នាថ្ងៃទី៣១ខែមករាឆ្នាំ២០២៣ នៅសាលាខេត្តសៀមរបមានរៀបចំ សិក្ខាសាលាស្តីពីវឌ្ឍភាពការងាររបស់ក្រុមការងារដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភខេត្តសៀមរាបឆ្នាំ២០២២ និងទិសដៅការងារអនុវត្តឆ្នាំ២០២៣ ក្នុងគោលបំណងបង្កើនការយល់ដឹង និងចូលរួមអនុវត្តន៍យុទ្ឋសាស្ត្រជាតិសន្តិសុខស្បៀង និងអាហារូបត្ថម្ភលើកទី២ ឆ្នាំ២០១៩-២០៣០ និងជាពិសេសចូលរួមអនុវត្តទៅតាមផែនទីបង្ហាញផ្លូវ ស្តីពីប្រព័ន្ឋស្បៀងសម្រាប់ការអភិវឌ្ឍប្រកបដោយចីភាពនៅកម្ពុជាឆ្នាំ២០៣០។
សិក្ខាសាលានេះ ក៏បានផ្សព្វផ្សាយសារលិខិតសម្តេចតេជោ ហ៊ុន សែន នាយករដ្ឋមន្ត្រី ក្នុងឱកាសទិវាជាតិអាហារូបត្ថម្ភលើកទី៩ ថ្ងៃទី៦ ខែវិច្ឆិកា ឆ្នាំ២០២២ ក្រោមប្រធានបទ ម្ហូបអាហារកាន់តែមានសុវត្ថិភាព សុខភាពកាន់តែប្រសើរ និងស្តាប់របាយការណ៍ស្តីពីវឌ្ឍនៈភាពរបស់ក្រុមការងារដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភខេត្តសៀមរាប(កដសសអខ)ឆ្នាំ២០២២ និងទិសដៅអនុវត្តន៍ឆ្នាំ២០២៣ផងដែរ។
តាមលើកឡើងរបស់ លោក ពិន ប្រាកដ អភិបាលរងខេត្ត រដ្ឋបាលខេត្តសៀមរាប ក៏ដូចជាក្រុមការងារក្រុមដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភខេត្ត បានគាំទ្រ និងចូលរួមអនុវត្តន៍ផែនការយុទ្ធសាស្ត្រជាតិស្តីពីសន្តិសុខស្បៀង និងអាហារូបត្ថម្ភ ឆ្នាំ២០១៩-២០២៣ និងអនុវត្តន៍ផែនការសកម្មភាព ដើម្បីស្តារសេដ្ឋកិច្ច និងសង្គមឡើងវិញ ពីវិបត្តិកូវីដ-១៩ និងការរៀបចំផែនទីបង្ហាញផ្លូវ សម្រាប់ប្រព័ន្ធស្បៀងប្រកបដោយចីរភាព ឆ្នាំ២០៣០ រួមមានដូចខាងក្រោម៖
១-ការលើកកម្ពស់របស់អាហារសុខភាពសម្រាប់ទាំងអស់គ្នា
២-ការលើកម្ពស់ភាពអង់អាចរបស់យុវជន ស្រី្ត និងជនងាយរងគ្រោះ
៣-ការពង្រឹងភាពធន់លើមុខរបរចិញ្ចឹមជីវិត និងប្រព័ន្ធស្បៀង
៤-ការពង្រឹងអភិបាលកិច្ច ដើម្បីធ្វើឱ្យប្រព័ន្ធស្បៀងកាន់តែមានបរិយាប័ន្ន។
លោក ពិន ប្រាកដ បន្ថែមថា ដើម្បីសម្រេចផែនការសកម្មភាពនេះ រដ្ឋបាលខេត្ត និងក្រុមការងារដឹកនាំសម្របសម្រួល វិស័យសន្តិសុខស្បៀង និងអាហារូបត្ថម្ភខេត្តសៀមរាប នឹងខិតខំប្រឹងប្រែងសហការជាមួយក្រសួងស្ថាប័ន ជាពិសេស ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ មន្ទីរ-អង្គភាព ជុំវិញខេត្ត រដ្ឋបាលក្រុង-ស្រុក ឃុំ/សង្កាត់ និងអង្គការដៃគូអភិវឌ្ឍន៍នានា ក្នុងន័យចូលរួមអភិវឌ្ឍន៍បញ្ញា ស្មារតី និងចំណេះដឹងរបស់កុមារកម្ពុជា ក៏ដូចជាកុមារខេត្តសៀមរាប កាត់បន្ថយភាពនូវភាពក្រិន ការមានទម្ងន់មិនគ្រប់ ការស្គមស្គាំង ការមានជំងឺធាត់ជ្រុល ការពារជំងឺលើសឈាម និងជំងឺដាច់សរសៃឈាម-ល-។
ថ្លែងក្នុងឱកាសនោះ ឯកឧត្តម ជូ ប៊ុនហៀង អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ នៃទីស្តីការគណៈរដ្ឋមន្ត្រី បញ្ជាក់ថា៖ សន្តិសុខស្បៀងនិងអាហារូបត្ថម្ភ ជាបញ្ហាអន្តរវិស័យតម្រូវឱ្យមានកិច្ចសហការល្អ ការសម្របសម្រួល ការអន្តរាគមន៍ និងការវិនិយោគក្នុងវិស័យកសិកម្ម សុខាភិបាល អប់រំ ទឹកស្អាត និងអនាម័យ ឧស្សាហកម្ម ពាណិជ្ជកម្ម ការគ្រប់គ្រងធនធានទឹក គាំពារសង្គម យេនឌ័រ បរិស្ថាន និងវិស័យពាក់ព័ន្ឋនានា។ ការយល់ដឹងពីសារៈសំខាន់ នៃវិស័យសន្តិសុខស្បៀង និងអាហារូបត្ថម្ភ គឺជាមូលដ្ឋានគ្រឺះសម្រាប់អភិវឌ្ឍមូលធនមនុស្ស សេដ្ឋកិច្ចនិងសង្គមជាតិ ហេតុនេះយើងត្រូវបង្កើនចំណេះដឹងដល់សមាជិកក្រុមដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភ ឱ្យយល់ដឹងពីសារៈសំខាន់និងលើកស្ទួយវិស័យនេះសម្រាប់ការអភិវឌ្ឍនៅមូលដ្ឋាននិងជំរុញឱ្យពួកគាត់ចេះវិភាគនិងចាត់អាទិភាព ព្រមទាំងបញ្ជ្រាបការការងារនៃវិស័យនេះទៅក្នុងដំណើរការកសាងផែនការ។
អត្ថបទ និងរូបភាព៖ លោក យូ វង្ស
