គម្រោងលើកកម្ពស់ជីវភាពប្រជាជនក្រីក្រ(លាភ) តែងតែបានចូលរួមយ៉ាងសកម្ម ក្នុងកិច្ចសហការតាមរយ:ការបញ្ជូនយុវជនក្រីក្រ និងងាយរងគ្រោះមកពីសហគមន៍នានា ដើម្បីមកទទួលបានការបណ្តុះបណ្តាលជំនាញវិជ្ជាជីវ: ជាមួយអង្គការជីវិតនៅកម្ពុជា ចាប់តាំងពីឆ្នាំ២០២០ មកម្ល៉េះ។ លោក សុខ ថុល អភិបាលរងខេត្ត និងជាប្រធានគ្រប់គ្រងគម្រោងលាភ បានថ្លែងក្នុងពិធីសម្ពោធមជ្ឈមណ្ឌលបណ្ដុះបណ្តាលជំនាញវិជ្ជាជីវ: និងប្រគល់វិញ្ញាបនបត្រ បញ្ជាក់ការសិក្សាដល់សិក្ខាកាមជំនាញជួសជុលម៉ូតូ និងកាត់ដេរសំលៀកបំពាក់ ស្ថិតនៅភូមិក្រួស សង្កាត់ស្វាយដង្គំ ក្រុងសៀមរាប ខេត្តសៀមរាប នាព្រឹកថ្ងៃទី០៩ ខែកុម្ភ: ឆ្នាំ២០២៣នេះ។
លោក បានបង្ហាញថា អង្គការជីវិតនៅកម្ពុជា ខេត្តសៀមរាបនេះ គឺមានការខិតខំប្រឹងប្រែង និងការជួយគាំទ្រដល់ក្រុមគ្រួសារក្រីក្រ និងងាយរងគ្រោះ ដើម្បីទទួលបានឧត្តមប្រយោជន៍របស់ពួកគាត់។ ក្នុងនោះដែរ គម្រោងលាភ បានបញ្ជូនសិក្ខាកាមសរុបចំនួន ៨៣នាក់ហើយឲ្យមកទទួលបានការបណ្តុះបណ្តាលជំនាញជួសជុលម៉ូតូ ជាមួយអង្គការជីវិតនៅកម្ពុជា។
ពួកគាត់បាន បញ្ចប់វគ្គបណ្តុះបណ្តាលជំនាញ ជួសជុលម៉ូតូចំនួន ៦៤នាក់ ហើយសិក្ខាកាមមួយចំនួន បានបើកមុខរបរជួសជុលម៉ូតូ និងខ្លះទៀតទទួលបានការងារផ្សេងៗផងដែរ។ បច្ចុប្បន្នមានសិក្ខាកាមចំនួន ១១នាក់ កំពុងត្រៀមចេញហាត់ការងារជាមួយសហគ្រាសដៃគូ ដើម្បីពង្រឹងសមត្ថភាព និងការអនុវត្តជាក់ស្តែង។ កម្មវិធីនេះបានផ្ដល់ឱកាសដល់យុវជន ដែលបានបោះបង់ការសិក្សានោះឱ្យមកទទួលការបណ្តុះបណ្តាលជំនាញវិជ្ជាជីវ:ដែលមានដូចជាជំនាញជួសជុលម៉ូតូ ជួសជុលម៉ូទ័រគ្រប់ប្រភេទ និងកាត់ដេរសម្លៀកបំពាក់ ដើម្បីជាជំនាញសម្រាប់ចិញ្ចឹមជីវិតនៅថ្ងៃអនាគត។ ជាក់ស្តែង សិក្ខាកាមទាំង ៤១ នាក់ ដែលបានបញ្ចប់វគ្គបណ្តុះបណ្តាលជំនាញជួសជុលម៉ូតូ និងដែលបានចូលរួមទទួលវិញ្ញាបនបត្របញ្ជាក់ការសិក្សា យើងត្រូវបន្តខិតខំប្រឹងប្រែងយកចំណេះ ជំនាញទាំងនេះទៅប្រើប្រាស់ ដើម្បីពង្រឹងសេដ្ឋកិច្ចគ្រួសារ និងសង្គមជាតិ ស្របតាមទិសដៅអភិវឌ្ឍសេដ្ឋកិច្ចកម្ពុជា ក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសដែលមានចំណូលខ្ពស់នៅឆ្នាំ២០៥០។
លោក ឈិន សែ នាយករងអង្គការជីវិតនៅកម្ពុជា បានលើកឡើងថា បច្ចប្បន្នអង្គការយើងកំពុងអនុវត្តកម្មវិធីចម្បងៗចំនួន ៩ជំនាញ ដែលពាក់ព័ន្ធនឹងវិស័យអប់រំ និងបណ្តុះបណ្តាលវិជ្ជាជីវ: ក្នុងការបញ្ឈប់អំពើហិង្សា គាំទ្រដល់ អនីតិជន និងកុមារក្នុងសហគមន៍ ដែលមានឪពុក ឬម្តាយជាប់ពន្ធនាគារ និងបង្រួបបង្រួមកុមារពីមណ្ឌលថែទាំទៅសហគមន៍វិញជាដើម។ គម្រោងបណ្តុះបណ្តាលវិជ្ជាជីវ:បានបង្កើតឡើងនៅឆ្នាំ២០១៥ បច្ចុប្បន្នមជ្ឈមណ្ឌលបណ្ដុះបណ្តាលវិជ្ជាជីវ:មានការផ្តល់វគ្គបណ្តុះបណ្តាលជំនាញដូចជាជួសជុលម៉ូតូ ជួសជុលម៉ូទ័រគ្រប់ប្រភេទ កាត់ដេរសម្លៀកបំពាក់បុរស-នារី ។ លើសពីនេះការអប់រំបំណិនជីវិត, កីឡា,ដាំបន្លែ,ដាំផ្កាការប្រឹក្សាយោបល់ការស្វែងរកការងារធ្វើ និងគាំទ្រលើការបើកមុខរបរខ្នាតតូច ។ ក្នុងការពេលតែមួយគម្រោងផ្តល់សេវាកម្មជាបទពិសោធន៍ធ្វើការជាមួយអតិថិជន ។ លោក បានបន្តទៀតថា ចាប់ពីឆ្នាំ២០១៥ រហូតមកដល់បច្ចុប្បន្ននេះ គម្រោងបានផ្តល់ការបណ្តុះបណ្តាលបញ្ចប់ដោយជោគជ័យនូវជំនាញជួសជុសម៉ូតូ បានចំនួន ១២០នាក់ បើកមុខរបរជួសជុលម៉ូតូចំនួន ៣៤នាក់ មានការងារធ្វើផ្សេងចំនួន ៨៦នាក់។ ហើយសិស្សចំនួន ៣៥នាក់ទៀត កំពុងទទួលការបណ្តុះបណ្តាលលើជំនាញទាំង ៣ខាងលើនេះ។ ចំពោះសិស្សដែលបានបញ្ចប់វគ្គបណ្តុះបណ្តាលជំនាញជួសជុលម៉ូតូនាពេលនេះចំនួន ៤១នាក់ ដែលបានបញ្ចប់ការសិក្សាដោយជោគជ័យ និងទទួលវិញ្ញាបនបត្របញ្ជាក់ការសិក្សាផងដែរ៕
អត្ថបទ និងរូបភាព: លោកស៊ាន សុផាត កែសម្រួលដោយ លីវ សុខុន!!!
