ព្រះសង្ឃ និងពុទ្ធបរិស័ទ ក៏ដូចជាសិស្សានុសិស្ស លោកគ្រូ អ្នកគ្រូប្រមាណជា៣ពាន់អង្គនាក់ នៅក្រុងសៀមរាប កាលពីរសៀលថ្ងៃទី៥ ខែកុម្ភៈ ឆ្នាំ២០២៣នេះ បានចូលរួមដង្ហែក្បួនប្រារព្ធពិធីបុណ្យមាឃបូជា ដើម្បីបង្ហាញដល់សាធារណ:ជនឲ្យបានដឹងពិធីបុណ្យមាឃបូជា ដែលមានសារៈសំខាន់នៅក្នុងព្រះពុទ្ធសាសនា និងដើម្បីរំលឹកដល់ថ្ងៃដែលព្រះសម្មាសម្ពុទ្ធទ្រង់ប្រកាសបង្កើត ព្រះពុទ្ធសាសនា ឡើងក្នុងលោក ក៍ដូចជាផ្សព្វផ្សាយ ដល់ភ្ញៀវអន្តរជាតិឲ្យបានស្គាល់កាន់តែច្បាស់ ពីតម្លៃរបស់ព្រះសម្មាសម្ពុទ្ធ។ ការដង្ហែរក្បួនដោយថ្មើរជើងនៃប្រារព្ធពិធីបុណ្យមាឃបូជានេះ រៀបចំឡើងដោយព្រះចៅអធិការវត្ដដំណាក់ និងបានដង្ហែរចេញពីវត្តដំណាក់ ក្នុងសង្កាត់សាលាកំរើក ឆ្ពោះទៅកាន់ផ្លូវតាមស្ទឹងសៀមរាប និងតាមបណ្ដាផ្លូវសំខាន់ៗមួយចំនួនទៀតនៅតំបន់ផប់ស្រ្តីតផ្សារចាស់។
ក្រុមយុវជនដែលបានចូលរួមបានលើកឡើងថា ពិធីបុណ្យមាឃបូជា ជាពិធីបុណ្យជាតិមួយដ៍សំខាន់សម្រាប់ប្រជាពលរដ្ឋខ្មែរដែលកាន់សាសនាព្រះពុទ្ធ។ ពិធីនេះ ត្រូវបានធ្វើឡើងជារៀងរាល់ឆ្នាំ ប៉ុន្ដែដោយសារវបត្ដិជាសកលនៃជំងឺកូវីដ១៩ បណ្ដាលឱ្យបាត់ឱកាសជួបជុំគ្នាធ្វើបុណ្យអស់រយៈពេល២ឆ្នាំ ដោយគ្រាន់តែជួបជុំគ្នាមានលក្ខណៈទ្រទ្រាយតូចប៉ុណ្ណោះ។ ពួកគាត់បានបន្ដថា ក្រោយពីរាជរដ្ឋាភិបាលយកចិត្ដទុកដាក់ចាក់វ៉ាក់សាំងជំងឺកូវីដ១៩ ដល់ប្រជាពលរដ្ឋ ហើយមានភាពធូរស្រាលរួចមក ទើបប្រជាពលរដ្ឋមានឱកាសជួបជុំគ្នាធ្វើបុណ្យឡើងវិញ ដែលនេះបង្ហាញពីសុខសន្ដិភាពរបស់ប្រទេសកម្ពុជា ។ ពួកគាត់បានប្ដេជ្ញាចូលរួមថែរក្សាវប្បធម៌ព្រះពុទ្ធសាសនាឱ្យកាន់តែរីកចំរើន និងគង់វង្សជាអមតៈ ព្រោះព្រះពុទ្ធសាសនា មិនត្រឹមតែបានធ្វើឱ្យបងប្អូនប្រជាពលរដ្ឋយើងបានរួមរស់ជាមួយគ្នាដោយសុខសាន្តខាងផ្លូវស្មារតីប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់នៅក្នុងការពង្រឹងសណ្ដាប់ធ្នាប់ សុខសន្តិភាព ស្ថិរភាពសង្គម ការអភិវឌ្ឍលើគ្រប់វិស័យ និងថែរក្សាការពារអត្តសញ្ញាណជាតិទៀតផង។
យោងតាមគម្ពីធម៌របស់ព្រះសម្មាសម្ពុទ្ធ បានបង្ហាញថា មាឃបូជា ជាពីធីបុណ្យមួយដែលមានសារៈសំខាន់នៅក្នុងព្រះពុទ្ធសាសនា ដែលរួមពិធីបុណ្យមាន: មាឃបូជា ពិសាខបូជា អាសាឍបូជា និងបុណ្យបវារណា (ចេញវស្សា) ។ បុណ្យមាឃបូជាប្រារព្ធឡើង ដើម្បីរំលឹកដល់ថៃ្ង ដែលព្រះសម្មាសម្ពុទ្ធ ទ្រង់ប្រកាសបង្កើតព្រះពុទ្ធសាសនាឡើងក្នុងលោក នាប្រទេសឥណ្ឌា កាលពី៥៨៨ឆ្នាំមុនគ្រិស្តសករាជ នាថៃ្ងទី១៥កើត ខែមាឃ ក្រោយពីការត្រាស់ដឹងរបស់ព្រះអង្គចំនួន៩ខែគត់៕
អត្ថបទ និង រូបភាព ៖ បូ សាវី
ព័ត៌មានជាតិ ថ្មីៗ
