទេសទទួលបន្ទុកសុវត្ថិភាពចរាចរណ៍ផ្លូវគោកនេះជាលើទី៤ហើយ។ លោករំពឹងថា មន្រ្តីពាក់ព័ន្ធទាំង ដែលទទួលបានការបណ្តុះបណ្តាល និងទទួលបានបទពិសោធន៍ល្អៗនៅពេលនេះ នឹងយកទៅអនុវត្តជាក់ស្តែងប្រកបដោយប្រសិទ្ធិភាពខ្ពស់ និងជួយសង្គ្រោះអាយុជីវិតប្រជាពលរដ្ឋពេលជួបគ្រោះថ្នាក់ផ្សេងបានយ៉ាងច្រើន ជាចំណែកមួយចូលរួមកាត់បន្ថយអត្រាស្លាប់ដោយគ្រោះថ្នាក់ចរាចរណ៍ផងដែរ៕
អត្ថបទ និងរូបភាព៖ លោក ឃុត សៅ
កែសម្រួល៖ លោក អ៊ុន ណារាជ្យ
