គិតត្រឹមឆ្នាំ២០២២ ករណីគ្រោះអគ្គីភ័យកើតឡើងក្នុងខេត្តសៀមរាប មានចំនួនសរុប ៣០ករណី បើធៀបនឹងឆ្នាំ២០២១ មានសរុបចំនួន ៥១ករណី ថយចុះប្រមាណ៤១ភាគរយ នេះបើតាមការឱ្យដឹងពី លោកវរសេនីយ៍ទោ អ៊ុន ភិរម្យ នាយរងការិយាល័យបង្ការពន្លត់អគ្គីភ័យ និងសង្គ្រោះ នៃស្នងការដ្ឋាននគរបាលខេត្តសៀមរាប នៅក្នុងកម្មវិធីសន្ទនាមតិ ក្រោមកិច្ចពិភ្សាលើប្រធានបទ “វិធានការត្រៀមបង្ការនិងទប់ស្កាត់គ្រោះអគ្គីភ័យ” របស់មន្ទីព័ត៍មានខេត្តសៀមរាប នៅថ្ងៃទី៧ ខែកុម្ភៈ ឆ្នាំ២០២៣។
លោកវរសេនីយ៍ទោ អ៊ុន ភិរម្យ បានបញ្ជាក់ថា ការថយចុះករណីគ្រោះអគ្គីភ័យក្នុងខេត្តនេះ ដោយសារម្ចាស់អាជីវកម្មភាគច្រើន និងប្រជាពលរដ្ឋមួយចំនួន មានបំពង់ពន្លត់អគ្គីភ័យ មានប្រព័ន្ធទឹកបង្ការ និង ប្រព័ន្ធពន្លត់អគ្គីភ័យដោយស្វ័យប្រវត្តិ។ ចំពោះករណីគ្រោះអគ្គីភ័យនៅឆ្នាំ២០២២នេះដែរ មិនមានអ្នកបាត់បង់ជីវិតនោះទេ។
ព័ត៌មានជាតិ ថ្មីៗ
លោកវរសេនីយ៍ទោ បង្ហាញថា តាមការស្រាវជ្រាវ មូលហេតុដែល តែងបង្កឱ្យកើតមានករណីអគ្គីភ័យខ្វះបច្ចេកទេសតភ្ជាប់ចរន្តអគ្គិសនី ការយកឃ្មុំដោយប្រើភ្លើង និងអាកាសធាតុក្ដៅ។ ករណីខាងលើ កន្លងមកការិយាល័យពន្លត់អគ្គីភ័យ អាជ្ងាធរ កម្លាំងអង្គភាពក្នុងខេត្តសៀមរាប តែងតែបានចុះផ្សព្វផ្សាយសេចក្តីណែនាំរបស់ស្នងការនរគបាលខេត្ត ស្តីពីការពន្លត់អគ្គីភ័យនៅតាមទីប្រជុំជន និងផ្សព្វផ្សាយបន្ថែមនៅតាមអធិការដ្ឋាននគរបាលនៃបណ្តាក្រុង ស្រុកទាំង១២ ដោយមានការសហការជាមួយអាជីវកម្ម រោងចក្រសហគ្រាស សណ្ឋាគារ ចូលរួមរៀនពីវិធានការពន្លត់អគ្គីភ័យដល់ពួកគាត់ផងដែរ។
លោកវរសេនីយ៍ទោ បន្ថែមថា កម្លាំងមន្រ្តីជំនាញតែងតែប្រចាំការ និងរង់ចាំប្រជាពលរដ្ឋរាយការណ៍ពីករណីគ្រោះអគ្គីភ័យនៅទូទាំងខេត្ត ២៤ម៉ោង លើ ២៤ម៉ោង ដោយមិនគិតថ្ងៃឈប់សម្រាក ឬ ថ្ងៃបុណ្យទាន និងមិនគិតកម្រៃសេវាអ្វីទាំងអស់។ កន្លងមក ចំពោះករណីអគ្គីភ័យធំៗ ក្រៅពីកម្លាំងនៃការិយាល័យបង្ការពន្លត់អគ្គីភ័យ និងសង្គ្រោះ យើងក៏មានកិច្ចសហការជាមួយអាជ្ញាធរជាតិអប្សរា ព្រលានយន្តហោះអន្តរជាតិសៀមរាប នឹងនរគបាលបេតិកភណ្ឌផងដែរ។
លោកវរសេនីយ៍ទោ អ៊ុន ភិរម្យ ក៏បានអំពាវនាវដល់ប្រជាពល់រដ្ឋត្រូវប្រញាប់រាយការណ៍ពីគ្រោះអគ្គីភ័យ មិនថាតូច ឬធំ ដើម្បីឱ្យអាជ្ញាធរសមត្ថកិច្ច ជួយសង្គ្រោះបានទាន់ពេលវេលា និងជួយបើកផ្លូវដល់រថយន្តពន្លត់អគ្គីភ័យ ពេលលឺសំឡេងស៊ីរ៉ែន។
អត្ថបទ៖ ក្រុមព័ត៌មានទូរទស្សន៍
កែសម្រួល៖ លោក សេង ផល្លី
