សហព័ន្ធកីឡាទោចក្រយានកម្ពុជា បានចាប់ផ្ដើមដំណើរការប្រកួត នៅក្នុងកីឡាជាតិ លើកទី៣ ហើយ ដោយរៀបចំរយៈពេល ៤ថ្ងៃ ចាប់ពីថ្ងៃទី២៤ ដល់ថ្ងៃទី២៧ ខែវិច្ឆិកា ឆ្នាំ២០២២ នៅខេត្តសៀមរាប ខណៈខេត្តកែប ដណ្ដើមបានមេដាយមាសមុនគេ ក្នុងប្រភេទកីឡានេះ លើវិញ្ញាសាកង់គួកបុរសចម្ងាយ ១៦០គីឡូម៉ែត្រ ។
លោក នូ ចំរើន អគ្គលេខាធិការសហព័ន្ធ បានឲ្យដឹងថា សម្រាប់ការប្រកួតកីឡាទោចក្រយាន ក្នុងព្រឹត្តិការណ៍កីឡាជាតិឆ្នាំនេះ មានគណៈកម្មការ ប្រតិភូ គ្រូបង្វឹក និងកីឡាករ-កីឡាការិនីចូលរួមសរុប ១២០នាក់។
ដោយឡែកលទ្ធផលបើកឆាកវិញ្ញាសាកង់គួកបុរសចម្ងាយ ១៦០គីឡូម៉ែត្រ គឺមានកីឡាករ ២៤រូបចូលរួម ហើយជាលទ្ធផល គឺកីឡាករ សាំង សីហា មកពីខេត្តកែប ឈ្នះមេដាយមាស ប្រើថិរវេលា ៤ម៉ោង ៤៤នាទី និង ៤៨វិនាទី ខណៈកីឡាករ សាន ណាម៉ាវ ឈ្នះមេដាយប្រាក់ ប្រើថិរវេលា ៤ម៉ោង ៤៥នាទី និង ៣៦វិនាទី និងកីឡាករ កែវ សុផា ឈ្នះមេដាយសំរឹទ្ធ ប្រើថិរវេលា ៤ម៉ោង ៥១នាទី និង ២៩វិនាទី ៕
