នៅល្ងាចថ្ងៃទី៩ ខែកុម្ភៈ ឆ្នាំ២០២៣ នៅក្នុងបរិវេណវត្តទេពពោធិវង្ស ហៅវត្តថ្មី ស្ថិតនៅភូមិត្រពាំងសេះ សង្កាត់គោកចក ក្រុងសៀមរាប មានរៀបចំពិធីពុទ្ធាភិសេក ព្រះពុទ្ធបដិមា កម្ពស់ ៣.៦ម៉ែត្រ និង រូបខ្លាមួយគូរ ធ្វើឡើងពីថ្ម ដែលជាសទ្ធាជ្រះថ្លារបស់ឯកឧត្តម ឧត្តមសេនីយ៍ឯក បណ្ឌិត ធន វិមានច័ន្ទ នាយករងនាយកដ្ឋានវិស្វកម្ម ក្រសួងការពារជាតិ និងជាមេបញ្ជាការអង្គភាពវិស្វកម្មសម្តេចអគ្គមហាធម្មពោធិសាល ជា ស៊ីម។
អត្ថន័យ នៃព្រះពុទ្ធបដិមា ទ្រង់ព្រះសណ្ឋិត(ឈរ) ) ព្រះហស្តស្ដាំរាទៅមុខ ព្រះហស្តឆ្វេងទម្លាក់ចុះ ជាឥរិយាបទនៃការឱ្យអភ័យដល់សព្វសត្វ ដែលជានិមិត្តនៃការបៀតបៀនគ្នា និងរក្សានូវសុខសន្តិភាព។
ព័ត៌មានជាតិ ថ្មីៗ
ព្រះវិជ័យរង្សី បណ្ឌិត ឡាច លាង ព្រះធម្មធរគណខេត្ត និងជាព្រះអនុគណក្រុងសៀមរាប មានសង្ឃដីកាថា៖ ព្រះពុទ្ឋបដិមា និងរូបសត្វខ្លាមួយគូនេះ ជាសមិទ្ឋផលថ្មីមួយទៀត និងបង្ហាញពីសទ្ឋាជ្រះថ្លារបស់ ឯកឧត្តម ធន វិមានច័ន្ទ និងក្រុមការងារចុះជួយមូលដ្ឋានខេត្តសៀមរាប សម្រាប់ការគោរពបូជាព្រះពុទ្ឋសាសនាកាន់តែមានភាពយូរអង្វែងទៅមុខ។ ព្រះអង្គបន្តថា៖ ការកសាងព្រះពុទ្ធបដិមា តាងព្រះបរមរូប នៃព្រះសម្មាសម្ពុទ្ធជាម្ចាស់កើតមានតាំងពីសម័យពុទ្ធកាល ម៉្លេះព្រះពុទ្ឋជាម្ចាស់នៃយើង ព្រះអង្គទ្រង់ត្រាស់សម្ដែងសរសើរអំពីអានិសង្ស នៃការជួសជុល និងការកសាងព្រះពុទ្ធរូប ដែលត្រូវបានទទួលផល យ៉ាងច្រើនជាអនេកប្បការ។
ព្រះតេជគុណ បន្ថែមថា៖ ព្រះពុទ្ធសាសនា បានផ្តល់នូវគុណប្រយោជន៍មិនអាចកាត់ថ្លៃបាន ដល់មនុស្សជាតិ ដែលយល់ និងគោរពប្រណិប័តនូវឱវាទរបស់ព្រះអង្គ ដូចជាជួយឱ្យមនុស្សមានសេចក្តីសុខស្ងប់ខាងផ្លូវចិត្ត ធ្វើឱ្យមានសុខភាពផ្លូវចិត្តល្អរឹងមាំ និងនាំឱ្យសុខភាពរាងកាយរបស់បុគ្គលល្អផងដែរ ព្រោះសុខភាពកាយអាស្រ័យនឹងសុខភាពផ្លូវចិត្ត ។ល។ ដូច្នេះព្រះពុទ្ឋសាសនា ក៏ជាបច្ច័យជួយឱ្យការចិញ្ចឹមជីវិតរបស់បុគ្គលកាន់តែមានរបៀបវិន័យ និងមានគុណភាពល្អឡើង ដើម្បីមានឱកាសបានសម្រេចប្រយោជន៍ដោយល្អ។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
