នៅព្រឹកថ្ងៃទី១៦ ខែកុម្ភៈ ឆ្នាំ២០២៣នេះ មន្ទីរអភិវឌ្ឍន៍ជនបទខេត្តសៀមរាប បានបើកកិច្ចប្រជុំថ្នាក់ខេត្តស្តីពីការរៀបចំផែនការសកម្មភាព និងពង្រឹងនីតិវិធីឡើងវិញដល់ក្រុមការងារពាក់ព័ន្ធ ដើមី្បបញ្ចប់ការបន្ទោរបង់ពាសវាលពាសកាលថ្នាក់ខេត្ត ក្រោមអធិបតីភាពរបស់ឯកឧត្តម បណ្ឌិត ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទ និងលោក អ៊ឹង គឹមលាង អភិបាលរងខេត្ត រួមនឹងប្រតិភូក្រសួងអភិវឌ្ឍន៍ជនបទ តំណាងមន្ទីរអង្គភាពមានការពាក់ព័ន្ធ អាជ្ញាធរក្រុង-ស្រុកឃុំ-សង្កាត់ និងអង្គការដៃគូរជាច្រើនរូប។
បើតាមលោក ទូច ម៉ាឡា ប្រធានមន្ទីរអភិវឌ្ឍន៍ជនបទខេត្ត បានបញ្ជាក់ថា កិច្ចប្រជុំនាពេលនេះ គឺក្នុងគោលបំណងរៀបចំនូវផែនការសកម្មភាព ដើមី្បសម្រេចការបញ្ចប់ការបន្ទោរបង់ពាសវាលពាសកាលក្នុងខេត្តសៀមរាប ឲ្យបាននៅឆ្នាំ២០២៥ និងពង្រឹងឡើងវិញពីនីតិវិធីរបស់អាជ្ញាធរក្រុងស្រុក ក្នុងការជម្រុញការលើកកម្ពស់អនាម័យជនបទ។ ជាពុសេសនៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវតែមានការផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តរភាពផងដែរ។
មានប្រសាសន៍ក្នុងឱកាសនោះ លោក អ៊ឹង គឹមលាង អភិបាលរងខេត្ត បានជម្រុញដល់មន្ទីរអភិវឌ្ឍន៍ជនបទ អាជ្ញាធរពាក់ព័ន្ធ រួមនឹងអង្គការដៃគូទាំងអស់ ត្រូវពន្លឿនឲ្យបានឆាប់នូវរាល់ការងារដែលពាក់ព័ន្ធនឹងបញ្ហានេះ ដើមី្បបញ្ចប់ការបន្ទោរបង់ពាសវាលពាសកាលឲ្យបានមុនឆ្នាំ២០២៥ ។ លោកក៏បានស្នើដល់ក្រសួងអភិវឌ្ឍន៍ជនបទ អង្គការ ក៏ដូចជាដៃគូរអភិវឌ្ឍន៍នានា មេត្តាបន្តជួយគាំទ្រ និងពង្រីកនូវវិសាលភាពនៃកម្មវិធីលើកកម្ពស់ការផ្គត់ផ្គង់ទឹកស្អាត និងការលើកកម្ពស់អនាម័យនៅតាមសហគមន៍ឲ្យបានគ្រប់ភូមិឃុំ ដើម្បីឈានសម្រេចឲ្យខានតែបានដល់គោលដៅឆ្នាំ២០២៣ អត្រាផ្គត់ផ្គង់ទឹកស្អាត ៩០% និងអត្រាគ្របដណ្តប់អនាម័យ ៩០%។ ជាពិសេសទស្សនៈវិស័យ “នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវមានការផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តរភាព” ។ ខណៈបច្ចុប្បន្ននៅទូទាំងខេត្តសៀមរាប មានស្រុកចំនួន៣ ដែលត្រូវបានបញ្ចប់ការបន្ទោរបង់ពាសវាលពាសកាល ប៉ុន្តែក៏នៅមានការព្រួយបារម្ភចំពោះ ក្រុង-ស្រុក ឃុំ-សង្កាត់ ដែលនៅជាប់បឹងទន្លេសាបលើការប្រើប្រាស់ទឹកស្អាត និងការបន្ទោរបង់ពាសវាលពាសកាលនៅជាបញ្ហាប្រឈមនៅឡើយទេ។
ថ្លែងក្នុងឱកាសនោះ ឯកឧត្តមបណ្ឌិត ជ្រុន ថេរ៉ាវ៉ាត បានបញ្ជាក់ថា ស្រុកដែលបញ្ឈប់ការបន្ទោរបង់ពាសវាលពាលកាលមានចំនួន៣ ក្នុងខេត្តសៀមរាប ហើយឃុំ-សង្កាត់ នៃក្រុង-ស្រុកចំនួន ៦ទៀត មានភូមិសាស្ត្រជាប់បឹងទន្លេសាប នៅតែជួបនឹងបញ្ហាប្រឈមទៅលើអនាម័យ និងការប្រើប្រាស់ទឹកស្អាត។ ឯកឧត្តម បានបង្ហាញការគាំទ្រនូវរាល់វិធានការរបស់អាជ្ញាធរខេត្ត ក្នុងការជម្រុញឲ្យមន្ទីរអភិវឌ្ឍន៍ជនបទ និងអាជ្ញាធរក្រុង-ស្រុក ឃុំ-សង្កាត់ ត្រូវធ្វើការពន្លឿន ដើមី្បបញ្ចប់ការបន្ទោរបង់ពាសវាលពាសកាលឲ្យបានមុនឆ្នាំ២០២៥ ។
ឯកឧត្តមបណ្ដិត បន្តថា ដើមី្បសម្រេចបាននូវផែនការនេះ អាជ្ញាធរមូលដ្ឋានគ្រប់ជាន់ថ្នាក់ ក៏ដូចអង្គការដៃគូរត្រូវសហការធ្វើការផ្សព្វផ្សាយឲ្យចូលជ្រៅដល់ប្រជាពលរដ្ឋអំពីអនាម័យ និងទឹកស្អាត ដើមី្បគិតដល់ពីបញ្ហាសុខភាពរបស់បងប្អូនប្រជាពលរដ្ឋជាដើម។ ដោយសារការកង្វះអនាម័យនេះហើយ ទើបធ្វើឲ្យយើងមានផលប៉ះពាល់ដល់សុខភាពបងប្អូនយ៉ាងខ្លាំង សំខាន់ចំពោះកុមារៗ ធ្វើឲ្យមានបញ្ហាក្នុងការលូតលាស់របស់កុមារ និងជំងឺក្រិន។ កត្តាទាំងនេះហើយទើបប្រមុខរាជរដ្ឋាភិបាលកម្ពុជា បានលើកកម្ពស់ការងារសុខភាព គឺជាកត្តាសំខាន់ក្នុងការកសាងហេដ្ឋារចនាសម្ព័ន្ធរូបវ័ន្ត ដែលជាមុំមួយដ៏សំខាន់របស់រាជរដ្ឋាភិបាល ព្រមទាំងធ្វើការកែប្រែជីវភាពរស់នៅរបស់ប្រជាពលរដ្ឋនៅតំបន់ជនបទទៀតផង៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
