នាព្រឹកថ្ងៃទី១០ ខែកុម្ភៈ ឆ្នាំ២០២៣ នៅសាលាគរុកោសល្យ និងវិក្រឹតការ ខេត្តសៀមរាប មានរៀបចំពិធីប្រគល់កង់ដល់សិស្សមានជីវភាពខ្វះខាត មកពីសាលាបឋមសិក្សាចំនួន ១៨៣សាលា នៅទូទាំងខេត្ត សរុបចំនួន ១,០៣៥នាក់ ស្មើនឹង ១,០៣៥កង់ ពីអង្គការសុបិន្តសហគមន៍កម្ពុជា ដែលជាជំនួយពីអង្គការរ៉ូតារីក្លឹប សិនតូសាសាំងហ្កាពួរ ដើម្បីសម្រួលការលំបាករបស់ពួកគេ ក្នុងការធ្វើដំណើរទៅសិក្សា នៅតាមសាលារៀន និងក្នុងគ្រួសាររបស់ពួកគេ។
មានប្រសាសន៍ក្នុងឱកាសនោះ លោកស្រីម៉ននី រង្សី អភិបាលរងខេត្តសៀមរាប លើកឡើងថា ការអភិវឌ្ឍធនធានមនុស្សប្រកបដោយគុណភាព សមត្ថភាព និងគុណធម៌ ដែលជាកត្តាគន្លឹះសម្រាប់ទ្រទ្រង់កំណើនសេដ្ឋកិច្ចជាតិ និងភាពប្រកួតប្រជែងរបស់ប្រទេស ទាំងពេលបច្ចុប្បន្ន និងសម្រាប់អនាគត។ យើងទាំងអស់គ្នាចាំបាច់ណាស់ ត្រូវជួយជ្រោមជ្រែង គាំទ្រដល់ដំណើរការអប់រំ ដោយចាប់ផ្តើមគិតគូរពីអនុវិស័យអប់រំកុមារតូច រហូតដល់កម្រិតឧត្តមសិក្សា និងក្រោយឧត្តមសិក្សា ទាំងការអប់រំក្នុងប្រព័ន្ធ និងក្រៅប្រព័ន្ធ។ ក្នុងនាមគណៈអភិបាលខេត្ត លោកស្រី បានថ្លែងអំណរអរគុណដល់ក្រុមអង្គការ រ៉ូតារិក្លឹប សិនតូសាសិងហ្កាពួរ និងអង្គការសុបិន្តសហគមន៍កម្ពុជា ដែលបានផ្តល់កង់ ដល់សិស្សានុសិស្ស ដែលកំពុងជួបការលំបាក និងផ្ដល់លទ្ធភាពដល់ពួកគេឱ្យទៅរៀនបានទាន់ពេលវេលា។
គួរជម្រាបថា អង្គការសុបិន្តសហគមន៍កម្ពុជា បានធ្វើការមនុស្សធម៌នៅកម្ពុជា អស់រយៈកាល១៦ឆ្នាំកន្លងមកហើយ ពាក់ព័ន្ធទៅនឹងផ្នែកសុខុមាលភាពសង្គម ផ្នែកអប់រំ និងនិងសហគ្រាសសង្គម។ ដោយឡែក អង្គការរ៉ូតារីក្លឹបសិនតូសាសាំងហ្កាពួរ បានផ្សារភ្ជាប់ទំនាក់ទំនងជាមួយកម្ពុជា មានរយៈពេលជាង១០ឆ្នាំកន្លងមកហើយ។ រហូតមកដល់បច្ចុប្បន្ន អង្គការរ៉ូតារីក្លិបសិនតូសា បានផ្ដល់កង់ប្រមាណជាង ៧ពាន់គ្រឿងហើយដល់សិស្សសាលានៅកម្ពុជា។
ព័ត៌មានជាតិ ថ្មីៗ
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
