អំពើជួញដូរមនុស្ស នៅតែជាបទឧក្រិដ្ឋមួយ ក្នុងចំណោមឧក្រិដ្ឋកម្មឆ្លងដែន ដែលប្រទេសនានាបកំពុងតែប្រឈមមុខនាពេលបច្ចុប្បន្ន ហើយអំពើនេះត្រូវបានចាត់ទុកថា ជាទាសភាពសម័យទំនើបដែលមានចរិតស្មុគស្មាញប្រកបដោយល្បិចកលពាក់ព័ន្ធទៅនឹងរបត់នៃផ្នត់គំនិត ចិត្តសាស្រ្តសង្គម ការរីកចម្រើននៃវិទ្យាសាស្រ្ត បច្ចេកទេស ការវិវត្តន៍នៃសេដ្ឋកិច្ច សង្គមនយោបាយជាតិ អន្តរជាតិជាដើម។
ថ្លែងក្នុងកិច្ចប្រជុំបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាម (គ.ខ.ប.ជ) នាថ្ងៃទី១៦ ខែកុម្ភៈ ឆ្នាំ២០២៣នេះ ឯកឧត្តម តោ គឹមស៊ាន សមាជិកក្រុមប្រឹក្សាខេត្ត បានបញ្ជាក់ថា ដោយសារចរិតស្មុគស្មាញនៃបទល្មើសជួញដូរមនុស្សនោះ រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន សែន បានបង្កើនការយកចិត្តទុកដាក់ និងបង្កើតឱ្យមានជាយន្តការជាតិដ៏រឹងមាំមួយ ដើម្បីសម្របសម្រួលប្រមូលផ្តុំគ្រប់កិច្ចខិតខំប្រឹងប្រែងទាំងអស់ ឱ្យមានកិច្ចសហការជាមួយគ្នាកាន់តែជិតស្និទ្ធ ចែករំលែកព័ត៌មាន និងបទពិសោធន៍ជាក់ស្តែង ដើម្បីរួមគ្នារិះរកមធ្យោបាយបំពេញចន្លោះខ្វះខាត និងបង្កើនប្រសិទ្ធភាពឆ្លើយតបឱ្យកាន់តែល្អប្រសើរ។ ឯកឧត្តមបន្តថា គ្រប់ស្ថាប័នរដ្ឋ មិនអាចមានស្ថាប័នណាមួយ អាចអនុវត្តវិធានការប្រយុទ្ធប្រឆាំងអំពើជួញដូរមនុស្ស ឱ្យមានប្រសិទ្ធភាពតែម្នាក់ឯងបានឡើយ បើមិនមានការរួមសហការល្អ ក្នុងការអនុវត្តឱ្យបានព្រមៗគ្នា និងមិនមានយុទ្ធសាស្រ្តទូលំទូលាយឆ្ពោះទៅកាន់គោលដៅរួមគ្នាទេនោះ។ ជនល្មើសមានល្បិចកលប្រើប្រាស់ឧបករណ៍ទំនើប មានវិធីសាស្រ្តបត់បែនគ្រប់សកម្មភាព និងមានទំនាក់ទំនងជាប្រព័ន្ធទាំងតាមវិធីស្របច្បាប់ និងមិនស្របច្បាប់។ បើមិនមានការឯកភាពគ្នាជាធ្លុងមួយក្នុងការកំណត់ទិសដៅ និងវិធានការជាក់លាក់ទេ យើងនៅតែប្រឈមមុខនឹងការបង្ក្រាប និងការដោះស្រាយបញ្ហាជនរងគ្រោះកាន់តែច្រើន ធ្វើឱ្យមានស្ថានភាពច្របូកច្របល់ ហើយបន្តឱ្យមានការខាតបង់ដល់ប្រជាពលរដ្ឋ និងប្រទេសជាតិទៀតផង។
ឯកឧត្តមបន្តថា ឧក្រិដ្ឋជនធ្វើសកម្មភាពបទល្មើសដោយប្រើប្រាស់គ្រប់មធ្យោបាយ និងវិធីសាស្រ្តគ្រប់រូបភាព ក្នុងគោលបំណងទុច្ចរិត ដើម្បីកេងប្រវ័ញ្ចយកផលប្រយោជន៍ពីជនរងគ្រោះ ទោះបីជាមានច្បាប់ដាក់ទោសធ្ងន់ធ្ងរយ៉ាងណាក៏ដោយ ក៏ឧក្រិដ្ឋជនមិនញញើតនឹងធ្វើសកម្មភាពឡើយ ឱ្យតែអាចយកផលចំណេញបាន គេនឹងធ្វើដោយមិនគិតពីការឈឺចាប់ ឬក្តីវិនាសអន្តរាយរបស់មនុស្សណាម្នាក់ឬប្រទេសជាតិណាមួយឡើយ។ ជាក់ស្តែងកន្លងមកមានជនរងគ្រោះ ដោយអំពើជួញដូរមនុស្ស ត្រូវបានរងគ្រោះជាបន្តបន្ទាប់។ ពាក់ព័ន្ធករណីនេះ រាជរដ្ឋាភិបាលបានយកចិត្តទុកដាក់យ៉ាងខ្លាំងទៅលើបញ្ហានេះ ហើយក្រសួងស្ថានប័ន និងអង្គការមិនមែនរដ្ឋាភិបាល និងអន្តរជាតិជាច្រើន