ក្រោមការគាំទ្រពីនាយកដ្ឋានអតីតយុទ្ធជន និងសុខុមាលភាពមនុស្សចាស់ នៃក្រសួងសង្គមកិច្ច អតីតយុទ្ធជន និងយុវនីតិសម្បទានិង រដ្ឋបាលខេត្តសៀមរាប អង្គការមនុស្សចាស់កម្ពុជា បានរៀបចំសិក្ខាសាលាស្តីពីការឆ្លុះបញ្ចាំង និងការរៀបចំផែនការសកម្មភាព ចាប់ពីថ្ងៃទី៧ ដល់ទី៨ ខែកុម្ភៈ ឆ្នាំ២០២៣នៅខេត្តសៀមរាប ដែលមានសិក្ខាកាម ជាមន្ត្រីមន្ទីរ និងតំណាងពីមន្ទីរសង្គមកិច្ច មកពីរាជធានី-ខេត្តចំនួន ៨ រួមមាន ខេត្តបាត់ដំបង បន្ទាយមានជ័យ សៀមរាប កំពង់ធំ ត្បូងឃ្មុំ ព្រៃវែង ស្វាយរៀង និងភ្នំពេញ។
សិក្ខាសាលារយៈពេល២ថ្ងៃនេះ មានគោលបំណង ធ្វើការឆ្លុះបញ្ចាំង និងចែករំលែកអំពីបទពិសោធន៍នៃការអនុវត្តការងារ ព្រមទាំងកិច្ចសហការក្នុងភាពជាដៃគូរនាពេលកន្លងមកក្នុងក្របខ័ណ្ឌគម្រោង និងដើម្បីរៀបចំផែនការសកម្មភាពបន្តក្នុងឆ្នាំ២០២៣ បន្ទាប់ពីកិច្ចសហការ អនុវត្តន៍គម្រោងរយៈពេលមួយឆ្នាំកន្លងមកនេះ សម្រេចបាននូវលទ្ធផលការងារជាច្រើន ជាពិសេសទៅលើការរៀបចំ និងពង្រឹងសមាគមមនុស្សចាស់ នៅក្នុងតំបន់គោលដៅរបស់គម្រោង ឱ្យក្លាយទៅជាសមាគមដែលមានលក្ខណៈអន្តរជំនាន់ សកម្ម និងពហុមុខងារ ក្នុងការជួយគាំទ្រទៅដល់មនុស្សចាស់ និងសហគមន៍របស់ពួកគាត់នៅតាមមូលដ្ឋាន ដែលស្របទៅចក្ខុវិស័យ ក៏ដូចជាផែនការសកម្មភាព និងអាទិភាពនៅក្នុងគោលនយោបាយជាតិស្តីពីមនុស្សវ័យចាស់ ឆ្នាំ២០១៧-២០៣០។
ព័ត៌មានជាតិ ថ្មីៗ
លោក ទុំ វីរ៉ា នាយកប្រតិបត្តិនៃអង្គការមនុស្សចាស់កម្ពុជា បានរម្លឹកថា៖ តាមរយៈមូលនិធិគាំទ្រពី ក្រសួងសហព័ន្ធសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ប្រទេសអាល្លឺម៉ង់ និងកម្មវិធីវ៉យ(Voice) អង្គការមនុស្សចាស់កម្ពុជា បានចាប់ផ្តើមដំណើរ និងអនុវត្តគម្រោង ដែលផ្តោតទៅលើ “ការរៀបចំគម្រូសហគមន៍អន្តរជំនាន់ ដើម្បីជីវិតថ្លៃថ្នូររបស់មនុស្សវ័យចាស់កម្ពុជា និងការអភិវឌ្ឍប្រកបដោយនិរន្តរភាព” សំដៅអភិវឌ្ឍបទដ្ឋានសមាគមមនុស្សចាស់មួយដែលមានភាពសកម្មជាងមុន មានការចូលរួមអន្តរជំនាន់ ដើម្បីចូលរួមចំណែកបន្ថែមធ្វើឲ្យប្រសើរឡើងនូវស្ថានភាពសុខភាព ការថែទាំ សន្ដិសុខចំណូល និងពង្រឹងសិទ្ធិ និងការចូលរួមរបស់មនុស្សវ័យចាស់ និងជនងាយរងគ្រោះក្នុងសហគមន៍ប្រកបដោយបរិយាបន្ន និងនិរន្តរភាព ដោយមានកិច្ចសហការយ៉ាងជិតស្និទ្ធិជាមួយក្រសួង និងមន្ទីរសង្គមកិច្ច អតីតយុទ្ធជន និងយុវនីតិសម្បទា និងអាជ្ញាធរពាក់ព័ន្ធនៅគ្រប់កម្រិត ព្រមទាំងដៃគូរនានានៅក្នុងរាជធានីខេត្តគោលដៅទាំង៨។
លោក ស្មៀន ប៊ុនធឿន នាយករងរដ្ឋបាល នៃសាលាខេត្តសៀមរាប លើកឡើងថា៖ ក្នុងសង្គមកម្ពុជា មនុស្សចាស់បានដើរតួនាទីយ៉ាងសំខាន់ក្នុងការ ផ្តល់ការអប់រំសីលធម៌ ចរិយាធម៌ គុណធម៌ ចាប់តាំងពីកុមាររហូតដល់មនុស្សគ្រប់វ័យគ្រប់ៗរូប ដែលជាការរួមចំណែកដ៏មានសារៈសំខាន់ទៅនឹងការអភិវឌ្ឍរបស់មូលដ្ឋាន និងសង្គមជាតិ ខណៈពេលដែលមនុស្សចាស់ជាជនងាយរងគ្រោះ គាត់ត្រូវរងបន្ទុកបន្ថែមនៃកិច្ចការក្នុងគ្រួសារ ការថែទាំសមាជិកគ្រួសារ ចៅ និងការងារជាច្រើនទៀត ដែលទាំងនេះជាបន្ទុកទ្វេរដងសម្រាប់គាត់។ លោកបន្ថែមថា ជាមួយនោះ រាជរដ្ឋាភិបាលក៏បានបង្កើតឱ្យមានអនុគណៈកម្មាធិការកម្ពុជា ដើម្បីមនុស្សចាស់នៅតាមរាជធានី ខេត្ដ ដែលមានអភិបាលនៃគណៈអភិបាលខេត្ត ជាប្រធានកិត្តិយស និងអភិបាលរងខេត្ត ជាប្រធាន ព្រមទាំងប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ជាអនុប្រធានចិន្ត្រៃយ៌។ ពាក់ព័ន្ធនឹងវិស័យសុខុមាលភាពមនុស្សចាស់ ខេត្តសៀមរាប បានផ្តល់អាទិភាពទៅលើវិស័យនេះ និងត្រូវបានយកចិត្តទុកដាក់ក្នុងចំណោមវិស័យអាទិភាពផ្សេងៗទៀត។
លោក គុណ ជាស៊ីន ប្រធាននាយកដ្ឋានអតីតយុទ្ធជន និងសុខុមាលភាពមនុស្សចាស់ បានអំពាវនាវដល់មន្ទីរសង្គមកិច្ច រាជធានីខេត្តដែលបានចូលរួមក្នុងសិក្ខាសាលានេះ សូមជំរុញការរៀបចំប្រជុំអនុគណៈកម្មការដើម្បីមនុស្សចាស់ ខណៈដែលខាងមន្ទីរសង្គមកិច្ចខេត្តបន្ទាយមានជ័យ និងខេត្តស្វាយរៀងបានធ្វើរួចហើយ និងសូមលើកទឹកចិត្តដល់បងប្អូនទាំងអស់គ្នាគិតពីសុខភាព ជាពិសេសក្នុងវ័យចាស់ ទាំងការទទួលទាន ការថែទាំសុខភាព ដើម្បីក្លាយទៅជាមនុស្សចាស់ដែលមានគុណភាព។
អត្ថបទ និងរូបភាព៖ លោក ជា ស្រស់ និងលោក យូ វង្ស
កែសម្រួល៖ លោក សេង ផល្លី
