ស្ពានថ្មមួយកន្លែងស្ថិតនៅផ្លូវចូលវត្តអារញ្ញសាគរ ក្នុងភូមិអារញ្ញ សង្កាត់សៀមរាប ក្រុង/ ខេត្តសៀមរាប ដែលស្ថិតក្នុងគម្រោងកែលម្អស្ទឹងសៀមរាបជំហាន២ ត្រូវរុះរើ ដើម្បីសាងសង់ស្ពានថ្មីជំនួសវិញ ហើយត្រូវបានព្រះវិភត្តិមុនីញាណ វិសារទោ ហ៊ាក់ គឹមហ៊ត់ ព្រះ រាជាគណ:កិត្តិយស និងជាព្រះគ្រូចៅអធិការវត្តអារញ្ញសាគរ រួមគណ:កម្មការអាចារ្យវត្ត ពុទ្ធបរិស័ទចំណុះជើងវត្ត បានមូលមតិគ្នាធ្វើពិធីក្រុងពាលីតាមប្រពៃណីទំនៀមទម្លាប់ កាលពីរសៀលថ្ងៃទី១៣ ខែកុម្ភ: ឆ្នាំ២០២៣ ក្រោមវត្តមាន ចូលរួមរបស់លោកពិន ប្រាកដ អភិបាលរងខេត្ត និងភរិយា ព្រមទាំងលោកចៅសង្កាត់ ក្រុមអ្នកបច្ចេកទេសសាងសង់ លោកគ្រូអ្នកគ្រូ សិស្សានុសិស្ស និងប្រជាពុទ្ធបរិស័ទជាច្រើនផងដែរ។ តាមការបញ្ជាក់របស់តំណាងក្រុមហ៊ុន ឌុងសុង អ៉ីនជីនារីន ខូអិលធីឌី បានឲ្យដឹងថា គម្រោងកែលម្អស្ទឹងសៀមរាបជំហាន២ នេះ ក្រោមកម្ចីឥណទាន ធនាគារនីហរ័ណ អាហរ័ណ នៃសាធារណរដ្ឋកូរ៉េ ក្រសួងសាធារណការ និងដឹកជញ្ជូន ជាម្ចាស់គម្រោង ដោយមានទីប្រឹក្សាបច្ចេកទេស និងសហការជាមួយ ក្រុមហ៊ុនសាងសង់ យ៉ុងជីង ខនស្ត្រាក់សិនអាយអិនស៊ី។ ស្ពានដែលត្រូវសាងសង់ជំនួសស្ពានចាស់មានចំនួន ៣កន្លែងគឺស្ថិតក្នុងគម្រោងកែលម្អស្ទឹងសៀមរាបជំហាន២ នេះ។ ស្ពាន ៣កន្លែង ស្ថិតនៅប៉ែកខាងក្រោមនៃក្រុងសៀមរាប សម្រាប់ស្ពានថ្មជំនួសស្ពានចាស់ចូលទៅវត្តអារញ្ញសាគរនេះ នឹងប្រើរយ:ពេល ៨ខែ ក្នុងគម្រោងថវិកា ប្រមាណជាង ២០ម៉ឺនដុល្លា ដែលជាមូលនិធិ EDCF មានបណ្តាយ ៣០ម៉ែត្រ ទទឹង ១៣ម៉ែត្រ។
ព្រះវិភត្តិមុនីញាណ វិសារទោ ហ៊ាក់ គឹមហ៊ត់ មានសង្ឃដីកាថា៖ ស្ពាននេះមានចំណាស់ជាង ៥០ឆ្នំាមកហើយ បច្ចុប្បន្នមានសភាពចាស់ទ្រុឌទ្រោម និងចង្អៀត។ស្របពេលដែលរដ្ឋបាលខេត្តសៀមរាប រៀបចំគម្រោងសាងសង់ថ្មី ព្រះសង្ឃ គណ:កម្មការអាចារ្យវត្ត និងបងប្អូនញាតិញោមក្នុងមូលដ្ឋាន បានឯកភាពគ្នារៀបចំពិធីក្រុងពាលីទៅតាមទំនៀមទម្លាប់ប្រពៃណីដែលធ្លាប់មាន តាំងពីបូរាណកាលមក គឺមុនធ្វើការរុះរើ ឬកសាងអ្វីមួយ ដើម្បីបួងសួងម្ចាស់ទឹកសុំសេចក្តីសុខ សេចក្តីចម្រើនដល់យើងគ្រប់ៗគ្នា ។
លោក ពិន ប្រាដក អភិបាលរងខេត្ត បានឲ្យដឹងថា គម្រោងកែលម្អស្ទឹងសៀមរាបជំហាន២ នេះត្រូវបានអាក់ខាន ដោយលើពិភពលោកជួបនូវវិបត្តិកូវិដ-១៩ បណ្តាលឱ្យគម្រោងនេះបានអូសបន្លាយមកដល់ពេលនេះ ។ គម្រោងកែលម្អស្ទឹងសៀមរាបនេះ នឹងធ្វើឲ្យកាន់តែប្រសើរឡើងនូវសោភណ្ឌភាព បរិស្ថាន ទំហំស្ពានមានភាពធំទូលាយ និងរឹងមាំជាងមុន ជួយពង្រីកមុខទឹកហូរកាន់តែធំធ្វើឲ្យចរន្តទឹកហូរលឿន បញ្ជៀសនូវការលិចលង់ក្រុងសៀមរាប ក៏ដូចជាជួយបង្កលក្ខណ:កាន់តែងាយស្រួលក្នុងការធ្វើដំណើររបស់មហាជនទូទៅ ជួយសម្រួលដល់ការធ្វើដំណើរឆ្លងកាត់ ដល់ព្រះសង្ឃ ប្រជាពលរដ្ឋ សិស្សានុសិស្សទាំងបឋមសិក្សា អនុវិទ្យាល័យ និងវិទ្យាល័យផងដែរ៕
ព័ត៌មានជាតិ ថ្មីៗ
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
