សភាយុវពាណិជ្ជករអន្តរជាតិកម្ពុជានិងសភាយុវពាណិជ្ជករកម្ពុជាសាសៀមរាប ហៅកាត់ថា (JCI ) បានការសហការគាំទ្រពីរដ្ឋបាលខេត្តនិងអាជ្ញាធរជាតិអប្សរា បានរៀបចំម្មវិធីវនយាត្រាលើកទី៥ ឬហៅថាការដើរព្រៃ ចាប់ពីម៉ោង៥ព្រឹកព្រលឹមរហូតដល់ម៉ោង១២ថ្ងៃត្រង់ ថ្ងៃទី៥ខែកុម្ភៈ ឆ្នាំ២០២៣។
កម្មវិធីនេះមានការអញ្ជើញចូលរួមពីថ្នាក់ដឹកនាំខេត្ត ថ្នាក់ដឹកនាំអាជ្ញាធរជាតិអប្សរា ថ្នាក់ដឹកនាំជាតិនៃ ចេ ស៊ី អាយ កម្ពុជា ថ្នាក់ដឹកនាំ និងសមាជិក ចេ ស៊ី អាយ កម្ពុជា ខេត្តសៀមរាប ស្ថាប័នពាក់ព័ន្ធ រួមទាំងមហាជនទូទៅផងដែរ។ កម្មវិធីដើរព្រៃលើកទី៥ នេះមានអ្នកចូលរួមជាង១០០នាក់ និងអ្នកជំនាញផ្នែកយោគៈ សមាធិ ព្រមទាំងអ្នកជំនាញ ផ្នែកវប្បធម៌ ប្រវត្តិសាស្ត្រ ណែនាំ និងពន្យល់ប្រាប់អំពីវិធីធ្វើចិត្តឱ្យស្ងប់តាមរយៈការសមាធិរយៈពេលខ្លី បានស្តាប់ប្រវត្តិរឿងរ៉ាវរបស់ប្រាសាទ និងភូមិសាស្ត្រខ្លះៗ ដែលក្រុមគាត់ដើរចំ។ ដំណើរដើរព្រៃ ឬវនយាត្រា ជាមួយនឹងការធ្វើយោគៈសមាធិ លើកនេះ គឺបានចាប់ផ្តើមពីខ្លោងទ្វារទន្លេអុំ ឆ្ពោះទៅច្រកចេញនៃខ្លោងទ្វារប្រាសាទព្រះខាន់ ក្នុងតំបន់រមណីយដ្ឋានអង្គរខេត្តសៀមរាប។
លោកវ៉ាត់ សាវឿង ប្រធានសភាយុវពាណិជ្ជករអន្តរជាតិកម្ពុជាសាខាសៀមរាប និងជាសហស្ថាបនិកក្រុមហ៊ុនទេសចរណ៍ មរតក អៅដរ ខេត្ត ពន្យល់ថា៖ ការធ្វើសមាធិ ឬវិធីយោគៈ ជាការសំយោគគ្នា រវាងចិត្តនិងកាយ គំនិត និងសកម្មភាព ភាពអត់ធ្មត់ និងការពេញចិត្ត ភាពសុខដុមរមនា រវាងមនុស្ស និងធម្មជាតិ ដែលជាវិធីសាស្ត្រដ៏បរិសុទ្ធ ចំពោះសុខុមាលភាពរាងការនិងផ្លូវអារម្មណ៍។ដូចគ្នាដែរ « វនយាត្រា លើកទី៥ » ជាកម្មវិធីសំខាន់ប្រចាំ២០២៣ ក្រោមគោលបំណងសំខាន់ៗ ចំនួន ៤៖
១. ផ្សារភ្ជាប់ខ្លួនយើងជាមួយនឹងធម្មជាតិឡើងវិញ តាមរយៈការយល់ដឹងពីសារៈសំខាន់នៃព្រៃឈើនិងជីវិត។
២. អនុវត្តយោគៈ និងបដិបត្តិសមាធិដើម្បីបង្កើនថាមពលផ្លូវកាយនិងផ្លូវចិត្តក្នុងព្រៃនៃទីក្រុងអង្គរបុរាណ។
៣. កម្ចាត់ភាពតប់ប្រមល់ ជំងឺស្ត្រេស ជំងឺបាក់ទឹកចិត្តនិងថប់បារម្ភ តាមរយៈការផ្សារភ្ជាប់ជាមួយធម្មជាតិ។
៤. លើកកម្ពស់ និងចូលរួមផ្សព្វផ្សាយពីសារៈសំខាន់នៃការដើរព្រៃ ព្រមទាំងសិក្សាឈ្វេងយល់វប្បធម៌ប្រវត្តិសាស្ត្រ អង្គរនៃចក្រភពខ្មែរដ៏រុងរឿងនាអតីតកាល៕
អត្ថបទ និង រូបភាព ៖ យូ វង្ស
