នៅព្រឹកថ្ងៃទី២៦ ខែមករា ឆ្នាំ២០២៣នេះ រដ្ឋបាលខេត្តសៀមរាប បានរៀបចំកិច្ចប្រជុំពាក់ព័ន្ធរបាយការណ៍សម្រាប់សិក្ខាសាលាស្តីពី វឌ្ឍនភាពការងាររបស់ក្រុមការងារដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភខេត្តសៀមរាប ឆ្នាំ២០២២ នឹងទិសដៅការងារអនុវត្តឆ្នាំ២០២៣ ដែលគ្រោងនឹងរៀបចំឡើងដោយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ សហការជាមួយរដ្ឋបាលសាលាខេត្តសៀមរាប អង្គការទស្សនៈពិភពលោក (WI) សម្ព័ន្ធអង្គការសង្គមស៊ីវិលដើម្បីអាហារូបត្ថម្ភកម្ពុជា(SUN CSA) និងមូលនិធិសហប្រជាជាតិដើម្បីកុមារប្រចាំប្រទេសកម្ពុជា(UNICEF) គាំទ្រថវិការដោយអង្គការទស្សនៈពិភពលោក (WVI) សម្ព័ន្ធអង្គការសង្គមស៊ីវិលដើម្បីអាហារូបត្ថម្ភកម្ពុជា (SUN-CSA) និងមូលនិធិសហប្រជាជាតិដើម្បីកុមារប្រចាំ ប្រទេសកម្ពុជា(UNICEF) នាថ្ងៃទី៣១ ខែមករា ឆ្នាំ២០២៣ខាងមុខ ។
លោក អ៊ឹង សុភ័ណ នាយកទីចាត់ការអន្តរវិស័យសាលាខេត្ត មានប្រសាសន៍ថា រាជរដ្ឋាភិបាលកម្ពុជា បានទទួលស្គាល់ចំពោះសន្តិសុខស្បៀង និងអាហារូបត្ថម្ភ គឺជាសិទ្ធិមូលដ្ឋានរបស់បុគ្គលម្នាក់ៗ នៅក្នុងសង្គមកម្ពុជា ដូចមានចែងនៅក្នុងសេចក្ដីថ្លែងការណ៍ជាសកល ស្តីពីសិទ្ធិមនុស្ស និងសន្ធិសញ្ញាអន្តរជាតិ ស្តីពីសេដ្ឋកិច្ចសង្គម និង វប្បធម៌ ដែលកម្ពុជាបានផ្តល់សច្ចាប័ន។ ឈរលើស្មារតីនេះ រាជរដ្ឋាភិបាលបានផ្ដល់អាទិភាពខ្ពស់ និងចាត់ទុកវិស័យសន្តិសុខស្បៀងនិងអាហារូបត្ថម្ភជាបញ្ហាអន្តរវិស័យមួយដ៏មានសារៈសំខាន់ក្នុងការចូលរួមចំណែកដល់ការអភិវឌ្ឍធនធានមនុស្ស សេដ្ឋកិច្ចភាពចម្រុងចម្រើននៃសង្គមជាតិ និងសមធម៌សង្គម។ ដំណោះស្រាយពាក់ព័ន្ធនឹងសន្តិសុខស្បៀង និងអាហារូបត្ថម្ភ មិនត្រឹមតែជាការឆ្លើយតបទៅនឹងគោលនយោបាយ ជាអាទិភាពរបស់រាជរដ្ឋាភិបាល ដែលបានដាក់ចេញកន្លងមកប៉ុណ្ណោះទេ ប៉ុន្តែបានរួមចំណែកយ៉ាងសំខាន់ក្នុងការកាត់បន្ថយភាពក្រីក្ររបស់ប្រជាជន ធន់នឹងភាពងាយរងគ្រោះ វិបត្តិ និងបញ្ហាផ្សេងៗ ការពារបរិស្ថាន និងជួយកាត់បន្ថយផលប៉ះពាល់នៃការប្រែប្រួលអាកាសធាតុ និងមានចីរភាពសម្រាប់ប្រជាជនកម្ពុជាគ្រប់រូប រួមនឹងភពផែនដី និងវិបុលភាព។
លោក អ៊ឹង សុភ័ណ បន្តទៀតថា រាជរដ្ឋាភិបាលនីតិកាលទី៦ នៃរដ្ឋសភា បានខិតខំយកចិត្តទុកដាក់ធ្វើឱ្យប្រសើរឡើងនូវស្ថានភាពសន្តិសុខស្បៀង និងអាហារូបត្ថម្ភរបស់ប្រជាជន ហើយបានចាត់ទុកសន្តិសុខស្បៀង និងអាហារូបត្ថម្ភ គឺជាវិស័យអាទិភាពមួយរបស់រាជរដ្ឋាភិបាលកម្ពុជា ដូចបានរំលេចនៅក្នុងយុទ្ធសាស្ត្រចតុកោណ ដើម្បីកំណើនការងារសមធម៌ និងប្រសិទ្ធភាពដំណាក់កាលទី៤ (២០១៨-២០២៣)។ ជាពិសេសក្នុងចតុកោណទី១ មុំទី៣ ការលើកកម្ពស់សេវាសុខភាពសាធារណៈ និងអាហារូបត្ថម្ភ និងទី៤ មុំទី១ ការលើកស្ទួយវិស័យកសិកម្ម និងការអភិវឌ្ឍន៏ជនបទ និងក្នុងផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ និងគោលដៅអភិវឌ្ឍប្រកបដោយចីរភាពកម្ពុជាឆ្នាំ២០១៦- ២០៣០។ យុទ្ធសាស្ត្រជាតិស្តីពីសន្តិសុខស្បៀង និងអាហារូបត្ថម្ភ លើកទី២ ឆ្នាំ២០១៩-២០២៣ ភាពជាអ្នកថែទាំកុមារ ការផ្គត់ផ្គង់ទឹកស្អាតនិងអនាម័យ ព្រមទាំងការទទួលបានសេវាថែរទាំសុខភាពនានា។ ជាទូទៅប្រជាជនកម្ពុជាភាគច្រើនទទួលទានបាយច្រើនជាអាហារប្រចាំថ្ងៃដូច្នេះធ្វើឱ្យពួកគាត់ឆាប់ឆ្អែត ប៉ុន្ដែខ្វះប្រូតេអ៊ីន វីតាមីន និងសារជាតិចិញ្ចឹមសំខាន់ៗ ជាចាំបាច់ដ៏ទៃទៀត សម្រាប់ការទ្រទ្រង់រាងកាយ ដើម្បីធ្វើឱ្យពួកគាត់មានការលូតលាស់ល្អ និងមានសុខភាពល្អ។ កង្វះនៃការបរិភោគអាហារចម្រុះដូចជា៖ គ្រាប់ធញ្ញជាតិ បន្លែ ផ្លែឈើ ត្រី សាច់ ស៊ុត បាននាំឱ្យប្រជាជនមានបញ្ហាសុខភាពជាច្រើន រាប់ទាំងបញ្ហាអាហារូបត្ថម្ភផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
