វេទិកាថ្នាក់តំបន់អាស៊ី និងប៉ាស៊ីហ្វិកលើកទី១១ រយៈពេលបីថ្ងៃ រៀបចំឡើងក្នុងក្រុងសៀមរាប ត្រូវបានបិទបញ្ចប់ដោយជោគជ័យ ដែលមានការអញ្ជើញចូលរួមពីតំណាងក្រសួង ស្ថាប័ន រដ្ឋបាលខេត្ត និងស្រុកទូទាំងប្រទេស អង្គការក្នុងស្រុក និងក្រុមហ៊ុនឯកជន និងអ្នកចូលរួមអន្តរជាតិជាតំណាងប្រទេសសមាជិក អង្គការអន្តរជាតិ និងគ្រឹះស្ថានសិក្សាប្រមាណ ៥០០នាក់។
ថ្លែងក្នុងពិធីបិទនោះ ឯកឧត្ដម សៅ សុភាព រដ្ឋលេខាធិការក្រសួងបរិស្ថាន លើកឡើងថា ប្រធានបទសំខាន់ៗចំនួន៨ ដែលបានលើកមកជជែក និងពិភាក្សា នៅថ្ងៃទី៣នេះរួមមាន៖ ការបង្កើតភាពរួបរួមគ្នាក្នុង ការសម្រេចបានគោលដៅអភិវឌ្ឍន៍ប្រកបដោយចីរភាព (SDGs) និងកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ តាមរយៈសេដ្ឋកិច្ចចក្រ សេដ្ឋកិច្ចចក្រា ឆ្ពោះទៅរកទេសចរណ៍ប្រកបដោយនិរន្តរភាព សេដ្ឋកិច្ចចក្រាឆ្ពោះទៅរកនិរន្តរភាពប្រព័ន្ធអេកូឡូស៊ីបឹងទន្លេសាប សេដ្ឋកិច្ចចក្រា និងសហគ្រាសខ្នាតតូច និងមធ្យម (SMEs) ការផ្សារភ្ជាប់ចន្លោះខ្វះខាត នៃហេដ្ឋារចនាសម្ព័ន្ធ 3R ឆ្ពោះទៅរកសង្គមគ្មានសំណល់ ការប្រើប្រាស់ផលិតផល មេត្រីភាពបរិស្ថានជំនួសឱ្យប្លាស្ទិកដែលអាចប្រើប្រាស់ ការពិគ្រោះយោបល់លើសេចក្តីព្រាង New 3R and Circular Economy Declaration (2024-2034) និង សេចក្ដីព្រាងចុងក្រោយនៃរបាយការណ៍លើកទី២ ស្ដីពីស្ថានភាព នៃ 3Rs នៅអាស៊ី និងប៉ាស៊ីហ្វិក ការជំរុញសេដ្ឋកិច្ចចក្រានៅអាស៊ី និងប៉ាស៊ីហ្វិក ឆ្ពោះទៅរកការសម្រេចបាននូវគោលដៅអភិវឌ្ឍន៍ប្រកបដោយចីរភាព។
អញ្ជើញតំណាង ឯកឧត្ដម សាយ សំអាល់ រដ្ឋមន្ត្រីក្រសួងបរិស្ថាន ឯកឧត្ដម អ៊ាង សុផល្លែត រដ្ឋលេខាក្រសួងបរិស្ថាន បានថ្លែងកោតសរសើរ គ្រប់កិច្ចពិភាក្សាខាងលើប្រកបដោយផ្លែផ្កា ការដកស្រង់បទពិសោធន៍ និងការយល់ដឹង និងបានអរគុណចំពោះការចូលរួម យ៉ាងសកម្ម និងការរួមចំណែកពីគណៈប្រតិភូ អ្នកតាក់តែងគោលនយោបាយ តំណាងវិស័យឯកជន អ្នកស្រាវជ្រាវ ព្រមទាំងអ្នកជំនាញពីវិស័យនានាផងដែរ។ ឯកឧត្ដម ក៏បានទាញចំណាប់អារម្មណ៍របស់អ្នកចូលរួម ឱ្យចាប់អារម្មណ៍ទៅលើភាពប្រឈមលើបញ្ហាបរិស្ថាន បណ្តាលមកពីការរាតត្បាតដ៏អាក្រក់នៃជំងឺកូវីដ១៩ និងស្ថានការណ៍សកល នៅតែស្ថិតនៅក្នុងភាពមិនប្រាកដប្រជា។
