ក្រសួងកិច្ចការនារី នៅព្រឹកថ្ងៃទី១៣ ខែកុម្ភៈ ឆ្នាំ២០២៣នេះ បានរៀបចំបើកវគ្គបណ្តុះបណ្តាលស្តីពីជំនាញស្វែងរកការគាំទ្រមតិលើបញ្ហាយេនឌ័រ និងពិការភាពដើម្បីបង្កើនការយល់ដឹងជូនដល់មន្ត្រីនៃមន្ទីរកិច្ចការនារី មន្ទីរអប់រំ យុវជន និងកីឡា មន្ទីរសង្គមកិច្ច និងមន្ទីរព័ត៌មាន មកពីខេត្តចំនួន៩ ក្នុងប្រទេសកម្ពុជា។ វគ្គបណ្តុបណ្ដាលនេះធ្វើឡើងនៅសណ្ខាគារសេរីភាព ក្រុងសៀមរាប មានរយៈពេល ៣ថ្ងៃ ចាប់ពីថ្ងៃទី១៣-១៥ ខែកុម្ភៈ ឆ្នាំ២០២៣។
លោកជំទាវ ឆាយ សន អនុរដ្ឋលេខាធិការក្រសួងកិច្ចការនារី មានប្រសាសន៍ថា វគ្គបណ្តុះបណ្តាលនាពេលនេះ ផ្តោតសំខាន់លើការបង្កើនការយល់ដឹងដល់តាមបណ្តាមន្ទីរវិស័យនៅថ្នាក់ខេត្ត អំពីភាពខុសគ្នារវាងស្ត្រី និងបុរសដែលមានពិការភាព និងបង្កើនជំនាញស្វែងរកការគាំទ្រមតិរបស់ពួកគាត់ ក្នុងការកាត់បន្ថយរាល់ទម្រង់នៃការរើសអើងលើស្ត្រី និងក្មេងស្រីដែលមានពិការភាពពីករណីអំពើហិង្សា ការទទួលបានការអប់រំ ការអភិវឌ្ឍជំនាញ និងការផ្សព្វផ្សាយនានា។ ចំណុចសំខាន់នៃវគ្គបណ្ុះបណ្ដាលនេះដែរ គឺផ្តោតសំខាន់លើការផ្តល់ជំនាញ និងសមត្ថភាពដល់មន្ទីរវិស័យ ក្នុងការជួយឱ្យគាត់អាចផ្សព្វផ្សាយបន្ត ឬបញ្ចូលក្នុងកិច្ចការរបស់គាត់ និងស្វែងរកការគាំទ្រពីអាជ្ញាធរ និងសហគមន៍ លើការរើសអើងផ្នែកភេទ និងយេនឌ័រ លើជនដែលមានពិការភាព។
លោកជំទាវ ឆាយ សន បញ្ជាក់ទៀតថា យោងតាមផែនការយុទ្ធសាស្ត្រជាតិស្ដីពីពិការភាព ២០១៩-២០២៣ របស់ក្នុងមប្រឹក្សាសកម្មភាពជនពិការ ឆ្នាំ២០១៩ បានបង្ហាញថា ជនដែលមានពិការភាពនៅប្រទេសកម្ពុជាមានចំនួន ៥២៤ពាន់នាក់ ស្មើនឹង ៤% នៃប្រជាជនសរុបជាង ១៥លាននាក់ ហើយក្នុងនោះស្ត្រីពិការ គឺប្រឈមនឹងបញ្ហាលំបាកច្រើនជាងបុរស។ ក្នុងនោះស្ត្រីពិការងាយនឹងទទួលរងគ្រោះដោយសារអំពោះហឹង្សាផ្លូវភេទ ផ្លូវកាយ និងផ្លូវចិត្តនៅក្នុងជីវភាពរស់នៅប្រចាំថ្ងៃច្រើនជាងអ្នកដែលមានកាយសម្បទាគ្រប់គ្រាន់។ ជាមួយនឹងបញ្ហានេះ រាជរដ្ឋាភិបាលកម្ពុជា ៏បានបង្កើតនូវច្បាប់ គោលនយោបាយ យន្តការនានា ដើម្បីគាំទ្រ និងលើកកម្ពស់សិទ្ធជនពិការដូចជា ច្បាប់ស្ដីពីកិច្ចការពារ និងលើកម្ពស់ជនពិការរបស់ប្រទេសកម្ពុជា កាលពីឆ្នាំ២០០៩ មានគោលដៅការពារសិទ្ធ និងសេរីភាពរបស់ជនមានពិការភាព លុបបំបាត់នូវការរើសអើង និងជំរុញឲ្យមានការចូលរួមយ៉ាងពេញលេញគ្រប់សកម្មភាពរបស់ពួកគេក្នុងសង្គមទាំងមូល។
ក្នុងកាសនោះដែរ លោកស្រី វ៉ាន់ ចាន់ណា អនុប្រធានមន្ទីរកិច្ចការនារីខេត្តសៀមរាប មានប្រសាន៍ថា វគ្គបណ្ដុះបណ្ដាលនេះ ពិតជាមានសារសំខាន់ណាស់សម្រាប់គ្រប់អ្នកពាក់ព័ន្ធទៅលើការងារទាក់ទងនឹងជនពិការ ជាពិសេសការពង្រឹងការអនុវត្តច្បាប់ស្ដីពីកិច្ចការពារ និងលើកកម្ពស់ជនពិការ ការជំរុញកិច្ចការពារ និងលើកកម្ពស់សិទ្ធិ និងសុខុមាលភាពជនពិការ ស្របតាមអនុសញ្ញារបស់អង្គការសហប្រជាជាតិស្ដីពីសិទ្ធិជនពិការ ព្រមទាំងការពង្រឹងគុណភាព និងប្រសិទ្ធិភាពនៃសេវារបស់មូនិធិជនពិការ។ ជាមួយគ្នានោះ លោកស្រីសង្ឃឹម និងជៀជាក់ថា វគ្គបណ្តុះបណ្តាលនាថ្ងៃនេះ នឹងមានការចែករំលែកនូវបទពិសោធន៍ និងចំណេះដឹងថ្មីៗទាក់ទងនឹងច្បាប់ជាតិ អន្តរជាតិ និងគោលនយោបាយនានាពាក់ព័ន្ធនៃការលើកកម្ពស់សិទ្ធិជនពិការ ការបញ្ជ្រាបយេនឌ័រ ក្នុងវិស័យពិការភាព ការធ្វើបរិយាបន្នពិការភាព តាមការធ្វើបទបង្ហាញ ពិភាក្សាក្នុងវគ្គបណ្តុះបណ្តាលទាំងមូលផងដែរ៕
អត្ថបទ និងរូបភាព៖ លោក អ៊ុន ណារាជ្យ