ក៏បាននឹងកំពុងតែធ្វើកិច្ចការយ៉ាងសកម្មក្នុងការបង្ការទប់ស្កាត់ ការបង្ក្រាបការជួយជនរងគ្រោះ និងការផ្តន្ទាទោសជនល្មើស។ “យើងមានច្បាប់ និងបទដ្ឋានគតិយុត្តជាច្រើនត្រូវបានជំរុញការអនុវត្ត និងការតាមដានយ៉ាងយកចិត្តទុកដាក់ទាំងនៅថ្នាក់ជាតិ និងថ្នាក់ក្រោមជាតិ ដែរបាននឹងកំពុងបំពេញបន្ថែមនូវភាពខ្វះចន្លោះក្នុងក្របខ័ណ្ឌច្បាប់ និងក្របខ័ណ្ឌនៃការអនុវត្ត ដើម្បីធានាឱ្យបាននូវការឆ្លើយតប ក្នុងការប្រយុទ្ធប្រឆាំងទៅនឹងអំពើជួញដូរមនុស្ស”។ បើទោះបីយើងបានធ្វើការជំរុញផ្សព្វផ្សាយជាសាធារណៈ អប់រំទូន្មាន ដាស់តឿនក្រើនរំលឹកជាប្រចាំយ៉ាងទូលំទូលាយ ដល់ប្រជាពលរដ្ឋគ្រប់ទីកន្លែង បានដឹងបានលឺ ឬធ្លាប់បានទទួលភាពរងគ្រោះរួចហើយក្តី តែហាក់ដូចជានៅមិនទាន់បានយកចិត្តទុកដាក់ ហើយនៅតែមានអ្នកបន្តផ្សងព្រេង និងជឿលើការអូសទាញពីជនខិលខូចជាមេខ្យល់ ជាជាងការដាស់តឿនឱ្យប្រុងប្រយ័ត្នរបស់អាជ្ញាធរនិងអ្នកពាក់ព័ន្ធ។ ដោយឡែក នៅក្នុងបរិបទជំងឺកូវីដ-១៩ កន្លងមក និងបច្ចុប្បន្នបានកើតមាននូវអំពើជួញដូរមនុស្ស ក្នុងរូបភាពការនាំចេញដោយមិនស្របច្បាប់សម្រាប់នាំចេញ ការលាងសម្អាតប្រាក់ ការរំលោភបំពានតាមប្រព័ន្ធអនឡាញជាដើម ដែលជាសកម្មភាពខុសច្បាប់ហើយបានជះឥទិ្ធពលមិនល្អ។
មានប្រសាសន៍ក្នុងឱកាសនោះដែរ លោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាន គ.ខ.ប.ជ ខេត្តសៀមរាប បានឲ្យដឹងថា លេខាធិការដ្ឋាននៃគណៈកម្មាធិការប្រយុទ្ធប្រឆាំងអំពើជួញដូរមនុស្ស បានអនុវត្តសកម្មភាពដោយមានការចូលរួមយ៉ាងសកម្មពីគ្រប់អ្នកពាក់ព័ន្ធទាំងស្ថាប័នរដ្ឋ និងអង្គការសង្គមស៊ីវិល ដែលជាកម្លាំងចលករដ៏សំខាន់ ក្នុងការជំរុញការបង្ការទប់ស្កាត់ លុបបំបាត់អំពើជួញដូរមនុស្ស អំពើធ្វើអាជីវកម្មផ្លូវភេទលើស្រ្តីនិងកុមារ ការកេងប្រវ័ញ្ចកម្លាំងពលកម្ម និងអំពើហិង្សាទាក់ទងនឹងយេនឌ័រ ។ល។ លោកស្រីអភិបាលរងបន្តថា លេខាធិការដ្ឋានបានអនុវត្តផែនការសកម្មទទួលបានលទ្ធផលគួរឱ្យគត់សម្គាល់ ដែលជាក់ស្តែងនៅក្នុងឆ្នាំ២០២២ លេខាធិការដ្ឋានបានរៀបចំ និងអនុវត្តផែនការសកម្មភាពដោយផ្អែកទៅយុទ្ធសាស្រ្តចំនួន៤ នៃផែនការសកម្មភាពជាតិប្រយុទ្ធប្រឆាំងអំពើជួញដូរមនុស្ស ៥ឆ្នាំ(២០១៩-២០២៣) រួមមាន៖ យុទ្ធសាស្រ្តទី១.ពង្រឹងកិច្ចសហប្រតិបតិបត្តិការ ការកសាង និងអនុវត្តច្បាប់គោលនយោបាយ និងបទដ្ឋានគតិយុត្តនានា, យុទ្ធសាស្រ្តទី២.ការលើកកម្ពស់ការបង្ការទប់ស្កាត់ រាល់ទម្រង់នៃអំពើជួញដូរមនុស្ស និងការរំលោភបំពានផ្លូវ ភេទលើកុមារ, យុទ្ធសាស្រ្តទី.ពង្រឹងប្រព័ន្ធយុត្តិធម៌ព្រហ្មទណ្ឌឆ្លើយតបទៅនឹងអំពើជួញដូរមនុស្ស និងអំពើធ្វើអាជីវកម្មផ្លូវភេទ និងយុទ្ធសាស្រ្តទី៤.បង្កើនកិច្ចការពារជនរងគ្រោះ ជាពិសេសស្រ្តី និងកុមារ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
