ផ្លូវក្រាលកៅស៊ូ ប្រភេទ DBST មួយខ្សែ ប្រវែង ២៥គីឡូម៉ែត្រ និងទទឹង ៧ម៉ែត្រ ស្ថិតក្នុងស្រុកក្រឡាញ់ ខេត្តសៀមរាប ត្រូវបានបើកការដ្ឋានជាផ្លូវការ នៅថ្ងៃទី១៨ ខែកុម្ភៈ ឆ្នាំ២០២៣ ក្រោមអធិបតីភាពឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប និងមានការចូលរួមពីឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប មន្ទីរ អង្គភាព ប្រជាពលរដ្ឋ សរុបជាង៨០០នាក់។
តាមការឱ្យដឹងពីលោក សុខ ណារ៉េត អភិបាលស្រុកក្រឡាញ់ ផ្លូវមួយខ្សែនេះ តភ្ជាប់ពីផ្លូវជាតិលេខ៦ ទៅដល់ផ្លូវជាតិលេខ៦៨ ដែលឆ្លងកាត់ឃុំចំនួន៥ រួមមាន ឃុំស្រណាល ឃុំរោងគោ ឃុំឈ្នួល ឃុំក្រូចគរ និងឃុំសែនសុខ។ ផ្លូវមួយខ្សែនេះដែរ ជាអំណោយដ៏ថ្លៃថ្លារបស់ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងអនុវត្តការសាងសង់ ដោយកងវិស្វកម្មសម្ដេចតេជោ ហ៊ុនសែន។
មានប្រសាសន៍ក្នុងពិធីបើកការដ្ឋាននោះ ឯកឧត្តម អ៊ាន ឃុន លើកឡើងថា ដោយសារកត្តាសុខសន្តិភាព ស្ថិរភាព និងការរីកចម្រើនលើគ្រប់វិស័យរបស់កម្ពុជា បានធ្វើឱ្យបណ្តាប្រទេសជាច្រើននៅលើសកលលោក បន្ពពង្រឹង និងពង្រីកចំណងសាមគ្គីភាព មិត្តភាព និងកិច្ចសហប្រតិបត្តិការកាន់តែជិតស្និទ្ឋថែមទៀតជាមួយកម្ពុជា។ ក្រុមប្រឹក្សាខេត្ត បានចាត់ទុកផ្លូវមួយខ្សែនេះ គឺជាសមិទ្ឋផលដ៏មានសារសំខាន់ថ្មីមួយទៀតសម្រាប់ប្រជាពលរដ្ឋក្នុងស្រុកក្រឡាញ់ និងខេត្តសៀមរាបទាំងមូល។
ព័ត៌មានជាតិ ថ្មីៗ
ថ្លែងក្នុងឱកាសនោះដែរ ឯកឧត្តម អ្នកឧកញ៉ា សៀង ណាំ បញ្ជាក់ថា ថវិកាដែលបានផ្ដល់បន្ថែម សម្រាប់ការស្ថាបនាផ្លូវមួយខ្សែនេះ គឺជាការគិតគូរដល់ជីវភាពរបស់ប្រជាជន រស់នៅក្នុងស្រុកក្រឡាញ់ទាំងមូល ដែលវាបានផ្ដល់ភាពងាយស្រួលក្នុងការធ្វើដំណើរ និងដឹកជញ្ជូននូវផលិតផលកសិកម្ម ព្រមទាំងជាផ្លូវដែលមានសារៈសំខាន់ ក្នុងការផ្សាភ្ជាប់រវាងពីមូលដ្ឋានមួយ ទៅមូលដ្ឋានមួយទៀត និងពីតំបន់មួយ ទៅតំបន់មួយទៀត។
ឆ្លៀតក្នុងឱកាសនោះ អ្នកឧកញ៉ា សៀង ណាំ ក៏បានអំពាវនាវដល់ ប្រជាពលរដ្ឋ ដែលគ្រប់អាយុ និងមានសិទ្ធិបោះឆ្នោត សូមអញ្ជើញទៅចូលរួមបោះឆ្នោតជ្រើសរើសតំណាងរាស្ត្រ នីតិកាលទី៧ ដែលនឹងប្រព្រឹត្តនឹងទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះ ដើម្បីជ្រើសរើសប្រមុខដឹកនាំគិតគូរពីសុខទុក្ខប្រជាពលរដ្ឋ និងបន្តការអភិវឌ្ឍ និងការរីកចម្រើនលរុងរឿងលើគ្រប់វិស័យ ប្រកបដោយសុខសន្តិភាព និងស្ថេរភាពសង្គម៕
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
