មន្ដ្រីនៃក្រសួងទេសចរណ៍ បានជំរុញទៅម្ចាស់ទីតាំងបម្រើសេវាទេសចរណ៍នៅក្នុងខេត្តសៀមរាប ត្រៀមខ្លួនឲ្យបានរួចរាល់នូវសេវាកម្មផ្សេងៗ ដើម្បីទទួលភ្ញៀវទេសចរជនជាតិចិន ដែលនឹងសម្រុកមកនៅខែមីនា ខណៈនៅឆ្នាំនេះកម្ពុជារំពឹងថា នឹងទទួលបានភ្ញៀវចិនប្រមាណពី ៨០ម៉ឺន ទៅ១លាននាក់។
ក្នុងពិធីផ្សព្វផ្សាយសៀវភៅស្តីពីត្រៀមទទួលភ្ញៀវទេសចរចិន China Ready កាលពីថ្ងៃទី១៦ ខែកុម្ភៈ ឆ្នាំ២០២៣ ឯកឧត្តម ឈុន មករា អគ្គលេខាធិការរង និងជាប្រធាននាយកដ្ឋានគ្រប់គ្រងទីភ្នាក់ងារដឹកជញ្ជូន និងមគ្គុទេសក៏ទេចរណ៍ បានលើកឡើងថា ម្ចាស់សេវាកម្មទេសចរណ៍ទាំងអស់ ត្រូវពិនិត្យមើលសេវាកម្មរបស់ខ្លួន និងរៀបចំឲ្យស្របទៅនឹងការចង់បានរបស់ភ្ញៀវចិន ដែលមានការសរសេរតម្លៃ ឬមុខទំនិញជាភាសារចិន បន្ថែមពីភាសារខ្មែរ និងអង់គ្លេស។ ទីតាំងនីមួយៗ ត្រូវមានបុគ្គលិកចេះភាសារចិន ព្រោះដោយសារភ្ញៀវចិនភាគច្រើន ពុំសូវប្រើប្រាស់ភាសារអង់គ្លេស ជាពិសេសត្រូវអនុវត្តតាមសៀវភៅស ដែលត្រូវបានផ្សព្វផ្សាយ ហើយកម្ពុជាក៏ជាប្រទេសជាច្រើនទៀត ជាគោលដៅទេសចរណ៍មួយរបស់ភ្ញៀវទេសចរចិនផងដែរ។
ឯកឧត្តម បានបញ្ជាក់ថា បច្ចុប្បន្ននៅខេត្តសៀមរាប មានការខ្វះខាតសម្រាប់ទីតាំងសេវាកម្ម ដើម្បីទទួលភ្ញៀចទេសចរចិន ដែលរួមមានហាងទំនិញ ឬវត្ថុអនុស្សាវរីយ៍ បន្ទាប់ពីពួកគេបានដើរទស្សនាប្រាំងប្រាសាទនាន នៅតំបន់អង្គរ។
ព័ត៌មានជាតិ ថ្មីៗ
គួរបញ្ជាក់ថា ក្នុងដំណើរទស្សនកិច្ចផ្លូវការរបស់សម្ដេតេជោ ហ៊ុន សែន ទៅកាន់ប្រទេសចិន នាពេលថ្មីៗនេះ សម្ដេចតេជោ បានស្នើទៅឯកឧត្តម ស៊ី ជិនពីង ប្រធានាធិបតីចិន ជួយជំរុញបន្ថែមដល់ជនជាតិចិន មកលេងកម្សាន្តឲ្យបានច្រើននៅក្នុងប្រទេសកម្ពុជា ខណៈដែលកម្ពុជាបានត្រៀមលក្ខណៈទទួលរួចរាល់ផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
