នៅថ្ងៃទី២៦ ខែមករា ឆ្នាំ២០២៣ លោកឧត្តមសេនីយ៍ត្រី នៅ អេងវណ្ណនី ស្នងការរងទទួលបន្ទុកផែនអត្តសញ្ញាណបណ្ណសញ្ជាតិខ្មែរ នៃស្នងការរដ្ឋាននគបាលខេត្តសៀមរាប បានបញ្ជាក់ថា មន្ត្រីនគរបាលជំនាញ នៅតាមឃុំ សង្កាត់ កំ ពុងបំពេញការងារជារៀងរាល់ថ្ងៃ ដើម្បីពន្លឿនការផ្ដល់អត្តសញ្ញាណបណ្ណជូនប្រជាជនចាប់ពីអាយុ ១៥ឆ្នាំឡើងទៅ និងផ្ដល់អត្តសញ្ញាណបណ្ណថ្មីជូនប្រជាពលរដ្ឋ ដែលបានបាត់ និងអស់សុពលភាពដោយមិនគិតថ្លៃ។
មានវត្តមានក្នុងកិច្ចពិភាក្សាលើប្រធានបទ «វឌ្ឍនភាពនៃការធ្វើអត្តសញ្ញាណបណ្ណសញ្ជាតិខ្មែរសម្រាប់ប្រជាពលរដ្ឋទើបគ្រប់អាយុ ឬបាត់ ខូច និងអស់សុពលភាព» ក្នុងកម្មវិធីសន្ទនាមតិ របស់មន្ទីរព័ត៌មានខេត្តសៀមរាប លោកឧត្តមសេនីយ៍ត្រី នៅ អេងវណ្ណនី បង្ហាញថា សម្រាប់ខេត្តសៀមរាប ប្រជាជនទើបគ្រប់អាយុ១៥ឆ្នាំ និង កំពុងកាន់អត្តសញ្ញាណហួសសុពលភាពមានចំនួនសរុប ជិត១៤ម៉ឹននាក់។
លោក ស្នងការរង លើកឡើងថា សម្រាប់ ប្រជាជនទើបគ្រប់អាយុ១៥ឆ្នាំ ដើម្បីស្នើសុំអត្តសញ្ញាណបណ្ណ សាមីខ្លួនត្រូវភ្ជាប់ជាមួយសេចក្តីចម្លងសំបុត្រកំណើត ឬ សេចក្តីចម្លងសំបុត្របញ្ជាក់កំណើតមានសញ្ជាតិខ្មែរ សៀភៅស្នាក់នៅ ឬ សៀវភៅគ្រួសារ។ រីឯ អ្នកកំពុងកាន់អត្តសញ្ញាណប័ណ្ណផុតសុពលភាព ឬសល់រយៈពេលត្រឹម ៩០ថ្ងៃ គឺតម្រូវឱ្យសាម៉ីខ្លួន មកបំពេញបែបបទស្នើសុំថ្មីឡើងវិញ ក្នុងករណីមានការផ្លាស់ប្តូរទិន្នន័យលើអត្តសញ្ញាណបណ្ណ ហើយអ្នកដែលមានអត្តសញ្ញាណបណ្ណរបក បាក់ ឬខូច ត្រូវយកអត្តសញ្ញាណបណ្ណទាំងនោះ មកសុំប្តូរថ្មីដោយពុំចាំបាច់មានឯកសារអ្វីឡើយ។ ដោយឡែក អ្នកដែលបានបាត់អត្តសញ្ញាណបណ្ណ ត្រូវមានពាក្យបណ្តឹង និងពាក្យស្នើសុំអត្តសញ្ញាណបណ្ណដែលហួសសុពលភាព ចេញដោយប៉ុស្តីនគរបាលរដ្ឋបាល ដែលសាមីខ្លួនស្នាក់នៅអចិន្រ្តៃយ៍។ លោក បញ្ជាក់បន្ថែមថា រាល់ការមកបំពេញបែបបទធ្វើអត្តសញ្ញាណបណ្ណសញ្ជាតិខ្មែរថ្មីនេះ ពុំមិនមានគិតប្រាក់ពីប្រជាពលរដ្ឋឡើយ។
លោក ស្នងការរង ក៏បានអំពាវនាវដល់ប្រជាពលរដ្ឋទាំងអស់ សូមអញ្ជើញមកបំពេញបែបបទ ស្នើសុំអត្តសញ្ញាណបណ្ណសម្រាប់ប្រជាជនទើបគ្រប់អាយុ ឬបាត់ ខូច និងអស់សុពលភាព តាមការផ្សព្វផ្សាយរបស់អាជ្ញាធរមូលដ្ឋាន ជាពិសេសប្រជាពលរដ្ឋ ដែលទើបត្រឡប់ពីធ្វើចំណាកស្រុកក្នុង និងក្រៅប្រទេស ព្រោះការប្រើប្រាស់អត្តសញ្ញាណបណ្ណអស់សុពលភាព មិនមានភាពស្របច្បាប់សម្រាប់ជីវភាពប្រចាំថ្ងៃទេ។
អត្ថបទ៖ លោក ហ៊ុន ឆៃលាង និង កញ្ញា ប្រន ស្រីនីត
កែសម្រួល៖ លោក សេង ផល្លី
