នៅព្រឹកថ្ងៃទី២៥ ខែវិច្ឆិកា ឆ្នាំ២០២២នេះ នៅសាលាឃុំស្វាយលើ ក្នុងស្រុកស្វាយលើ មានរៀបចំពិធីប្រកាសដាក់ឲ្យដេញថ្លៃ គម្រោងជួសជុលផ្លូវដីសក្រាលគ្រួសក្រហមមួយខ្សែ ប្រវែង១.៧០០ម៉ែត្រ មានទទឹងប្រវែង៥ម៉ែត្រ កម្រាស់០,១៥ម៉ែត្រ និង លូកាត់ផ្លូវចំនួន៦កន្លែង ក្រោមការដឹកនាំរបស់លោក ខន ឃាន់ មេឃុំស្វាយលើស្ដីទី ដោយមានការចូលរួមពីសំណាក់លោក លោកស្រី ជាមន្ត្រីគណៈកម្មការលទ្ធកម្មឃុំ មន្ត្រីបច្ចេកទេសសាលាខេត្តសៀមរាប និង អ្នកម៉ៅការជាច្រើនរូបទៀត ។
បើតាមប្រសាសន៍របស់លោក ប៊ិន រដ្ឋ មន្ត្រីបច្ចេកទេសសាលាខេត្តសៀមរាប បានឲ្យដឹងថា យោងតាមច្បាប់ស្តីពីការគ្រប់គ្រងរដ្ឋបាលឃុំ សង្កាត់ និងសៀវភៅ ណែនាំស្តីពីការអនុវត្តគម្រោងមូលនិធិឃុំ សង្កាត់ បានកំណត់ឱ្យក្រុមប្រឹក្សាឃុំ សង្កាត់ ធ្វើការអភិវឌ្ឍមូលដ្ឋានរបស់ខ្លួនតាមរយៈថវិកាមូលនិធិឃុំ សង្កាត់ ដែលបានវិភាជន៍ពីរាជរដ្ឋាភិបាលជារៀងរាល់ឆ្នាំតាមរយៈកិច្ចលទ្ធកម្មជាសាធារណៈ ហើយដែលនីតិវិធីនៃការអនុវត្តកិច្ច លទ្ធកម្មនេះ គឺបានកំណត់នៅក្នុងសៀវភៅណែនាំស្តីពីការអនុវត្តគម្រោងមូលនិធិឃុំ សង្កាត់ ដែលត្រូវបានចុះហត្ថលេខាឱ្យប្រើប្រាស់កាលពីថ្ងៃទី១៤ ខែមករា ឆ្នាំ២០០៩ ដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
លោកបន្តថា សម្រាប់រដ្ឋបាលឃុំ សង្កាត់ ទាំង១០០ របស់ខេត្តសៀមរាប ក៏បានអនុវត្តកិច្ចលទ្ធកម្មគម្រោងមូលនិធិឃុំ សង្កាត់ ទៅតាមនីតិវិធីដូចបានកំណត់នៅក្នុងសៀវភៅណែនាំខាងលើជារៀងរាល់ឆ្នាំផងដែរ ហើយថ្ងៃនេះគឺជាការដេញមូលនិធិឆ្នាំ២០២២របស់ឃុំស្វាយលើ ដូច្នេះក្នុងឱកាសនេះ សូមណែនាំដល់អ្នកម៉ៅការចូលរួមដេញថ្លៃទាំងអស់ ត្រូវគោរពក្រមសីលធម៌ដែលមានចែង និង ដាក់ក្នុងសំណើដាក់ឲ្យដេញថ្លៃ ពិសេស ត្រូវអនុវត្តតាមសំណើរបស់ឃុំដែលជាម្ចាស់គម្រោង ប៉ុន្តែប្រសិនបើអ្នកម៉ៅការចូលរួមដេញថ្លៃរូបណា ដែលមិនអនុវត្តតាមក្រមសីលធម៌នេះទេ ម្ចាស់គម្រោងនឹងស្នើសុំគោលការណ៍លុបលទ្ធផលគម្រោងដេញថ្ងៃនេះ ។
ព័ត៌មានជាតិ ថ្មីៗ
