នារសៀលថ្ងៃទី១៥ ខែកុម្ភៈ ឆ្នាំ២០២៣ យុវសិស្សនៃវិទ្យាល័យ ១០ មករា ១៩៧៩ ចំនួន ៥០នាក់ បានទទួលការបណ្តុះបណ្តាលនូវមូលដ្ឋាន អំពីកាកបាទក្រហម និងវិជ្ជាសង្គ្រោះបឋម និងទទួលបានការបំពាក់ឯកសណ្ឋានជូនសមាជិកថ្មីយុវជនកាកទក្រហមកម្ពុជា។
លោក លី ប៊ុនណា លេខាធិការគណៈកម្មាធិការសាខាកាកបាទក្រហមកម្ពុជា ខេត្តសៀមរាប មានប្រសាសន៍ថា ដើម្បីអភិវឌ្ឍធនធានមនុស្សក្នុងការបំរើសេវាកម្មមនុស្សធម៌ និងចូលរួមការងារក្នុងសង្គម សាខាកាកបាទក្រហមកម្ពុជាខេត្តសៀមរាប បានផ្តល់នូវវគ្គបណ្តុះបណ្តាលរយៈពេល ១ថ្ងៃនេះ ស្តីពីកាកបាទក្រហម អឌ្ឍចន្ទក្រហម វិជ្ជាសង្គ្រោះបឋម និងការងារគ្រប់គ្រងយុវជនកាកបាទក្រហមកម្ពុជា ព្រមទាំងបញ្រ្ចាបលើប្រធានបទសុវត្ថិភាពចរាចរណ៍ ដើម្បីបានជាមូលដ្ឋានក្នុងការបំពេញការងារមុនស្សធម៌។
ក្នុងឱកាសនោះដែរ លោក លី ប៊ុនណា ក៏បានណែនាំ និងប្រគល់នូវតួនាទី ភារកិច្ចជូនដល់ប្អូនៗទាំងអស់ ដោយក្នុងនោះប្អូនៗគឺជាតំណាងឲ្យយុវជនកាកបាទក្រហមកម្ពុជា ក្នុងស្រទាប់យុវវ័យ ជាអ្នកបន្តវេនក្នុងសកម្មភាពមនុស្សធម៌របស់កាកបាទក្រហមកម្ពុជា។ ក្នុងនោះប្អូនៗត្រូវគោរពនូវវិន័យសាលា ខិតខំរៀនសូត្រឲ្យបានពូកែ និងធ្វើជាគំរូល្អក្នុងស្រទាប់យុវវ័យ។ ជាពិសេសត្រូវផ្សព្វផ្សាយពីគោលការណ៍គ្រឹះនៃចលនាអន្តរជាតិកាកបាទក្រហម អឌ្ឍចន្ទក្រហម និងពីសកម្មភាពមនុស្សធម៌របស់កាកបាទក្រហមកម្ពុជា ក្នុងសាលា និងសហគមន៍។ បន្តចូលរួមក្នុងការអប់រំសុខភាពអនាម័យ បង្ការជំងឺឆ្លង ក៏ដូចជាគ្រោះថ្នាក់នៃគ្រឿងញៀន។ ចូលរួមសកម្មភាពមនុស្សធម៌ក្នុងសាលា មានជួយដល់មិត្តយុវសិស្សក្រីក្រ រៀនខ្សោយ និងលើកទឹក មិត្តយុវសិស្សពិការ។ ត្រូវធ្វើជាគំរូល្អក្នុងការគោរពច្បាប់ចរាចរណ៍ ដើម្បីរួមចំណែកកាត់បន្ថយគ្រោះថ្នាក់ និងពិការភាពដោយសារគ្រោះថ្នាក់ចរាចរណ៍ មានទំនាក់ទំនងស្មើភាពក្នុងជួរយុវជន ដោយសហការល្អ ចែករំលែកបទពិសោធន៍ជាមួយយុវកាយរឹទ្ធិជាតិកម្ពុជា សហភាពសហព័ន្ធយុវជនកម្ពុជា ក៏ដូចជាជាមួយយុវជនកាកបាទក្រហម អឌ្ឍចន្ទក្រហមនៃបណ្តាប្រទេសជាមិត្តនានាក្នុងសកលលោក។
បន្ទាប់ពីបានទទួលតួនារី និងភារកិច្ចរួចមកតំណាងយុវជនថ្មីចំនួន ៣រូប បានធ្វើការប្ដេជ្ញាចិត្តរៀនសូត្រឱ្យបានពូកែ គោរពវិន័យ សីលធម៌ ឱ្យក្លាយជាសិស្សល្អ កូនល្អ និងមិត្តល្អ, ប្ដេជ្ញាបំពេញតួនាទីភារកិច្ចជាយុវជនកាកបាទក្រហមកម្ពុជា, ប្តេជ្ញាទ្រទ្រង់ និងចូលរួមសកម្មភាពមនុស្សធម៌ឱ្យបានកាន់តែច្រើន ទាំងក្នុង និងក្រៅសាលារៀន និងប្ដេជ្ញាអភិវឌ្ឍសមត្ថភាពរបស់ខ្លួនឱ្យក្លាយជាពលរដ្ឋល្អទៅអនាគតទៀតផង៕
ប្រភព៖ សាខាកាកបាទក្រហមខេត្តសៀមរាប
កែសម្រួល៖ លោក អ៊ុន ណារាជ្យ
