នៅសាលប្រជុំសាលាខេត្តសៀមរាប នាព្រឹកថ្ងៃទី២៥ ខែមករា ឆ្នាំ២០២៣ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប គ.ខ.ប.ជ បានរៀបចំបើកកិច្ចប្រចាំខែមករា ឆ្នាំ២០២៣ របស់ខ្លួន ក្រោមអធិបតីភាព លោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាន គ.ខ.ប.ជ និងមានការចូលរួមពីតំណាងមន្ទីរអង្គភាព រដ្ឋបាលក្រុងស្រុក និងអង្គការដៃគូជាតិអន្តរជាតិជាច្រើនរូប។
កិច្ចប្រជុំនាពេលនេះដែរ គឺដើម្បីធ្វើការពិនិត្យ និងពិភាក្សាទៅលើរបៀបវរៈចំនួន៥ រួមមាន៖ ១.ពិនិត្យលើសេចក្តីព្រាងរបាយការណ៍លទ្ធផលការងារប្រយុទ្ធប្រឆាំងអំពើជួញដូរមនុស្សប្រចាំខែមករា ឆ្នាំ២០២៣ ,២.ពិនិត្យលើសេចក្តីព្រាងផែនការសកម្មភាព និងផែនការថវិកា ប្រចាំឆ្នាំ២០២៣ ,៣.ពិនិត្យ និងពិភាក្សាលើការរៀបចំកិច្ចប្រជុំបូកសរុបលទ្ធផលការងារឆ្នាំ២០២២ និងលើកទិសដៅអនុវត្តបន្តឆ្នាំ២០២៣ ,៤.ពិនិត្យលើសេចក្តីព្រាងប្រតិទិនកិច្ចប្រជុំប្រចាំឆ្នាំ២០២៣របស់គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត និង៥.ពិភាក្សាលើបញ្ហាប្រឈម និងសំណូមពរផ្សងៗ។
ព័ត៌មានជាតិ ថ្មីៗ
បន្ទាប់ពីបានពិនិត្យ និងពិភាក្សាលើរបៀបវរៈខាងលើរួចមក ក្រុមការងារក៏ជួបបញ្ហាប្រឈមមួយចំនួន ហើយអង្គប្រជុំបានលើកជាអនុសាសន៍ និងដាក់ចេញផែនការបន្ថែមដូចខាងក្រោម៖
– ក្រុមការងារលេខាធិការដ្ឋានត្រូវពិនិត្យ និងកែសម្រួលបន្ថែមទៅផែនការសកម្មភាពឆ្នាំ២០២៣ និងស្នើសុំគោលការណ៍ចុះអនុវត្តសកម្មភាពឆ្នាំ២០២៣ ទៅឯកឧត្តមអភិបាល នៃគណៈអភិបាលខេត្ត។
– ក្រុមការងារលេខាធិការដ្ឋាន រៀបចំកិច្ចប្រជុំបូកសរុបលទ្ធផលការងារឆ្នាំ២០២២ និងលើកទិសដៅអនុវត្តបន្តឆ្នាំ២០២៣ នាថ្ងៃទី១៦ ខែកុម្ភៈ ឆ្នាំ២០២៣។
– ក្រុមការងារលេខាធិការដ្ឋាន រៀបចំកាលបរិច្ឆេទចុះបណ្តុះបណ្តាលពង្រឹងសមត្ថភាពដល់មន្រ្តីនគរបាល និងកងរាជអាវុធហត្ថ ក្រុង ស្រុក និងប៉ុស្តិ៍រដ្ឋបាល ឃុំ សង្កាត់ នៅក្នុងត្រីមាសទី១ ឆ្នាំ២០២៣ ស្តីពី ការអនុវត្តច្បាប់ យុត្តិធម៌អនីតិជន។
– មន្ទីរសង្គមកិច្ច ពង្រឹងលើកិច្ចសហការជាមួយអង្គការដៃគូ និងអាជ្ញាធរមូលដ្ឋានអំពីការធ្វើសមាហរណកម្មជនរងគ្រោះត្រឡប់មកសហគមន៍វិញ ដើម្បីងាយស្រួលដល់អាជ្ញាធរធ្វើការតាមដានបន្ត។
– រដ្ឋបាលក្រុង ស្រុក ពិនិត្យ និងកែសម្រួលទៅលើសមាសភាពក្រុមការងារ ដែលមានការផ្លាស់ប្តូរ និងធ្វើការបញ្ជូនអំពីប្រតិទិននៃកិច្ចប្រជុំរបស់ក្រុមការងារមកលេខាធិការដ្ឋាន ដើម្បីក្រុមការងារចុះគាំទ្រកិច្ចប្រជុំ។
-សូមឱ្យមន្ទីរ អង្គភាព រដ្ឋបាលក្រុង ស្រុក និងអង្គការដៃគូជាតិអន្តរជាតិទាំងអស់បន្តសហការអនុវត្តការងារប្រយុទ្ធប្រឆាំងអំពើជួញដូរមនុស្សទៅតាមផែនការដែលបានលើកឡើង ពិសេសពង្រឹងទៅលើការផ្សព្វផ្សាយតាមគ្រប់រូបភាព ការផ្តល់សេវាសមស្របដល់ជនរងគ្រោះ និងងាយរងគ្រោះ និងការបង្ក្រាបបទល្មើសឱ្យបានទាន់ពេលវេលា និងការផ្តន្ទាទោសឱ្យខានតែបាន៕
អត្ថបទ និងរូបភាព៖ លោក យូ វង្ស
