គិតត្រឹមឆ្នាំ២០២១ ករណីអំពើហិង្សាក្នុងគ្រួសារនៅស្រុកស្វាយលើ ខេត្តសៀមរាប មានចំនួន ៧៩ករណី បើធៀបនឹងឆ្នាំ២០២២ មានចំនួនសរុប ១១៦ករណី មានការកើនឡើង ៣៧ករណី នេះបើតាមការឱ្យដឹងពី លោកស្រី វ៉ាន ឆៃវឿន អនុប្រធានការិយាល័យសង្គមកិច្ច និងសុខុមាលភាពសង្គមស្រុកស្វាយលើ ក្នុងកិច្ចពិភាក្សាលើប្រធានបទ ផែនការសកម្មភាពដើម្បីជួយដល់ស្ត្រី និងកុមារដែលរងគ្រោះពីអំពើហិង្សាក្នុងគ្រួសារ នៃកម្មវិធីយើងធ្វើបាន របស់មន្ទីព័ត៌មានខេត្តសៀមរាប ថ្ងៃទី២៥ ខែមករា ឆ្នាំ២០២៣។
លោកស្រី វ៉ាន ឆៃវឿន បញ្ជាក់ថា ការកើនឡើងនៃករណីអំពើហិង្សាក្នុងគ្រួសារនៅស្រុកស្វាយលើនេះ កើតឡើងក្នុងគ្រួសារ ដែលធ្លាប់ប្រព្រឹត្តិអំពើហិង្សាកន្លងមក និងមួយចំនួនទៀត ជនបង្កមិនចូលរួម ស្ដាប់ការផ្សព្វផ្សាយគោលនយោបាយភូមិ ឃុំ សង្កាត់មានសុវត្ថិភាពប្រចាំខែ របស់អាជ្ញាធរនៅតាមឃុំទាំង៥។
លោកស្រី វ៉ាន ឆៃវឿន បង្ហាញថា អំពើហិង្សាក្នុងគ្រួសារ ដែលធ្លាប់កើតមាន បណ្ដាលមកពីផ្នែកសេដ្ឋកិច្ច ផ្លូវចិត្ត ដែលកើតចេញពីការលេងល្បែងស៊ីសង ការផឹកគ្រឿងស្រវឹង និងការរស់នៅមិនចុះសម្រុងគ្នា។ ចំពោះការជួយជនរងគ្រោះពីអំពើហិង្សា អាជ្ញាធរស្រុកមានផ្ដល់សេវាសុខាភិបាល និងជម្រកសុវត្ថិភាពនៅតាមបុស្តិនគរបាលរដ្ឋបាលឃុំ ឬអធិការដ្ឋានស្រុក។ រីឯការដោះស្រាយ អាជ្ញាធរនៅថ្នាក់ឃុំ និងស្រុក បានអនុវត្តន៍នីតិវិធីណែនាំ និងសម្របសម្រួល ចាប់ពី ១លើក ដល់៣លើក។ ក្នុងករណីពុំអាចដោះស្រាយបាន អាជ្ញាធរស្រុកបានបញ្ជូនទៅកាន់មន្ទីរកិច្ចការនារីខេត្ត ដែលមានកិច្ចសហការពីសហការជាខាងអង្គការផ្ដល់សេវាផ្នែកច្បាប់ចំនួន២ គឺ អង្គការ LAC និង អង្គការ CWCC ដែលអង្គការនេះនឹងផ្ដល់មេធាវី ដើម្បីដោះស្រាយក្រៅប្រព័ន្ធតុលារ ដែលជួយដល់ភាគីជម្លោះ កាត់បន្ថយចំណាយថវិកា និង ពេលវេលា ដោះស្រាយនៅតុលាការ។
បើតាមការលើកឡើងរបស់ លោកស្រី ស៊ុំ សុភាព អភិបាលរងស្រុកស្វាយលើ គណៈកម្មការពិគ្រោះយោបល់កិច្ចការស្រីនិងកុមារ ថ្នាក់ស្រុក និងឃុំ បានយកចិត្តទុកដាក់ធ្វើការផ្សព្វផ្សាយ និងពិគ្រោះយោបល់ ដោះស្រាយករណីអំពើហិង្សាក្នុងគ្រួសារជាទៀតទាត់នៅតាមបណ្ដាឃុំទាំង៥ ដែលមានចំនួន ៤លើកក្នុងមួយខែ។ ក្នុងនោះ ការផ្សព្វផ្សាយគោលនយោបាយភូមិ ឃុំ សង្កាត់មានសុវត្ថិភាព ជាសាធារណៈ ក៏មានការបញ្ជ្រាបច្បាប់ស្តីពី ការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ឱ្យប្រជាជនក្នុងមូលដ្ឋានបានដឹងគ្រប់ៗគ្នាផងដែរ។
ជាមួយនោះ អាជ្ញាធរស្រុកស្វាយលើ ក៏បានអំពាវនាវ ដល់ប្រជាជនទាំងអស់ ដែលទទួលរងនូវអំពើហិង្សា និងបានឃើញករណីអំពើហិង្សានៅទីកន្លែងណា សូមរាយការណ៍ទៅអាជ្ញាធរសមត្ថកិច្ចនៅមូលដ្ឋានរបស់ខ្លួន ជាពិសេសជួយជម្លៀសស្រ្តី និងកុមារ រងគ្រោះឱ្យចេញផុតពីជនបង្ក និងជូនពួកគាត់ មកទទួលបានសេវាផ្សងៗពីអាជ្ញាធរ និងអង្គការដៃគូរពាក់ព័ន្ធផ្សេងៗ។
អត្ថបទ៖ លោក ហ៊ុន ឆៃលាង និង កញ្ញា ប្រន ស្រីនីត
កែសម្រួល៖ លោក សេង ផល្លី
