ក្នុងរយៈពេល ៤ឆ្នាំកន្លងមកនេះ ក្រុមហ៊ុន Ecobatt-Energy Cambodia ប្រមូលបានសំណល់អេឡិចត្រូនិកប្រមាណជាង ៧តោន រួមមានថ្មពិល អាគុយ និងកុំព្យូទ័រជាដើម ដែលសុទ្ធសឹងជាប្រភេទសំណល់គ្រោះថ្នាក់ ត្រូវបាននាំចេញទៅកែច្នៃនៅក្រៅប្រទេស ខណៈនៅកម្ពុជាពុំទាន់មានក្រុមហ៊ុនកែច្នៃសំណល់ទាំងនេះនៅឡើយ។
ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន បង្ហាញថា សំណល់គ្រោះថ្នាក់ទាំងនេះ មិនអាចមើលរំលងបានទេ ដូច្នេះទើបក្រសួងបរិស្ថានបានខិតខំសហការជាមួយដៃគូ ក្នុងការប្រមូលសំណល់គ្រោះថ្នាក់ទាំងនេះចេញពីតំបន់ផ្សេងៗ ដើម្បីរក្សាទុកនិងនាំចេញ ដែលក្នុងនោះបានចាប់ផ្តើមដំបូងគេនៅរាជធានីភ្នំពេញ តាមរយៈធុងនៅតាមស្ថានីយប្រេងឥន្ធនៈ ផ្សារទំនើប និងបុរីមួយចំនួន ហើយបានពង្រីកមកដល់ខេត្តសៀមរាប និងខេត្តព្រះសីហនុហើយ។
ឯកឧត្ដមបន្ដថា ចាប់ពីពេលនេះទៅ ក្រសួងនឹងខិតខំជំរុញការប្រមូលអេឡិចត្រូនិកគ្រោះថ្នាក់ដល់សុខភាពទាំងនេះ ឱ្យបានទូលំទូលាយនៅទូទាំងប្រទេស។ ជាមួយគ្នានេះ ឯកឧត្តម បានស្នើឱ្យប្រជាពលរដ្ឋរស់នៅតាមផ្ទះ ត្រូវគ្រប់គ្រងសំណល់អេឡិចត្រូនិចឱ្យបានល្អ ជាពិសេសសំណល់ថ្មពិល ត្រូវបោះចោលនៅក្នុងធុងដែលមានបញ្ជាក់ពីសំណល់អេឡិចត្រូនិច នៅតាមស្ថានីយ ឬទីតាំងជិតផ្ទះ។ ចំពោះបងប្អូនប្រជានេសាទ ឬអ្នករស់នៅតាមដងទន្លេ សូមកុំបោះចោលសំណល់ថ្មពិលចូលទៅក្នុងទឹក ពីព្រោះវាធ្វើឱ្យប៉ះពាល់ធ្ងន់ធ្ងរដល់សុខភាព និងជីវចម្រុះ។
សូមជម្រាបថា ក្រុមហ៊ុន Ecobatt-Energy Cambodia បានបង្កើតឡើងនៅឆ្នាំ២០១៩ ផ្តោតតែទៅលើសេវាកម្មជួសជុលអាគុយប៉ុណ្ណោះ ប៉ុន្តែក្រោយមក ក្រោមកិច្ចសហការជាមួយក្រសួងបរិស្ថាន ក្រុមហ៊ុនបានប្រមូលសំណល់អេឡិចត្រូចនិក តាមរយៈការដាក់ធុងសំណល់ថ្មពិលនៅតាមស្ថានីយ ផ្សារទំនើប និងនៅតាមបុរីមួយចំនួន។ បច្ចុប្បន្នធុងទាំងនេះ មានប្រមាណជាង១២០ធុង ក្នុងនោះ ធុងក្រសួងបរិស្ថានមានជាង៩០ និងធុងក្រុមហ៊ុនមានជាង៣០ ដែលបានដាក់នៅរាជធានីភ្នំពេញ ខេត្តសៀមរាប និងខេត្តព្រះសីហនុ៕
អត្ថបទ និងរូបភាព៖ លោក បូ សាវី
កែសម្រួល៖ លោក សេង ផល្លី
