តាមការឱ្យដឹងពី ឯកឧត្ដម ឧត្តមសេនីយ៍ឯក ពៅ ហេង មេបញ្ជាការរង កងទ័ពជើងគោក និងជាមេបញ្ជាការ យោធភូមិភាគទី៤ ដំណើរការចាក់វ៉ាក់សាំងការពារជំងឺកូវីដ-១៩ ដូសទី៦ ដែលជាដូសជំរុញជូនដល់កងទ័ព គ្រួសារកងទ័ព កងកម្លាំងប្រដាប់អាវុធ និងអតីតយុទ្ធជន ដែលជាវ៉ាក់សាំងការពារជំងឺកូវីដ-១៩ ដូសទី៦(ដូសជំរុញ) បានចាប់ផ្តើម ពីថ្ងៃទី២៧ ដល់ថ្ងៃទី៣១ខែមករា ឆ្នាំ២០២៣នេះ។
ឯកឧត្ដម បង្ហាញថា ការផ្ដល់វ៉ាក់សាំងដូសជំរុញនេះ ជូនដល់កងកម្លាំងយោធា និងគ្រួសារអតីតយោធិននេះ មាននៅតាមទីបញ្ជាការចំណុះឱ្យយោធភូមិភាគទី៤ នៃខេត្តចំនួន៤ រួមមាន ប្រតិបត្ដិការសឹករងខេត្ដសៀមរាប ខេត្ដឧត្ដរមានជ័យ ខេត្ដកំពង់ធំ និងខេត្ដព្រះវិហារ។ បន្ថែមពីនោះ ក៏មាននៅតាមទីបញ្ជាការកងពលថ្មើរជើងមួយចំនួនទៀត ដែលជាកងកម្លំាងប្រដាប់អាវុធ ដែលចំណុះឱ្យទីបញ្ជាការយោធភូមិភាគទី៤។
ឯកឧត្ដម មិនបានបញ្ជាក់ពីចំនួនកងកម្លាំងយោធា និងគ្រួសារអតីតយោធិន ដែលបានទទួលវ៉ាក់សាំងបង្ការជំងឺកូវីដ១៩នោះទេ ប៉ុន្ដែឯកឧត្ដមបានបញ្ជាក់ថា ការផ្ដល់វ៉ាក់សាំងដូសទី៦ នឹងផ្ដល់ឱ្យបានគ្រប់កងកម្លាំងទាំងអស់ ហើយការផ្ដល់នេះ គឺជាការស្ម័គ្រចិត្ដរបស់ពួកគាត់។
សូមបញ្ជាក់ថា ការផ្ដល់វ៉ាក់សំាងបង្ការជំងឺកូវីដ១៩នេះ ធ្វើឡើងនៅទីបញ្ជាការយោធភូមិភាគទី៤ ស្ថិតនៅស្រុកប្រាសាទបាគង ខេត្ដសៀមរាប និងនៅតាមទីបញ្ជាការផ្សេងៗទៀត ដែលចំណុះឱ្យយោធភូមិភាគទី៤ ។ ឯកឧត្ដមបានអំពាវដល់កងកម្លាំងជួរមុខ ដែលចំណុះឱ្យយោធភូមិភាគទី៤ ទៅទទួលវ៉ាក់សាំងបង្ការជំងឺកូវីដ១៩នេះ ឱ្យបានគ្រប់ៗគ្នា និងបន្ដរក្សានូវការណែនាំរបស់ក្រសួងសុខាភិបាលបីកុំបីការពារ ។ ឯកឧត្ដម ក៏បានថ្លែងអំណរគុណដល់សម្ដេចតេជោ ហ៊ុន សែន នាយករដ្ឋមន្ដ្រី ដែលតែងតែផ្ដល់ការយកចិត្ដទុកដាក់ផ្ដល់វ៉ាក់សាំងតាំងដូសមូលដ្ឋានរហូតដល់ដូសទី៦នេះ៕
អត្ថបទ និងរូបភាព៖ លោក បូ សាវី
កែសម្រួលអត្ថបទ៖ លោក សេង ផល្លី
