ក្នុងគោលដៅលើកម្ពស់ការកសាងធនធានមនុស្ស អាជ្ញាធរខេត្តសៀមរាប បានជំរុញដល់អាជ្ញាធរមូលដ្ឋានត្រូវខិតខំចូលរួមបន្ថែមទៀតក្នុងការលើកកម្ពស់វិស័យអប់រំ ឈានទៅលុបបំបាត់បញ្ហាប្រឈមដែលនៅសេសសល់។
មានប្រសាសន៍នៅក្នុងពិធីបើកសន្និបាតការងារអប់រំ យុវជន និងកីឡា ឆ្នាំ២០២១-២០២២ និងលើកទិសដៅឆ្នាំ២០២២-២០២៣ របស់មន្ទីរអប់រំ យុវជន និងកីឡា ខេត្តសៀមរាប នាព្រឹកថ្ងៃទី២០ ខែកុម្ភៈ ឆ្នាំ២០២២នេះ អភិបាលរងខេត្តសៀមរាប លោកស្រី ម៉ននី រង្សី បានលើកឡើងថា វិស័យអប់រំពិតជាបានដើរតួនាទីយ៉ាងសំខាន់នៅក្នុងការកសាងធនធានមនុស្ស ហើយប្រទេសជាតិមួយដែលមានធនធានមនុស្សខ្សោយ ប្រទេសនោះមិនអាចរីកចម្រើនបានទេ។ លោកស្រីបន្តថា ដោយមើលឃើញនូវភាពចាំបាច់នេះ រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខ បានយកចិត្តទុកដាក់ខ្លាំងលើវិស័យអប់រំសិក្សាធិការនេះ ។
ប៉ុន្តែបើទោះជាយ៉ាងនេះក្តី លោកស្រីអភិបាលរងខេត្តសៀមរាប ក៏បានលើកឡើងដែរថា បើទោះជារាជរដ្ឋាភិបាល ក្រសួងសាម៉ី អាជ្ញាធរខេត្ត ឬមន្ទីរអប់រំខេត្តយកចិត្តទុកដាក់យ៉ាងណាក៏មិនអាចទៅរួចដែរ ប្រសិនបើមិនមានការចូលរួមពីសំណាក់អាជ្ញាធរមូលដ្ឋាន និងប្រជាពលរដ្ឋ។ ការណ៍នេះ លោកស្រី ម៉ននី រង្សី បានជំរុញឲ្យមានការចូលរួមបន្ថែមទៀតពីគ្រប់ភាគីពាក់ព័ន្ធសំដៅលើកកម្ពស់វិស័យអប់រំ។
បើទោះបីជាមានការចូលរួមជាបន្តបន្ទាប់ពីសំណាក់ភាគីពាក់ព័ន្ធ ប៉ុន្តែបើពិនិត្យជារួមឃើញថា មានកុមារមួយចំនួននៅក្រៅសាលារៀន ទោះបីជាពួកគេដល់វ័យត្រូវសិក្សាក៏ដោយ កុមារ មួយចំនួនចូលរៀនពុំបានជាប់លាប់ ការបោះបង់ការសិក្សា ការរៀនធ្លាក់មធ្យមភាគ អត្រាត្រួតថ្នាក់ និងអត្រាឆ្លងភូមិសិក្សាពុំទាន់បានឆ្លើយតបនឹងសំណូមពរ។ល។ ដែលជាបញ្ហានៅសេសសល់ ទាមទារឱ្យវិស័យអប់រំ និងអ្នកពាក់ព័ន្ធជួយគាំទ្របន្ថែមទៀត ទាំងហេដ្ឋារចនាសម្ព័ន្ធ ការងារគ្រប់គ្រង និងការងារបច្ចេកទេស។
ប្រធានមន្ទីរអប់រំយុវជន និងកីឡា ខេត្តសៀមរាប លោក លី ប៊ុនណា បានឲ្យដឹងថា តាមរយៈការអនុវត្តគោលនយោបាយនៃផែនការយុទ្ធសាស្ត្រវិស័យអប់រំ ដែលធានាឲ្យការអប់រំ មានគុណភាព ប្រកបដោយសមធម៌ និងបរិយាបន្ន និងលើកកម្ពស់ឱកាសិក្សាពេញមួយជីវិតសម្រាប់ទាំងអស់គ្នា ព្រមទាំងធានាភាពស័ក្តិសិទ្ធិនៃភាពជាអ្នកដឹកនាំ និងគ្រប់គ្រង របស់មន្ត្រីអប់រំគ្រប់លំដាប់ថ្នាក់ មន្ទីរអប់រំ យុវជន និងកីឡាខេត្តសៀមរាប បានរិះរកគ្រប់ វិធីសាស្ត្រ គំនិតផ្តួចផ្តើមថ្មីៗ ដើម្បីកសាងនូវលក្ខខណ្ឌចាំបាច់នានា ជំរុញឱ្យវិស័យអប់រំ យុវជន និងកីឡា តម្រង់ឆ្ពោះទៅរកភាពរីកចម្រើន និងជោគជ័យ ព្រមទាំងឆ្លើយតបទៅនឹង គោលដៅអភិវឌ្ឍន៍ប្រកបដោយចីរភាពឆ្នាំ២០១៥-២០៣០។ លោកបន្តថា ជាមួយគ្នានោះ វិស័យអប់រំ យុវជន និងកីឡា ក្នុងខេត្ត ក៏ត្រូវបានពង្រឹង និងពង្រីកជា បន្តបន្ទាប់ពីមួយឆ្នាំទៅមួយឆ្នាំស្ទើរគ្រប់ទីកន្លែង គួបផ្សំជាមួយការផ្តល់សេវាអប់រំ របស់មន្តី្រអប់រំ លោកគ្រូ អ្នកគ្រូ ប្រកបដោយការទទួលខុសត្រូវ បានធ្វើឱ្យប្រជាជនយល់កាន់តែច្បាស់អំពីតម្លៃនៃការអប់រំ៕
អត្ថបទនិងរូបភាព ៖ ជា ស្រស់
