ផ្ទៃដីសរុប ២,៤១៨ហិកតាស្ថិតក្នុងខេត្តសៀមរាប ត្រូវបានបានដាក់បញ្ចូលទៅក្នុងមូនិធិកម្ពុជាគ្មានមីនឆ្នាំ២០២៥ សម្រាប់សកម្មភាពមីន «ផ្តល់ដីសុវត្ថិភាព បង្កើតស្នាមញញឹម» និងត្រូវបានដាក់ឱ្យអនុវត្ដន៍បន្ដនៅឆ្នាំ២០២៣ នេះបើតាមការលើកឡើងរបស់ ឯកឧត្ដម ហេង រតនា អគ្គនាយកមជ្ឍមណ្ឌលសកម្មភាពមីនកម្ពុជា ហៅកាត់ថា ស៊ីម៉ាក់ (CMAC) ក្នុងពិធីជួបសំណេះសំណាល និងបង្ហាញគម្រោងមូលនិធិកម្ពុជាគ្មានមីនឆ្នាំ២០២៥ ដល់មន្ដ្រីបុគ្គលិកកងកម្លាំងឯកភាពកម្ចាត់មីនទី៤ នៅសារមន្ទីរសកម្មភាពមីនកម្ពុជា ស្ថិតនៅស្រុកប្រាសាទបាគង ខេត្ដសៀមរាប នាថ្ងៃទី០១ខែកុម្ភៈឆ្នាំ២០២៣នេះ។
ព័ត៌មានជាតិ ថ្មីៗ
តាមការបង្ហាញរបស់ឯកឧត្ដម ហេង រតនា គម្រោងមូនិធិកម្ពុជាគ្មានមីនឆ្នាំ២០២៥ សម្រាប់បោសសម្អាតមីន អនុវត្តលើខេត្តចំនួន៥ រួមមាន ខេត្តសៀមរាប មានផ្ទៃដីសរុប ២,៤១៨ហិកតា។ ខេត្តកំពង់ធំ មានដីសរុប ៣,៨៦០ហិកតា។ ខេត្តព្រះវិហារ មានផ្ទៃដីសរុបជាងមួយរយហិកតា។ ខេត្ដប៉ៃលិនមានផ្ទៃដីសរុបជាងមួយហិកតា និងខេត្ដពោធិសាត់ មានផ្ទៃដីជាងមួយហិកតា។
ឯកឧត្ដម ហេង រតនា បន្ថែមថា ប្រតិបត្តិការសម្រាប់គម្រោង ដាក់ពង្រាយកម្លាំងជំហានដំបូងមានចំនួន ៤៦ក្រុម ដោយរួមទាំងក្រុមចាស់ និងក្រុមថ្មី ក្នុងនោះខេត្តសៀមរាបមានចំនួន ១១ក្រុម ខេត្តកំពង់ធំមានចំនួន ១៦ក្រុម ខេត្តព្រះវិហារមានចំនួន ៧ក្រុម ខេត្តប៉ៃលិនមានចំនួន ៨ក្រុម និងខេត្ដពោធិ៍សាត់មានចំនួន ៤ក្រុម។
តាមការបញ្ជាក់របស់ឯកឧត្ដម បើទោះបី ការស្រាយបញ្ហាមីនចប់ត្រឹមឆ្នាំ២០២៥ក្ដី ប៉ុន្តែបញ្ហាសំណល់ជាតិផ្ទុះពីសង្រ្គាម ដូចជា គ្រាប់បែកទម្លាក់ពីលើយន្តហោះ គ្រាប់បែកចង្កោម និងគ្រាប់មិនទាន់ផ្ទុះគ្រប់ប្រភេទ ក៏នៅតែជាបញ្ហាដ៏ធំ ដែលយើងមិនអាចដោះស្រាយ ឱ្យអស់ត្រឹមឆ្នាំ២០២៥ ឡើយ។
គួរជម្រាបថា ផ្ទៃដីដែលគ្រោងបោសសម្អាតមីន ក្នុងខេត្តសៀមរាប សម្រាប់គម្រោងមូនិធិកម្ពុជាគ្មានមីនឆ្នាំ ២០២៥នេះ ស្ថិតក្នុងស្រុកចំនួន ៣រួមមាន ស្រុកវ៉ារិន ស្រុកស្វាយលើ និងស្រុកអង្គរជុំ។
អត្ថបទ និងរូបភាព៖ លោក បូ សាវី
កែសម្រួលអត្ថបទ៖ លោក សេង ផល្លី
