ដើមឈើជាង៥០០ដើមបន្ថែមទៀត ស្ថិតក្នុងព្រៃសហគមន៍អូរទឹកចេញ ស្ថិតក្នុងឃុំត្រាំសសរ ស្រុកស្រីស្នំ ខេត្តសៀមរាប ត្រូវបានធ្វើការបំបួស នៅថ្ងៃទី១៩ ខែកុម្ភៈ ឆ្នាំ២០២៣នេះ ដោយព្រះសង្ឃ អាជ្ញាធរដែនដី ពុទ្ធបរិស័ទ លោកគ្រូ-អ្នកគ្រូ សិស្សានុសិស្ស ប្រជាពលរដ្ឋ សរុបជាង១.០០០នាក់ ដើម្បីចូលរួមអភិរក្ស និងថែរក្សាព្រៃឈើក្នុងមូលដ្ឋានសម្រាប់ជាប្រយោជន៍ដល់មនុស្សសត្វទូទៅ និងបញ្ឈប់ការកាប់ទន្ទ្រានដីព្រៃតទៅទៀត ។
ព្រះតេជគុណ តេជ ទេពវង្សា ព្រះគ្រូសូត្រនៃវត្តចន្ទរង្សីពង្រ ស្ថិតក្នុងឃុំត្រាំសសរ មានសង្ឃដីកាថា ការបំបួសដើមឈើនេះគឺចង់អោយយល់ពីតម្លៃ និងចេះស្រលាញ់ ថែរក្សា អភិរក្ស ដើមឈើ ឈប់មានការកាប់បំផ្លាញ និងចូលរួមដាំបន្ថែម ដើម្បីអោយព្រៃសហគមន៍មួយនេះមានឈឺចម្រុះគ្រប់ប្រភេទ ព្រោះដើមឈើផ្តល់ផល់ប្រយោជន៍ដល់ មនុស្សសត្វ បរិស្ថាន ជាពិសេសការពារនៅគ្រោះធម្មជាតិ។ ហើយចំពោះការបំបួសដើមឈើធំបែបនេះ ធ្វើជាលើកទីពីរហើយ និងធ្វើការបំបួសទាំងអស់ចំពោះឈើនៅក្នុងព្រៃសហគមន៍មួយនេះ ដោយមួយឆ្នាំធ្វើម្ដង នៅដើមឈឺណាមានប្រយោជន៍និងអាយុវែង កន្លងមកព្រះតេជគុណ ក៏បានដឹកនាំបណ្ដុះកូនឈើ យកមកដាំបន្ថែមផងដែល។
លោក ដោ វីរុទ្ធ នាយសង្កាត់រដ្ឋបាលព្រៃឈើក្រឡាញ់-ស្រីស្នំ បានឲ្យដឹងថា ក្នុងស្រុកស្រីស្នំ មានព្រៃសហគមន៍ចំនួន១១កន្លែង ក្នុងនោះឃុំត្រាំសសរមានចំនួន៤កន្លែង ខណៈព្រៃសហគមន៍អូរទឹកចេញនេះ បានបង្កើតឡើងតាំងពីឆ្នាំ២០០១ លើផ្ទៃដីព្រៃទំហំ ១.០៨០ហិកតា ដែលមានឈើប្រណិតជាច្រើនប្រភេទ ដូចជាក្រញ៉ូង បេង ធ្នុង នាងនួនជាដើម ។
គួររំលឹកថា ក្នុងពិធីបំបួសដើមឈើនេះផងដែលសហគមន៍ព្រៃអូរទឹកចេញ បានទទួលការឧបត្ថម្ភគាំទ្រ ដើម្បីរៀបចំប្រព័ន្ធការពារទប់ស្កាត់ការកាប់ទន្ទ្រាន និងល្បាតក្នុងភូមិសាស្ត្រព្រៃសហគមន៍ ថវិការចំនួន ៧លានរៀល និង អាវសហគមន៍១០ ខោអាវប្រជាការពារ១១ឈុត ពីព្រះសង្ឃ អាជ្ញាធរដែនដី ប្រជាពលរដ្ឋ រដ្ឋបាលព្រៃឈើស្រុក ក្រុមការងារខេត្តចុះជួយឃុំត្រាំសសរ ។
អត្ថបទនិងរូបភាព ៖ លោក ធន់ ពូថេ
