នៅព្រឹកថ្ងៃទី១៣ ខែកុម្ភៈ ឆ្នាំ២០២៣នេះ ភរិយាថ្នាក់ដឹកនាំនៃក្រសួង ស្ថាប័នកម្ពុជាជាច្រើនរូប បានអញ្ជើញមកទស្សនានៅសួនឧទ្យានសិប្បនិមិត្តអាងពិព័រណ៍ត្រីទឹកសាប ទឹកប្រៃ របស់ក្រុមហ៊ុន អង្គរ វ៉ាយដ៍ឡាយហ្វ៍ និងអឹឃ្វារៀម (Angkor Wildlife and Aquarium) ក្នុងស្រុកសូទ្រនិគម ខេត្តសៀមរាប ដើម្បីធ្វើការស្វែងយល់ពីការរស់នៅរបស់សត្វកម្រដែលកំពុងមានវត្តមាននៅក្នុងសួនសត្វដំបូងគេនៅក្នុងប្រទេសកម្ពុជា ដែលកំពុងមានការចាប់អារម្មណ៍ពីសំណាក់អ្នកទេសចរណ៍ជាតិ និងអន្តរជាតិជាច្រើន ដែលបានមកទស្សនា និងកំសាន្តនៅទីនេះ។
មានប្រសាន៍ក្នុងឱកាសនោះ លោកជំទាវ តាន់ ម៉ាលី ជា សុផារ៉ា បានបង្ហាញអារម្មណ៍រីករាយ និងថ្លែងការកោតសរសើរ ដល់អ្នកគ្រប់គ្រង និងបុគ្គលិកទាំងអស់របស់ក្រុមហ៊ុន ដែលមានសមត្ថភាពក្នុងការបង្កើតនូវអាងពិព័រណ៌ត្រីទឹកសាប និងទឹកប្រៃមួយនេះឡើង ដែលជាចំណីអារម្មណ៍ដ៏ប្លែកថ្មីមួយបន្ថែមទៀតដល់កម្ពុជា ជាពិសេសខេត្តសៀមរាបឲ្យមានដូចជាបណ្ដាប្រទេសមួួយចំនួនក្នុងពិភពលោក។ លោកជំទាវបន្ថែមថា សួនឧទ្យានសិប្បនិមិត្តនេះ គឺជាទីកន្លែងទេសចរណ៍មួយថ្មី និងប្លែកភ្នែក ដែលប្រជាជនជាច្រើនមិនដែលបានជួបប្រទះ។ ទីតាំងនេះដែល គឺមានការរៀបចំ និងសោភ័ណ្ឌភាពល្អ រួមជាមួយនឹងសេវាកម្មដែលមានការយកចិត្តទុកដាក់ពីសំណាក់បុគ្គលិកគ្រប់ៗផ្នែកទៀតផង។
លោកជំទាវ តាន់ ម៉ាលី ជា សុផារ៉ា ក៏សង្ឃឹមផងដែរថា នៅពេលខាងមុខសួនត្រីទឹកសាបមួយនេះ នឹងមានការអភិវឌ្ឍន៍ និងកែប្រែឲ្យមានភាពរីកចម្រើន និងល្អប្រសើរបន្ថែមទៀត ដើម្បីជាការទាក់ទាញដល់វត្តមានភ្ញៀវទេសចរណ៍ទាំងជាតិ និងអន្តរជាតិឲ្យចូលមកកំសាន្តនៅតំបន់នេះ ក៏ដូចជាតំបន់ទេសចរនានាជាច្រើនទៀតដែលមាននៅក្នុងខេត្តសៀមរាបទាំងមូល។ លោកជំទាវក៏បានជំរុញ និងអំពាវនាវដល់ភ្ញៀវទេសចរណ៍ទាំងអស់ចូលមកកំសាន្តនៅសួនត្រីនេះ ក៏ដូចជាខេត្តសៀមរាប ឲ្យបានច្រើនកុះករ ព្រោះវាក៏ដូចជាការជួយបង្កើនប្រាក់ចំណូលជូនដល់បងប្អូនប្រជាពលរដ្ឋក្នុងខេត្តសៀមរាបទាំងមូល។
សូមជម្រាបថា សួនឧទ្យានសិប្បនិមិត្តអាងពិព័រណ៌ត្រីទឹកសាប និងទឹកប្រៃ របស់ក្រុមហ៊ុន Angkor Wildlife and Aquarium ស្ថិតនៅតាមបណ្ដោយផ្លូវជាតិលេខ៦ ក្នុងភូមិក្បូន ឃុំខ្ចាស់ ស្រុកសូទ្រនិគម ខេត្តសៀមរាប។ សួនខាងលើនេះ កំពុងមានវត្តមានសត្វកម្រដែលមានស្រាប់ក្នុងប្រទេសកម្ពុជា និងមួយចំនួនទៀតនាំចូលមកពីបរទេស ព្រមទាំងមានសត្វច្រើនប្រភេទ ដូចជា សត្វខ្លាមកពីប្រទេសអាហ្វ្រិចខាងត្បូង ខ្លាឃ្មុំ សត្វភេ អណ្តើកហ្លួង ក្រពើភ្នំ និងសត្វដទៃទៀតជាច្រើនប្រភេទទៀតផងដែរ៕
អត្ថបទ និងរូបភាព៖ លោក អ៊ុន ណារាជ្យ
កែសម្រួល៖ លោក សេង ផល្លី
