ការងាររៀបចំសណ្ដាប់ធ្នាប់ក្នុងខេត្តសៀមរាប ហាក់នៅមានកម្រិតដោយសារប្រជាពលរដ្ឋភាគច្រើនខ្វះការចូលរួម និងនិងកងកម្លាំងនគរបាលសណ្ដាប់ នៃស្នងការដ្ឋាននគរបាលខេត្តសៀមរាប ពុំទាន់គ្រប់គោលដៅ សម្រាប់ខេត្តទេសចរណ៍ដ៏មានប្រជាប្រិយភាពមួយនេះ។ ទោះជាយ៉ាងនេះក្ដី លោក វរសេនីយ៍ទោ សាន្ត ធី នាយរងការិយាល័យនគរបាលសណ្តាប់ធ្នាប់ នៃស្នងការដ្ឋាននគរបាលខេត្តសៀមរាប លើកឡើងថា “ប៉ូលីសសណ្ដាប់ធ្នាប់ គឺចេះទើស បើយើងមិនចេះទើស មិនមែនប៉ូលីសសណ្ដាប់ធ្នាប់ទេ”។
អញ្ជើញក្នុងកិច្ចពិភាក្សា ក្នុងកម្មវិធីសន្ទនាមតិ របស់មន្ទីរព័ត៌មានខេត្តសៀមរាប នៅថ្ងៃទី២ ខែកុម្ភៈ ឆ្នាំ២០២៣ លើប្រធានបទ «សកម្មភាពអនុវត្តន៍ នៃការរៀបចំសន្តិសុខសណ្តាប់ធ្នាប់ក្នុងខេត្ត» លោក វរសេនីយ៍ទោ សាន្ត ធី បញ្ជាក់ថា សម្រាប់ការិយាល័យនគរបាលសណ្តាប់ធ្នាប់ ពុំមានច្បាប់ចែងពីការអនុវត្តដាក់ពិន័យ ឬដាក់ទោសទណ្ឌ ទៅលើជនល្មើស ដែលបង្កឱ្យមានបញ្ហាសណ្ដាប់ធ្នាប់សាធារណៈនោះនៅឡើយទេ។ ការអនុវត្តរបស់កងកម្លាំងជាក់ស្ដែង គឺយោងទៅតាមសេចក្ដីណែនាំរបស់រដ្ឋបាលខេត្ត រដ្ឋបាលក្រុង លោកស្នងការនគរបាលខេត្ត និងថ្នាក់ដឹកនាំអង្គភាពតែប៉ុណ្ណោះ។
លោក វរសេនីយ៍ទោ បន្ថែមថា ក្រៅពីសេចក្ដីណែនាំរបស់ថ្នាក់ដឺកនាំ កងកម្លាំងនគរបាលសណ្តាប់ធ្នាប់ នៅតែបំពេញតួនាទី ភារកិច្ចរបស់ខ្លួនដោយមិនមានថ្ងៃឈប់សម្រាកឡើយ ដោយពួកគេចុះល្បាតជាប្រចាំនៅតាមគោលដៅសំខាន់ៗទូទាំងក្រុងរួមមាន តំបន់ផាប់ស្ទ្រីត មន្ទីរពេទ្យគន្ធបុប្ផា ចំណតរថយន្តឈ្នួលចុងកៅស៊ូ បណ្ដោយផ្លូវជាតិលេខ៦ ផ្លូវ ៣៨ខ្សែ និងទីតាំងផ្សារសំខាន់ៗ។
លោក វរសេនីយ៍ទោ ក៏បានលើកឡើងផងដែរថា ក្នុងការចុះអនុវត្តនីតិវិធី ថ្នាក់ដឹកនាំ នៃការិយាល័យនគរបាលសណ្តាប់ធ្នាប់ តែងបានជួបប្រជុំ និងណែនាំដល់កងកម្លាំងក្រោមឱវាទត្រូវគោរពវិន័យ ពេលវេលា មានឥរិយាបថសមរម្យទៅកាន់ប្រជាពលរដ្ឋ ក្នុងពេលបំពេញភារកិច្ច និងពន្យល់ដល់ប្រជាពលរដ្ឋពីកិច្ចការសណ្ដាប់នៅតាមទីសាធារណៈ ដោយចៀសវាងការប្រើប្រាស់អាកប្បកិរិយា ឬពាក្យសម្ដីអសុរោះផ្សេងៗ។
ដើម្បីធ្វើឱ្យខេត្តសៀមរាប មានរបៀបរៀបរយ និងសណ្ដាប់ធ្នាប់ល្អ លោក វរសេនីយ៍ទោ សាន្ត ធី បានអំពាវនាវដល់ប្រជាពលរដ្ឋទាំងអស់ គោរព និងអនុវត្តតាមការណែនាំរបស់សមត្ថកិច្ច ក៏ដូចជាសេចក្ដីណែនាំផ្សេងៗរបស់អាជ្ញាធរគ្រប់លំដាប់ថ្នាក់។ ជាពិសេស កងកម្លាំងការិយាល័យនគរបាលសណ្តាប់ធ្នាប់ នឹងរង់ចាំទទួលសេចក្ដីរាយការណ៍ពីប្រជាពលរដ្ឋ ២៤ម៉ោងលើ២៤ម៉ោង ពីបញ្ហាសណ្ដាប់ធ្នាប់ផ្សេងៗ ក្នុងខេត្តសៀមរាប ដើម្បីដោះស្រាយបទល្មើសសណ្ដាប់ធ្នាប់ទាំងនោះជូនប្រជាពលរដ្ឋឱ្យបានទាន់ពេលវេលា។
អត្ថបទ៖ ក្រុមការងារដកស្រង់ព័ត៌មានទូរទស្សន៍
កែសម្រួល៖ លោក សេង ផល្លី
