ដើម្បីអបអរសាទរខួបលើកទី៦៨ នៃថ្ងៃកំណើតកាកបាទក្រហមកម្ពុជា (១៨ កុម្ភ:១៩៥៥-១៨ កុម្ភ: ២០២៣) ក្រុមអ្នកស្ម័គ្រចិត្តប្រមាណ ១៥០នាក់ បានធ្វើការបោសសម្អាតបរិស្ថាន នៅក្នុងសួនឧទ្យានសហស្សវត្សរ៍កាកបាទក្រហមកម្ពុជាដោយបោសសម្អាតស្លឹកឈើងាប់ ជម្រះស្មៅធ្វើជាផ្លូវការពារភ្លើងឆេះ ដែលអាចរាលដាលដល់ដើមឈើក្នុងឧទ្យានជាយថាហេតុណាមួយ។
យុទ្ធនាការធ្វើការសម្អាតអនាម័យបរិស្ថាន សួនឧទ្យានសហស្សវត្សរ៍កាកបាទក្រហមកម្ពុជា បានធ្វើឡើងនៅថ្ងៃទី១៧ ខែកុម្ភ: ឆ្នាំ២០២៣ ក្រោមវត្តមានរបស់លោកជំទាវ ទាង អេង ទៀ សីហា អនុប្រធានគណ:កម្មាធិការសាខាកាកបាទក្រហមកម្ពុជាខេត្តសៀមរាប និងលោកព្រឹទ្ធាចារ្យ ទួន ទេស ស្ថាបនិកផ្តួចផ្តើមរៀបចំសួនឧទ្យានសហស្សវត្សរ៍កាកបាទក្រហមកម្ពុជា។
លោកជំទាវ ទាង អេង ទៀ សីហា បានលើកថា ដើមឈើមានអត្ថប្រយោជន៍ខ្លាំងដោយបានផ្តល់នូវជីវិតដល់មនុស្ស សត្វ ការទប់ស្កាត់នូវគ្រោះមហន្តរាយគ្រោះធម្មជាតិ ព្រមទាំងផ្តល់នូវបរិស្ថានបរិសុទ្ធក្នុងការរស់នៅរបស់មនុស្សលោក។ លោកជំទាវ ក៏បានធ្វើការអំពាវនាវ ដល់ជនរួមជាតិគ្រប់រូប ត្រូវរួបរួមគ្នា ដើមី្បធ្វើការដាំដុះដើមឈើឡើងវិញ ក្នុងការបង្កើននូវសោភណ្ឌភាព បរិស្ថាន ក៏ដូចជាការទ្រទ្រង់វិស័យទេសចរណ៍ ជាការទាក់ទាញដល់ភ្ញៀវជាតិ និងអន្តរជាតិ ចូលមកកាន់ខេត្តរបស់ខ្លួន។ ម៉្យាងទៀតទៅទូទាំងប្រទេស ក៏ដូចបណ្តាប្រទេសមួយចំនួន នៅមិនទាន់មាននូវឧទ្យានសហស្សវត្សរ៍កាកបាទក្រហមកម្ពុជា ដូចនៅខេត្តសៀមរាបនោះឡើយ។ ដូច្នេះចូរអ្នកដែលប្រព្រឹត្តនូវការកាប់បំផ្លិចបំផ្លាញព្រៃធម្មជាតិ ក៏ត្រូវបញ្ឈប់ទង្វើរបស់ខ្លួន មកចូលរួមការដាំដើមឈើស្តារឡើងវិញ ដើមី្បរក្សាទុកនូវមរតកធម្មជាតិសម្រាប់អ្នកជំនាន់ក្រោយផងដែរ។
លោកជំទាវ បន្តទៀតថា ព្រៃឈើគឺជាទ្រព្យសម្បត្តិធម្មជាតិដ៏មានតម្លៃរួមរបស់ជាតិ និងពិភពលោកយើងផងដែរ មានព្រៃឈើ ពិភពលោកមានសម្រស់ មានជីវិតមនុស្ស សត្វ មានខ្យល់បរិសុទ្ធ មានទឹក រក្សាបាននូវលំនឹងនៃការបម្រែបម្រួលអាកាសធាតុ មានធនធាន និងមានអ្វីៗជាច្រើនទៀត ដែលកន្លងមកក៏ដូចជាពេលបច្ចុប្បន្ននេះ ព្រៃឈើ តែងរងនូវការបំផ្លិចបំផ្លាញយ៉ាងធ្ងន់ ហើយរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំ បានចាត់វិធានការយ៉ាងម៉ឹងម៉ាត់បំផុត នៃបញ្ហាកាប់បំផ្លាញនេះ ព្រមទាំងអំពាវនាវគ្រប់ស្ថាប័នរដ្ឋ ឯកជន និងប្រជាពលរដ្ឋទាំងអស់ចូលរួមការពារសម្បត្តិធម្មជាតិដ៏មានតម្លៃនេះ ហើយបានដាក់ចេញផងដែរនូវផែនការ ទេសចរណ៍ម្នាក់ ដាំដើមឈើមួយដើម គឺដើម្បីស្ដារឡើងវិញនូវធនធានព្រៃឈើដែលបានបាត់បង់។ ដូច្នេះយើងទាំងអស់គ្នាត្រូវបន្តថែរក្សាព្រៃឈើ ដែលមានស្រាប់ និងពុះពារដាំបន្តជាប្រចាំ ដើម្បីការពារបរិស្ថានធម្មជាតិរបស់យើង គឺដើម្បីយើង កូនចៅយើង ប្រទេសជាតិយើង និងពិភពលោកយើង នៅគង់វង្សជានិច្ចនិរន្តរ៍តរៀងទៅ។
សូមបញ្ជាក់ផងដែរថា ឧទ្យានសហស្សវត្សរ៍ កាកបាទក្រហមកម្ពុជា ដែលស្ថិតនៅតាមផ្លូវទៅប្រាសាទអង្គរវត្ត ដែលបានដាំដុះឡើងតាំងពីឆ្នាំ១៩៩៩ មកម្ល៉េះ ក្រោមព្រះវត្តមានដ៏ខ្ពងខ្ពង់សម្តេចព្រះមហាក្សត្រី នរោត្តម មុនីនាថ សីហនុ ព្រះប្រធានកិត្តិយសកាកបាទក្រហមកម្ពុជា ដែលមកដល់ពេលនេះមានអាយុកាល ២៤ឆ្នាំហើយ ត្រូវបានដាំលើផ្ទៃដីទំហំជិត ៥ហិកតា និងមានដើមឈើប្រមាណ ២,៤៦០ដើម៕
អត្ថបទ និងរូបភាព: លោកជា ស្រស់ កែសម្រួលដោយ លីវ សុខុន!!!
