សភាយុវពាណិជ្ជករអន្តរជាតិកម្ពុជា ខេត្តសៀមរាប ហៅកាត់ថា ចេ ស៊ី អាយ សៀមរាប (JCI SR) នឹងរៀបចំម្មវិធីវនយាត្រាលើកទី៥ ឬហៅថាការដើរព្រៃ ដែលកម្មវីធីនឹងប្រព្រឹត្តទៅនៅថ្ងៃអាទិត្យ ទី០៥ ខែកុម្ភ: ឆ្នាំ២០២៣ ចាប់ពីម៉ោង ៥ព្រឹកព្រលឹមរហូតដល់ម៉ោង ១២ថ្ងៃត្រង់ នៅទីតាំងក្នុងបរិវេណរមណីយដ្ឋានអង្គរខេត្តសៀមរាប។ «វនយាត្រា លើកទី៥» ជាកម្មវិធីសំខាន់ប្រចាំឆ្នាំ២០២៣ ក្រោមគោលបំណងសំខាន់ៗ ចំនួន ៤៖
១. ផ្សារភ្ជាប់ខ្លួនយើងជាមួយនឹងធម្មជាតិឡើងវិញ តាមរយ:ការយល់ដឹងពីសារសំខាន់នៃព្រៃឈើ និងជីវិត។
២. អនុវត្តយោគ: និងបដិបត្តិសមាធិ ដើម្បីបង្កើនថាមពលផ្លូវកាយ និងផ្លូវចិត្តក្នុងព្រៃនៃទីក្រុងអង្គរបុរាណ។
៣. កម្ចាត់ភាពតប់ប្រមល់ ជំងឺស្ត្រេស ជំងឺបាក់ទឹកចិត្ត និងថប់បារម្ភ តាមរយ:ការផ្សារភ្ជាប់ជាមួយធម្មជាតិ។
៤. លើកកម្ពស់ និងចូលរួមផ្សព្វផ្សាយពីសារសំខាន់នៃការដើរព្រៃ ព្រមទាំងសិក្សាឈ្វេងយល់វប្បធម៌ប្រវត្តិសាស្ត្រអង្គរ នៃចក្រភពខ្មែរដ៏រុងរឿងនាអតីតកាល។
នេះបើតាមការបញ្ជាក់ពីលោកវ៉ាត់សាវឿងប្រធានសភាយុវពាណិជ្ជករអន្តរជាតិកម្ពុជា ខេត្តសៀមរាប និងជាសហស្ថាបនិកក្រុមហ៊ុនទេសចរណ៍មរតក អៅដរខេត្ត។ លោក វ៉ាត់ សាវឿង បានឱ្យដឹងទៀតថា៖ កម្មវិធីនេះ នឹងមានការអញ្ជើញចូលរួមពីថ្នាក់ដឹកនាំខេត្ត ថ្នាក់ដឹកនាំអាជ្ញាធរជាតិអប្សរា ថ្នាក់ដឹកនាំជាតិ នៃ ចេ ស៊ី អាយ កម្ពុជា ថ្នាក់ដឹកនាំ និងសមាជិក ចេ ស៊ី អាយ កម្ពុជាខេត្តសៀមរាប ស្ថាប័នពាក់ព័ន្ធ រួមទាំងលោក លោកស្រី ប្រិយមិត្តទូទៅផងដែរ។ ជាពិសេស អ្នកចូលរួមនឹងបានជួបជាមួយអ្នកជំនាញផ្នែកយោគ: សមាធិ ព្រមទាំងអ្នកជំនាញផ្នែកវប្បធម៌ប្រវត្តិសាស្ត្រ លើទឹកដីអង្គរដ៏អស្ចារ្យ។ អ្នកចូលរួមកំណត់ចំនួនត្រឹមតែ ២០០នាក់ប៉ុណ្ណោះសម្រាប់តម្លៃនៃការចូលរួមគឺចុះឈ្មោះជាក្រុមចាប់ពី១០នាក់ឡើងទៅនឹងទទួលបានតម្លៃពិសេស ២៥ដុល្លារក្នុងមួយនាក់ ចុះឈ្មោះមុនគេបង់ថ្លៃ ៣០ដុល្លារ ចុះឈ្មោះធម្មតាត្រូវបង់ថ្លៃ ៣៥ដុល្លារ ជាមួយគ្នានេះ សភាយុវពាណិជ្ជករអន្តរជាតិកម្ពុជាខេត្តសៀមរាប នឹងផ្តល់ជូនអាហារពេលព្រឹក និងថ្ងៃត្រង់ ព្រមទាំងភេសជ្ជ:រួមជាមួយនឹងរថយន្តដឹកជញ្ជូនពីសួនច្បារព្រះរាជដំណាក់ក្រុងសៀមរាប ទៅកាន់ទីតាំងរមណីយដ្ឋានអង្គរផងដែរ៕
ព័ត៌មានជាតិ ថ្មីៗ
អត្ថបទ និងរូបភាព: លោកយូ វង្ស កែសម្រួលដោយលីវ សុខុន!!!
