ពិព័រណ៌មុខជំនាញសិក្សា និងស្នាដៃរបស់និស្សិតចំនួន២៧ស្ដង់ ត្រូវបានរៀបចំឡើងរយៈពេល ៦ថ្ងៃ ចាប់ពីថ្ងៃទី២០ ដល់ថ្ងៃទី២៥ ខែកុម្ភៈ ឆ្នាំ២០២៣ ដើម្បីតម្រង់ទិស ដល់សិស្ស និស្សិត ក្នុងការជ្រើសរើសមុខជំនាញសិក្សារបស់ខ្លួន សម្រាប់យកទៅសិក្សាបន្ត ក្រោយពេលប្រលងបញ្ចប់ថ្នាក់មធ្យមសិក្សាទុតិយភូមិ ឬបាក់ឌុប។
តាមការឱ្យដឹងពី អ្នកស្រី ស សីលាង ប្រធានក្លឹបនិស្សិតស្ម័គ្រចិត្ដ បង្ហាញថា ដើម្បីជាការចូលរួមលើកកម្ពស់ការអប់រំ ឱ្យដល់កម្រិតឧត្ដមសិក្សា ជាពិសេសតម្រង់ទិសដល់សិស្សនិស្សិត ទិវាសាកលវិទ្យាល័យអង្គរ លើកទី២ បានរៀបចំស្ដង់ពិព័រណ៌អប់រំសិក្សាសរុប ២៨មុខជំនាញ ដើម្បីឱ្យពួកគាត់ ស្វែងយល់ និងជ្រើសរើសមុខជំនាញដែលពួកគាត់ពេញចិត្ដសម្រាប់បន្ដការសិក្សានៅមហាវិទ្យាល័យ។
លោក ញ៉ិល រដ្ឋា សាកលវិទ្យាធិការ នៃសាកលវិទ្យាល័យអង្គរ បង្ហាញថា ពិព័រណ៌មុខជំនាញសិក្សា និងស្នាដៃរបស់និស្សិតនៅឆ្នាំនេះ បានបន្ថែមប្រធានបទថ្មីមួយទៀតហៅថា ទាសករនិពន្ឋ ដែលជាប្រធានបទមួយជួយជំរុញលើកទឹកចិត្តដល់អ្នកសិក្សាស្រាវជ្រាវ ឱ្យមានផ្នត់គំនិត កំណត់គោលដៅជីវិតច្បាស់លាស់ ចៀសវាងនូវភាពប្រមាថលើការសិក្សា ឬចុះចាញ់ត្រឹមតែពាក្យសម្ដី ឬឥរិយាបទអវិជ្ជមានរបស់អ្នកដទៃមកលើខ្លួនយើង។ ទិវានេះបានបង្កប់ និងចែករំលែកនូវចំណេះដឹង បទពិសោធន៍ និងជាមេរៀន ដើម្បីជាទុនក្នុងបំណិនជីវិតរបស់ប្អូនៗ សិស្សានុសិស្ស និងសម្រាប់ជាត្រីវិស័យក្នុងការជ្រើសរើសមុខវិជ្ជា ដែលខ្លួនពេញចិត្ត ដើម្បីបន្តការសិក្សានៅឧត្តមសិក្សាផ្សេងៗឱ្យស្របទៅនឹងក្នុងយុគសម័យឌីជីថល។
សូមជម្រាបថា ការតាំងពិព័រណ៌ពីវិស័យអប់រំនេះ បង្កើតឡើងដោយសាកលវិទ្យាល័យអង្គរ និងរៀបចំជាលើកដំបូងនៅឆ្នាំ២០២២ ដែលមានទីតាំងស្ថិតនៅក្នុងបុរីសៀងណាំ ភូមិខ្នារ សង្កាត់ជ្រាវ ក្រុងសៀមរាប។
អត្ថបទនិងរូបភាព ៖ លោក បូ សាវី និងលោក យូ វង្ស
កែសម្រួលដោយ ៖ លោក សេង ផល្លី
