លោកជំទាវ សិន ណម ប្រធាន គណៈកម្មាធិការពិគ្រោះយោបល់កិច្ចការស្ដ្រី និងកុមារ ខេត្តសៀមរាប មានប្រសាសន៍ថាគម្រោង «ក្មេងស្រីដឹកនាំ» ដែលបានផ្ដល់ចំណេះដឹងនិងបង្កើតភាពអង់អាចដល់ក្មេងស្រី ឲ្យពួកគេទទួលបានសិទ្ធិពេញលេញ ក្នុងការទទួលបានការអប់រំ សិទ្ធិសម្រេចចិត្ត អំពីជីវិតរបស់ពួកគេ និងមានឱកាស លើកឡើងអំពីបញ្ហាប្រឈម ដំណោះស្រាយ ដែលតែងតែកើតមានក្នុងសហគមន៍ ដែលនេះពិតជាបានរួមចំណែក ផែនការយុទ្ធសាស្រ្តនារីរតនៈទី៥ ដែលជំរុញ និងលើកកម្ពស់ ជាអ្នកដឹកនាំ សមភាពក្មេងស្រី-ស្ត្រីវ័យក្មេង ឲ្យទទួលបានសិទ្ធិអំណាចពេញលេញ ។
លោកជំទាវ មានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតីក្នុងសិក្ខាសាលាថ្នាក់ខេត្ត ស្ដីពីការបង្ហាញលទ្ធផលសម្រេចបាន របស់គម្រោងក្មេងស្រីដឹកនាំ និងកំណត់ បញ្ហាអទិភាពរបស់ក្មេងស្រី កាលពីថ្ងៃទី២០ ខែកុម្ភៈ ឆ្នាំ២០២៣នេះ ដែលមានអ្នកចូលរួមជាង៥០នាក់ ។លោកជំទាវបន្តថា ទោះជាយ៉ាងនេះក្ដី ក៏នៅមានបញ្ហាជាច្រើនទៀតដែលធ្វើឲ្យក្មេងស្រីបាត់បង់ឱកាស ក្នុងការរៀនសូត្រ និងចូលរួមក្នុងសង្គម រងការរំលោភបំពាន ការរៀបអាពាហ៍ពិពាហ៍វ័យក្មេង ដែលនៅតែជាបញ្ហាប្រឈមសម្រាប់យើងទាំងអស់គ្នា ត្រូវយកចិត្តទុក និងដោះស្រាយជាបន្ត ព្រោះក្មេងស្រីជាធនធានមួយក្នុងការអភិវឌ្ឍន៍សង្គមជាតិទាំងមូល។
ព័ត៌មានជាតិ ថ្មីៗ
លោក ហង់ បូណា តំណាងអង្គការភ្លែនអន្តរជាតិកម្ពុជា បានឲ្យដឹងថា អង្គការភ្លែនអន្តរជាតិកម្ពុជា បានអនុវត្តយុទ្ធសាស្ត្រ រយៈពេល៥ ឆ្នាំចាប់ពីឆ្នាំ២០២១ ដល់ឆ្នាំ២០២៦ ដែលមានកម្មវិធីស្នូល ចំនួន៤ ដូចជា ៖ ១. កម្មវិធីការចាប់ផ្តើមជាមួយសុខភាពល្អ , ២. កម្មវិធីកិច្ចការពារជំនាន់ថ្មី , ៣. កម្មវិធីការរៀនសូត្រមួយជីវិត និង ៤. កម្មវិធីភាពដឹកនាំរបស់ក្មេងស្រី ក្នុងនោះគម្រោងក្មេងស្រីដឹកនាំ បានអនុវត្តលើខេត្តចំនួន៣ មាន ៖ ខេត្តរតនៈគិរី ស្ទឹងត្រែង និងសៀមរាប ។
លោក ហង់ បូណា បន្តថា ក្នុងខេត្តសៀមរាប បានអនុវត្តលើស្រុកអង្គរជុំ អង្គរធំ និងបន្ទាយស្រី ដែលបានបណ្ដុះបណ្ដាលបានជាង២៤០នាក់ ក្នុងគោលបំណងចង់ឃើញ ក្មេងជំទង់ និងយុវជន ជាពិសេសកុមារី និងក្មេងស្រី អាចធ្វើសកម្មភាពរួមគ្នាដើម្បីរួមចំណែកកសាងឲ្យមានសមភាពយេនឌ័រនិងសំឡេងរបស់ពួកគេត្រូវបាន ផ្តល់ តម្លៃក្នុង ការធ្វើសេចក្តីសម្រេចចិត្តនៅគ្រប់កម្រិត និងដោយមានការគាំទ្រពីក្មេងប្រុស បុរសវ័យក្មេង គ្រួសារ សាលារៀន សហគមន៍ និងរដ្ឋាភិបាល ។
បើតាមការលើកឡើងរបស់តំណាងកុមារយុវជន មកពីស្រុកគោលដៅទាំងបីក្នុងខេត្តសៀមរាប បានមានមតិស្រដៀងៗគ្នាថា គម្រោង «ក្មេងស្រីដឹកនាំ»ពិតជាល្អ ព្រោះជួយជំរុញឲ្យក្មេងស្រីមានភាពក្លាហាន ប៉ុន្តែពួកគាត់បានសំណូមពរដល់ដល់គ្រួសារក្មេងស្រី និងអាជ្ញាធរពាក់ព័ន្ធ ជួយដោះស្រាយនៅបញ្ហាប្រឈមនាៗ ដែលនៅមានក្នុងសហគមន៍ និងជួយផ្ដល់ឱកាសក្នុងការរៀនសូត្រ ដើម្បីយកចំណេះដឹងទៅអភិវឌ្ឍសង្គមជាតិទាំងមូល ៕
អត្ថបទនិងរូបភាព ៖ ធន់ ពូថេ
កែសម្រួលដោយ ៖ លោក លីវ សាន្ត
