បើយោងទៅលើការសិក្សា បានបង្ហាញថា សំណល់ប្លាស្ទិកនៅក្នុងពិភពលោកក្នុងពេលបច្ចុប្បន្ន មានប្រមាណ១២ប៊ីលានតោន និងអាចកើនឡើងដល់៣៤ប៊ីលានតោននាពេលខាងមុខ បើសិនជាមិនមានការទប់ស្កាត់។ បរិមាណសំណល់ប្លាស្ទិកនេះ វាច្រើនជាងបរិមាណត្រីនៅក្នុងមហាសមុទ្រទៅទៀត នេះបើតាមប្រសាសន៍របស់ ឯកឧត្តម នេត្រ ភក្ដ្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ក្រោយពិធីបើកវេទិកាថ្នាក់តំបន់អាស៊ីនិងប៉ាស៊ីហ្វិកស្ដីពី 3R និងសេដ្ឋកិច្ចចក្រា ថ្ងៃទី៨ ខែកុម្ភៈ ឆ្នាំ២០២៣ នៅសណ្ឋាគារសុខាសៀមរាប។
ឯកឧត្តម នេត្រ ភក្រ្តា បន្តថា គោលការណ៍3R នេះ បានសំដៅជារួមលើការកាត់បន្ថយសម្ពាធលើធនធានធម្មជាតិ ដែលជាផ្នែកមួយនៃទុនសម្រាប់ការយកមកផលិត ឬប្រើប្រាស់ ធ្វើយ៉ាងណាឲ្យសង្គមគ្មានកាកសំណល់ ជាពិសេសសំណល់ប្លាស្ទិក។ ជាមួយគ្នានេះ វេទិកា3R ក៏ត្រូវបានគេរំពឹងថា ជាមូលដ្ឋាននៃការពិភាក្សា រៀបចំសេចក្តីព្រៀងសេចក្តីថ្លែងការណ៍ទីក្រុងហាណូយស្តីពី3R និងសេដ្ឋកិច្ចចក្រាដែលនឹងត្រូវរៀបចំក្នុងរយៈពេល១០ឆ្នាំ ពីឆ្នាំ២០២៤ដល់២០៣៤។ ការរៀបចំនេះ គេត្រូវគិតថាត្រូវធ្វើយ៉ាងណាដើម្បីកាត់បន្ថយសម្ពាធភពផែនដី គ្រប់គ្រងសំណល់ គ្រប់គ្រងការបំពុលផ្សេងៗឆ្ពោះទៅរកការសម្រេចបាននូវចក្ខុវិស័យធ្វើអព្យាក្រឹត្យកាបូនឆ្នាំ២០៥០។
ដោយឡែក ថ្លែងនៅក្នុងពិធីបើកវេទិកានេះ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានលើកឡើងថា វេទិកានៅឆ្នាំនេះ យើងនឹងពិភាក្សាគ្នា រវាងបណ្ដាប្រទេសនៅតំបន់អាស៊ី និងប៉ាស៊ីហ្វិក និងសាមគ្គីគ្នា ដើម្បីធ្វើយ៉ាងណា ឱ្យសង្គមនៅក្នុងតំបន់នោះ គ្មានសំណល់ និងបរិស្ថានឱ្យមានភាពប្រសើរឡើង។
ឯកឧត្តម រដ្ឋមន្ត្រី បន្ថែមថា វេទិកានេះ នឹងចែករំលែកមេរៀន និងការអនុវត្តល្អបំផុត ដើម្បីឆ្លើយតបទៅនឹងកាលៈទេសៈ និងអាទិភាពដែលកំពុងកើតឡើង និងធានាបាននូវបរិស្ថានល្អ ធន់នឹងអាកាសធាតុ និងកំណើនសេដ្ឋកិច្ចនៅក្នុងតំបន់។ ទន្ទឹមនោះ លទ្ធផលដែលទទួលបានពីវេទិកានេះ នឹងនាំមកនូវវិធីសាស្រ្តផ្លាស់ប្តូរ ក្នុងការលើកកម្ពស់ការគ្រប់គ្រងការបំពុល និងកាកសំណល់ សន្ទុះនៃធនធាន និងការបង្កើតឡើងវិញនូវធម្មជាតិ និងការសម្រេចបាននូវ Zero Waste Societies និង SDGs។ ឯកឧត្ដមបញ្ជាក់ថា អ្វីដែលយើងពិតជាត្រូវការគឺសាមគ្គីភាពជាសកល កិច្ចសហប្រតិបត្តិការកាន់តែជិតស្និទ្ធ និងភាពជាដៃគូ និងការផ្ទេរបច្ចេកវិទ្យាកាន់តែមានប្រសិទ្ធភាព ជាពិសេសពីប្រទេសដែលមានសេដ្ឋកិច្ចជឿនលឿនទៅកាន់ប្រទេសអភិវឌ្ឍន៍តិចតួច ប្រសិនបើយើងចង់ដោះស្រាយបញ្ហាសកលដែលកំពុងកើតមានជាបន្តបន្ទាប់ និងសង្គ្រោះភពផែនដីរបស់យើង៕
អត្ថបទ និងរូបភាព៖ លោក ជា ស្រស់ និងលោក បូ សាវី
កែសម្រួល៖ លោក សេង ផល្លី