លោក ខន ឃាន់ មេឃុំស្វាយលើស្ដីទី បានឲ្យដឹងថា គម្រោងជួសជុលផ្លូវដីសក្រាលគ្រួសក្រហមមួយខ្សែ ប្រវែង១.៧០០ម៉ែត្រ និង លូកាត់ផ្លូវចំនួន៦កន្លែងនេះ ក្នុងតម្លៃប៉ាន់ស្មានចំនួន ១៥៧.៨៩១.៨៦៩រៀល ដែលនៅពេលនេះមានក្រុមហ៊ុនចំនួន៨ បានចូលរួមដេញថ្លៃ រួមមាន ៖ ១. ក្រុមហ៊ុន អំ ឡូ , រស់ ចំរើន , ម៉ូវ សៀកផៃ , ELHS , រ៉ម ចំរើន , AMRL , ហ៊ួរ ឆូយ និង ក្រុមហ៊ុន GSB ។
លោក ខន ឃាន់ បន្តថា អ្នកដេញថ្លៃដែលឈ្នះត្រូវអនុវត្តឱ្យបានត្រឹមត្រូវទៅតាមគំនូសប្លង់បច្ចេកទេស ការបរិយាយ លម្អិតលក្ខណៈបច្ចេកទេស និងល័ក្ខខ័ណ្ឌនៃកិច្ចសន្យា ហើយក្នុងករណីកិច្ចសន្យាត្រូវបានបញ្ឈប់មុនកាលកំណត់ ដោយសារតែអ្នកទទួលការ មិនអនុវត្តតាមល័ក្ខខ័ណ្ឌនៃកិច្ចសន្យានោះ អ្នកទទួលការ នឹងមិនទទួលបានការទូទាត់ឡើយ ហើយប្រាក់កក់ធានាការអនុវត្តនឹងត្រូវបានរឹបអូសផ្ទេរបង្វែរបង់ចូលថវិការដ្ឋ ដោយបង់ជាចំណូលថវិការដ្ឋបាលឃុំ សង្កាត់ខណៈដែលចំពោះកិច្ចសន្យាសំណង់ អ្នកទទួលការមានកាតព្វកិច្ចថែទាំលទ្ធផលកិច្ចសន្យាក្នុងរយៈពេល៦ខែ បន្ទាប់ពីបញ្ចប់ការសាងសង់ បើមិនដូច្នេះទេ ថវិកា១០%សម្រាប់ការទូទាត់ចុងក្រោយនឹងមិនត្រូវបានទូទាត់ឡើយ ។
បន្ទាប់មកគណៈកម្មការលទ្ធកម្មឃុំ បានធ្វើការបើកកញ្ចប់ឯកសាររបស់អ្នកទទួលការដេញថ្លៃ ដោយធ្វើការពិនិត្យ និង ពិភាក្សាទៅលើឯកសារទាំងអស់ ព្រមទាំងឲ្យធ្វើការកែតម្រូវឯកសារណាដែលខុស ឲ្យត្រឹមត្រូវតាមគតិយុត្តិ ។
ក្រោយពីពិនិត្យ និង ពិភាក្សារួច គណៈកម្មការលទ្ធកម្មឃុំ បានរកឃើញថា ក្រុមហ៊ុន ហ៊ួរ ឆូយ ទទួលបានតម្លៃទាបទី១ ក្នុងទឹកប្រាក់ចំនួន ៩៤.៣៥០.៦០០រៀល , ក្រុមហ៊ុន រស់ ចំរើន ទទួលបានតម្លៃទាបទី២ ក្នុងទឹកប្រាក់ចំនួន ៩៩.០៦០.០០០រៀល និង ក្រុមហ៊ុន ម៉ូវ សៀកផៃ ទទួលបានតម្លៃទាបទី៣ ក្នុងទឹកប្រាក់ចំនួន ១០៨.២៩០.៦០០រៀល ។
ក្នុងឱកាសនោះដែរ លោក សេង សួរ តំណាងក្រុមហ៊ុន ហ៊ួរ ឆូយ ដែលទទួលបានតម្លៃទាបទី១នោះ បានធ្វើការប្ដេជ្ញាចិត្ត ដោយសន្យាឲ្យបានត្រឹមត្រូវតាមក្បួនច្បាប់បច្ចេកទេស ដូចមានចែងក្នុងកិច្ចសន្យាស្រាប់ ៕
អត្ថបទ ៖ លោក លីវ សាន្ត
