រសៀលថ្ងៃទី២៩ ខែមករា ឆ្នាំ២០២៣ សមាគមគ្រូបង្រៀនភាសាជប៉ុនអង្គរវត្ត សហការគាំទ្រពីស្ថានទូតជប៉ុនប្រចាំកម្ពុជា និងសមាគមជនជាតិជប៉ុនកម្ពុជាសាខាខេត្តសៀមរាប បានរៀបចំកម្មវិធីប្រឡងប្រជែងផ្នែកសមត្ថភាពសិស្សរៀនភាសាជប៉ុន ដែលមានសិស្ស និងនិស្សិតកម្ពុជានៅខេត្តសៀមរាប ចូលរួមប្រកួតប្រមាណជា ៣០នាក់ សុទ្ធតែជាសិស្សដែលបានប្រឡងជាប់នៅវគ្គជំរុះ ដោយឆ្លងកាត់ការវាយតម្លៃយ៉ាងសុក្រិតបំផុត កាលពីថ្ងៃទី២៥ ខែធ្នូ ឆ្នាំ២០២២ នៅគ្រឹះស្ថានអប់រំវប្បធម៌ជប៉ុនអន្តរជាតិ ។ការប្រឡងប្រជែងលើកទី១២នេះធ្វើឡើងនៅគ្រឹះស្ថានអប់រំវប្បធម៌ជប៉ុនអន្តរជាតិ ដដែល ក្នុងសង្កាត់ស្លក្រាម ក្រុងសៀមរាប ក្នុងគោលបំណងធ្វើឲ្យអ្នកសិក្សាភាសាជប៉ុនបង្ហាញសមត្ថភាពលើការអាន ការបញ្ចេញសម្លេង ការសរសេរ ក្នុងលក្ខណ:ប្រកួតប្រជែងដណ្តើមពិន្ទុ រវាងគ្នា និងគ្នា និងជាការពញ្ញាក់អារម្មណ៍ដល់អ្នកដែលមិនបានរៀនភាសាជប៉ុនឲ្យមានចំណាប់អារម្មណ៍សិក្សាភាសាជប៉ុនឱ្យកាន់តែច្រើន។ ក្នុងឱកាសប្រឡងលើកទី១២នេះដែរ មានវត្តគណ:កម្មការវាយតម្លៃជាមន្ត្រីនៃស្ថានទូតជប៉ុនប្រចាំនៅកម្ពុជា និងការិយាល័យកុងស៊ុលជប៉ុនប្រចាំខេត្តសៀមរាប ព្រមទាំងវត្តមានលោកគ្រូ អ្នកគ្រូ សាស្ត្រចារ្យជប៉ុនជាច្រើនផងដែរ ដើម្បីផ្ទៀងផ្ទាត់វាយតម្លៃផ្តល់ពិន្ទុ និងផ្តល់វិញ្ញាបនបត្របញ្ជាក់ពីសមត្ថភាពព្រមទាំងរង្វាន់លើកទឹកចិត្តជាច្រើនផងដែរ ។
អ្នកស្រីអូនី ហ៊ីហ្វឺម៉ី គ្រូបង្រៀនភាសាជប៉ុនអង្គរវត្ត បានមានប្រសាសន៍ក្នុងថា៖ នៅកម្ពុជា កន្លែងរៀនភាសាជប៉ុនមាននៅតែសៀមរាប និងរាជធានីភ្នំពេញ។ នៅភ្នំពេញមានកម្មវិធីប្រឡងច្រើនបែបយ៉ាងនិងមានភាពប្រកួតប្រជែងយ៉ាងសម្បូរបែបដូចជាកម្មវិធីសំណួរចម្លើយកម្មវិធីចំរៀងជាដើម។ ចំណែកនៅសៀមរាបមានការលំបាកប្រសិនបើចង់ប្រឡងទាល់តែទៅភ្នំពេញ ដោយសារបញ្ហាបែបនេះទើបសម្រេចឱ្យមានការប្រឡងនៅខេត្តសៀមរាប ដើម្បីឱ្យអ្នកកំពុងរៀនភាសាជប៉ុនមានការប្រឡងប្រកួតប្រជែងវាស់ស្ទង់សមត្ថភាពលើការអាន ការបញ្ចេញសម្លេង។ អ្នកស្រីអូនី ហ៊ីហ្វឺម៉ី បញ្ជាក់ឱ្យដឹងដែរថា៖ ការប្រឡងនាពេលនេះជាការប្រឡងវាស់សមត្ថភាពភាសាជប៉ុនសុទ្ធសាធ មិនមែនប្រឡងថ្លែងសុន្ទរកថានោះទេ ដោយសារខេត្តសៀមរាប មានអ្នកសិក្សាភាសាជប៉ុនច្រើន និងអាយុខុសៗគ្នា មានអ្នកខ្លះជាសិស្សបឋម អនុវិទ្យាល័យ សិស្សវិទ្យាល័យ ខ្លះជាមន្ត្រីរាជការ និងអ្នកធ្វើការឯកជនផ្សេងៗ។ សិស្សបឋមមិនអាចធ្វើការថ្លែងសុន្ទរកថាបានល្អនោះទេ ហើយអ្នកធ្វើការក៏មិនមានពេលទន្ទេញដែរ។ ហេតុនេះទើបសម្រេចឱ្យមានការប្រឡងបែបអំណាន មានជាអំណានទោលសម្រាប់សិស្សអនុវិទ្យាល័យចុះក្រោម អំណានជាក្រុមចាប់ពីវិទ្យាល័យឡើងលើ និងការសម្តែងជាក្រុមរឿងខ្លីជាដើម។ ការប្រឡងនេះបានធ្វើឡើងក្នុងមួយឆ្នាំម្តង ប៉ុន្តែត្រូវបានអាក់ខាននៅឆ្នាំ២០២១ ដោយសារតែជំងឺកូវីដ-១៩។
