នៅថ្ងៃទី១៩ ខែកុម្ភៈ ឆ្នាំ២០២៣ នៅមជ្ឈមណ្ឌលយុវជនជាតិកម្ពុជា ក្រុងសៀមរាប មានរៀបចំការតាំងពិព័រណ៍សហគ្រិនអ្នកច្នៃប្រឌិតសៀមរាបលើកទី៣ ដែលមាន សហគ្រិនចូលរួមប្រមាណ ៤០ដែលមានដាក់តាំងនូវផលិតផល និងសេវាកម្មក្នុងស្រុកចម្រុះ ជាពិសេសក្នុងខេត្តសៀមរាប។
តាមការដឹងពីលោក មាន លុជ្យ ប្រធានអង្គការលើកកម្ពស់យុវជន បង្ហាញថា ពិព័រណ៍សហគ្រិនអ្នកច្នៃប្រឌិតសៀមរាបលើកទី៣ រៀបចំឡើងក្នុងគោលបំណងសំខាន់ៗ ចំនួន ៣៖ ១/ ផ្ដល់ឱកាស និងលើកទឹកចិត្តបន្ថែមទៀតដល់ សហគ្រិននៅក្នុងខេត្តសៀមរាបក្នុងការដាក់តាំងបង្ហាញនូវផលិតផលឬសេវាកម្ម ដើម្បីទទួលបានការសិក្សាបន្ថែមពីអតិថិជននិងផ្សារភ្ជាប់ទៅទីផ្សារ តាមរយៈព័ត៌មានត្រឡប់ដែលនឹងទទួលបានពីអ្នកចូលរួមក្នុងព្រឹត្តិការណ៍។ ២/ ពង្រឹងសក្ដានុពល និងបង្កើនភាពក្លាហានក៏ដូចជាភាពច្នៃប្រឌិត របស់សហគ្រិនឲ្យកាន់តែប្រសើរឡើង ក្នុងការដាក់តាំងស្នាដៃនិងបង្កើតសមិទ្ធផលចម្រុះដែលជាចលករក្នុងការផ្លាស់ប្រែវិជ្ជមាននៅក្នុងសហគមន៍។ ៣/ ពង្រឹងនិងការបង្កើតបណ្ដាញទំនាក់ទំនងឲ្យកាន់តែប្រសើរឡើងរវាងសហគមន៍សហគ្រិននិងអ្នកវិនិយោគនៅក្នុងខេត្តសៀមរាបក៏ដូចជាត្រៀមខ្លួនសម្រាប់លំហូរវិនិយោគផ្ទាល់ពីបរទេស។
ព័ត៌មានជាតិ ថ្មីៗ
អញ្ជើញជាអធិតីក្នុង ពិធីបើកពិព័រណ៍សហគ្រិនអ្នកច្នៃប្រឌិតសៀមរាបលើកទី៣ លោក សុខ ថុល អភិបាលរងខេត្តសៀមរាប លើកឡើងថា តាមរយៈគណៈកម្មការជំរុញចលនា ភូមិមួយ ផលិតផលមួយ ខេត្តសៀមរាប បានជំរុញដាក់ឱ្យមានការទទួលស្គាល់នូវផលិតផលចំនួន ៧ប្រភេទ និងអង្ករចំនួន ៤១ប្រភេទ។ ដូច្នេះយើងត្រូវបន្តលើកកម្ពស់ និងជំរុញការផលិតរបស់បងប្អូនប្រជាពលរដ្ឋយើងបន្តទៀត។ មួយវិញទៀត កាលពីពេលកន្លងទៅ អង្គការ GIZ បានបង្កើតគម្រោងរៀបចំពាណិជ្ជនាម ដើម្បីលើកកម្ពស់នូវការប្រកួតប្រជែងនូវផលិតផលប្រហាក់ប្រហែល ដែលការសម្គាល់នេះ និងធានាពីគុណភាព និងចៀសវាងការក្លែងបន្លំ។ លោកបន្ថែមថា ជាក់ស្ដែងអាជ្ញាធរខេត្ត តាមរយៈមន្ទីរពាណិជ្ជកម្មខេត្ត យើងបានរៀបចំជាផ្សារចុងសប្ដាហ៍ ដែលមានលក់បន្លែ ផ្លែឈើ និងផលិតផលរបស់សហគមន៍ក្នុងខេត្តជាច្រើនប្រភេទ ហើយបច្ចុប្បន្ន ក៏មានការគាំទ្រជាច្រើន ពីប្រជាពលរដ្ឋក្នុងខេត្ត និងអ្នកទេសចរ។
លោក សុខ ថុល ក៏បានបញ្ជាក់ផងដែរថា ក្រោមការយកចិត្តទុកដាក់របស់ឯកឧត្តម ទៀ សីហា អភិបាលខេត្តសៀមរាប ឯកឧត្តម បានជំរុញដល់បណ្ដាក្រុងស្រុក រៀបចំផ្សារសហគមន៍ ដើម្បីជាកន្លែងតាំងបង្ហាញផលិតផលរបស់ប្រជាពលរដ្ឋនៅតាមមូលដ្ឋាន ក៏ដូចជាទីផ្សារសម្រាប់ពួកគាត់ជាអ្នកផលិត ព្រោះពួកគាត់ពុំទាន់មានលទ្ធភាពក្នុងការរកទីផ្សារបានដោយខ្លួនឯងនៅឡើយទេ។ លោកបន្ថែមថា ក្រៅពីការលើកទឹកចិត្តពីរាជរដ្ឋាភិបាល និងអាជ្ញាធរ អ្នកផលិតខ្លួនឯង ត្រូវខិតខំពង្រឹងសមត្ថភាព និងគុណភាពរបស់ខ្លួន ព្រោះក្នុងសម័យឧស្សាហកម្ម៤.០នេះ យើងនៅមិនមានធនធានគ្រប់គ្រាន់ ដែលអាចប្រកួតប្រជែងជាមួយប្រទេសជិតខាងនោះទេ។
