មករស់នៅខេត្តសៀមរាប និងមានដើមកំណើតជាអ្នកខេត្តឧត្តរមានជ័យ លោក ស៊ន់ វាំងសង់ បានចំណាយពេលច្រើនឆ្នាំរៀនគូរគំនូរតាំងពីកុមារភាព។ ការតស៊ូ និងទេពកោសល្យរបស់លោក បានជំរុញឱ្យលោកប្រែក្លាយពីការគូរគំនូរប្រេង ទៅជាគំនូរឌីជីថល ខណៈលោកបានទៅរស់នៅសហរដ្ឋអាមេរិក ក្នុងនោះស្នាដៃរបស់លោកភាគច្រើន តែបានបង្ហាញពីប្រាង្គប្រាសាទ និងវីរបុរសរបស់ខ្មែរ។
ចាកចេញពីស្រុកកំណើតនៅឆ្នាំ២០០៩ រយៈពេល១៤ឆ្នាំ លោកបានត្រឡប់មកប្រទេសកម្ពុជាវិញ ជាពិសេសលោកបានចំណាយជាច្រើនថ្ងៃ ដើម្បីមកទស្សនាប្រាង្គប្រាសាទនានា ក្នុងតំបន់រមណីយដ្ឋានអង្គរ។
ព័ត៌មានជាតិ ថ្មីៗ
ពីជីវិតក្មេងឃ្វាលគោ អ្នកគូរគំនូរធម្មតា និងក្លាយជាវិចិត្រករគំនូរឌីជីថល នៅសហរដ្ឋអាមេរិក លោក វាំងសង់ បានរៀបរាប់ថា វាជាការស៊ូដ៏វែងឆ្ងាយ មិនមែនជាការគិតទុកមុនឡើយ។
ដោយសារតែ ការដិតដាម និងស្រឡាញ់វប្បធម៌ ក្នុងនាមជាកូនខ្មែរ ស្នាដៃរបស់លោកមានការគាំទ្រច្រើននៅលើបណ្ដាញសង្គម Facebook ជាពិសេសរូបគំនូរវីរបុរសខ្មែរ រហូតដល់មានការបញ្ជាទិញផ្ដាច់មុខ ពីគ្រឹះស្ថានបោះពុម្ពមួយនៅប្រទេសកម្ពុជា។
គិតមកដល់ពេលនេះ លោកបានគូរគំនូរឌីជីថលប្រមាណជិតមួយរយផ្ទាំងហើយ លោកបញ្ជាក់ថា ប្រាក់កម្រៃ ដែលទទួលបានពីគំនូរនេះ គឺកើតចេញពីក្ដីស្រឡាញ់ លោកចង់ឃើញស្នាដៃប្រភេទនេះ បង្កើតឡើងដោយកូនខ្មែរបន្ថែមទៀត និងរក្សាទុកឱ្យបានយូរអង្វែង ដោយផ្ដោតសំខាន់ទៅលើចម្លាក់នៅលើប្រាង្គប្រាសាទខ្មែរ និងគុណតម្លៃនៃវប្បធម៌របស់យើង។
រូបភាព៖ លោក អ៊ុន ណារាជ្យ
អត្ថបទ៖ លោក សេង ផល្លី