លោកកាវ៉ាគឺឆីក ម៉ាសាគី តំណាងកុងស៊ូលជប៉ុនប្រចាំខេត្តសៀមរាប មានប្រសាសន៍ថា៖ ការប្រឡងប្រជែងភាសាជប៉ុនឆ្នាំនេះ គឺបង្ហាញពីការគាំទ្រនូវព្រឹត្តិការណ៍រម្លឹកខួនអនុស្សាវរីយ៍លើកទី៧០ នៃចំណងមិត្តភាពរវាងជប៉ុន និងកម្ពុជា និងខួបអនុស្សាវរីយ៍លើកទី៥០ នៃមិត្តភាពរវាងជប៉ុន និងបណ្តាប្រទេសអាស៊ាន។ កាវ៉ាគឺឆីក ម៉ាសាគី ក៏ដូចជាកគណ:កម្មការវាយតម្លៃគ្រប់ៗរូបបានសម្តែងការភ្ញាក់ផ្អើលនិងកោតសសើរចំពោះការរៀនភាសាជប៉ុនរបស់សិស្សកម្ពុជាទាំងការអាន ការសរសេរ និងការបញ្ចេញសម្លេងបានល្អប្រសើរ ប៉ុន្តែទោះយ៉ាងណាក៏ដោយក៏ក្រុមគណ:កម្មការបានរកឃើញនូវចំណុចខ្វះខាតក្នុងពេលប្រឡង ដោយសិស្សខ្លះភ្លេច និងប្រើប្រាស់ប្រយោជន៍មិនទាន់ត្រឹមត្រូវ ១០០% អំណានញាប់ឬលឿនពេក និងខ្លះទៀត ការអាននៅមានភាពរអាក់រអួល។ ពួកគាត់ជម្រុញដល់សិស្ស និស្សិត ដែលមានបំណងប្រឡងភាសាជប៉ុននៅឆ្នាំក្រោយ ឱ្យបន្តការយកចិត្តទុកដាក់សិក្សាភាសាជប៉ុនបន្ថែមទៀត ។ដូចឆ្នាំមុនៗដែរ ឆ្នាំនេះកម្មវិធីប្រឡង សមាគមគ្រូបង្រៀនភាសាជប៉ុនអង្គវត្ត បានផ្តល់រង្វាន់ពិសេសសម្រាប់បេក្ខជនពីររូបរើសចេញពីផ្នែកអំណានជាក្រុមម្នាក់ និងផ្នែកសម្តែងជាក្រុមម្នាក់ ត្រូវបានទៅទស្សនកិច្ចនៅប្រទេសជប៉ុនរយ:ពេល ២សប្តាហ៍ ខណ:ឆ្នាំមុនៗ តែមួយសប្តាហ៍ និងសិស្សទទួលបាននិទ្ទេសល្អក៏ទទួលបានការចូលរួមសិក្សាប្រឡងភាសាជប៉ុនចំនួន ២ឆ្នាំ ដោយមិនយកកម្រៃផងដែរ។ បន្ថែមពីនេះ ផ្នែកអំណានទោលកុមារម្នាក់ជាប់បានលេខ១ ទទួលបានពាន១ កង់១ និងរង្វាន់ផ្សេងៗទៀត ចំណែកកុមារលេខ២ ផ្នែកអំណានទោលចំនួន ១នាក់ បានរង្វាន់ និងទទួលបាន ស្នាក់នៅសណ្ឋាគារមួយក្នុងខេត្តសៀមរាប ចំនួន ១យប់ជាមួយក្រុមគ្រួសារ រួមទាំងអាហារព្រឹកល្ងាចដោយពុំគិតកម្រៃផងដែរ។
ព័ត៌មានជាតិ ថ្មីៗ
សមាគមគ្រូបង្រៀនភាសាជប៉ុនអង្គរវត្តបានបង្កើតឡើងនៅខែកុម្ភ: ឆ្នាំ២០០៧ ក្រោមគោលបំណងអភិវឌ្ឍន៍ធនធានមនុស្ស ជាពិសេសភាសាជប៉ុន។សព្វថ្ងៃមានកន្លែងបង្រៀនភាសាជប៉ុនជាច្រើនដូចជាសាលាថែរក្សាស្នាមញញឹមកុមារ គ្រឹះស្ថានអប់រំវប្បធម៌ជប៉ុនអន្តរជាតិ សាលាតាគឹមិ សាលាហាតុហ្គោល សាលាហាយ៉ាកាវ៉ា សាលាមិស្ហឹមិ សកលវិទ្យាល័យមេគង្គកម្ពុជាអង្គការក្រៅរដ្ឋាភិបាលបេះដូងមាស៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