ឯកឧត្ដម បានបញ្ជាក់ថា ឆ្នាំ២០២៣ នឹងក្លាយជាឆ្នាំដ៏សំខាន់មួយ ក្នុងការសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពដែលបានអនុម័តជិតប្រាំបីឆ្នាំមុន។ ដើម្បីសម្រេចគោលដៅនេះ យើងត្រូវប្រឹងឱ្យអស់ពីសមត្ថភាពដើម្បីស្តារពេលវេលាដែលបាត់បង់ដោយសារវិបត្តិកូវីដ-១៩ និងដើម្បីត្រឡប់ទៅរកផ្លូវអភិវឌ្ឍន៍ ប្រកបដោយនិរន្តរភាពរបស់យើងឡើងវិញ។ ការអនុវត្តកាន់តែទូលំទូលាយ និងមានប្រសិទ្ធភាព ជាងមុននៃគោលការណ៍ 3R និងសេដ្ឋកិច្ចចក្រា មានប្រយោជន៍យ៉ាងខ្លាំង ជាពិសេសក្នុងន័យកាត់បន្ថយកាកសំណល់ ការលើកកម្ពស់ចរាចរណ៍សម្ភារៈ ប្រសិទ្ធភាពធនធាន និងសេដ្ឋកិច្ចតំបន់ ក៏ដូចជាស្ដារធម្មជាតិឡើងវិញ»។
ឯកឧត្ដម បានលើកទឹកចិត្ត សម្រាប់ការផ្សព្វផ្សាយបន្ថែមទៀត នូវលទ្ធផលនៃវេទិកា ទៅកាន់សាធារណជនឱ្យបានទូលំទូលាយ រួមទាំងអ្នកដឹកនាំនយោបាយ អ្នកតាក់តែងគោលនយោបាយ យុវជន សង្គមស៊ីវិល និងវិស័យឯកជន។គោលការណ៍ 3R និងសេដ្ឋកិច្ចចក្រា នឹងកាន់តែមាន ប្រសិទ្ធភាព ហើយអាចក្លាយទៅជាសកម្មភាពជាក់ស្តែង ដើម្បីបង្កើតលទ្ធផលល្អ ជាអតិបរមា និងបម្រើជាមូលដ្ឋានគ្រឹះសម្រាប់មារដោះស្រាយយ៉ាងទូលំទូលាយនូវបញ្ហាបរិស្ថាន។
សូមបញ្ជាក់ថា វេទិកាថ្នាក់តំបន់អាស៊ី និងប៉ាស៊ីហ្វិក លើកទី១១ ស្តីពី 3R សេដ្ឋកិច្ចចក្រា បានរៀបចំឡើងក្រោមប្រធានបទ «សមាហរណកម្មសេដ្ឋកិច្ចទៅក្នុងការអភិវឌ្ឍន៍ លើគ្រប់វិស័យឆ្ពោះទៅសម្រេចបានសង្គមគ្មានសំណល់ និងគោលដៅអភិវឌ្ឍន៍ប្រកប ដោយចីរភាព»។ ក្នុងគោលបំណងពិភាក្សាអំពីការជំរុញការអនុវត្ត 3R និងសេដ្ឋកិច្ចចក្រាក្នុងវិស័យសំខាន់ៗ និងផ្សារភ្ជាប់នឹងការសម្រេចនូវគោលដៅ អភិវឌ្ឍប្រកបដោយចិរភាព និងដោះស្រាយបញ្ហាការប្រែប្រួលអាកាសធាតុ និងជីវចម្រុះ និងបានផ្តោតសំខាន់លើការកាត់បន្ថយ ការប្រើឡើងវិញ និងកែច្នៃសំណល់ ជាពិសេសប្លាស្ទិក៕
អត្ថបទ និងរូបភាព៖ លោក បូ សាវី លោក ជា ស្រស់ និងលោក យូ វង្ស
កែសម្រួល៖ លោក សេង ផល្លី
