អគារមជ្ឈមណ្ឌលសិក្សាពេញមួយជីវិតមួួយខ្នង ស្ថិតក្នុងភូមិវ៉ារិន ឃុំវ៉ារិន ស្រុកវ៉ារិន ខេត្តសៀមរាប ដែលជាជំនួយរបស់អង្គការសហព័ន្ធជាតិនៃសមាគមយូណេស្កូជប៉ុន (NFUAJ) ក្រោមកិច្ចសហប្រតិបត្តិការរបស់មន្ទីរអប់រំ យុវជន និងកីឡាខេត្តសៀមរាប ត្រូវបានសម្ពោធដាក់ឲ្យប្រើប្រាស់ជាផ្លូវការនៅព្រឹកថ្ងៃទី១៦ ខែកុម្ភៈ ឆ្នាំ២០២៣នេះ ក្រោមអធិបតីភាព លោកស្រី ម៉ននី រង្សី អភិបាលរងខេត្ត រួមនឹងវត្តមានលោកអភិបាលស្រុក លោកប្រធានមន្ទីរអប់រំ អាជ្ញាធរមូលដ្ឋាន ប្រជាពលរដ្ឋ និងសិស្សានុសិស្សជាច្រើនរូប។
ក្នុងនាមម្ចាស់ជំនួយលោក នង វុត្ថា នាយកអង្គការសហព័ន្ធជាតិនៃសមាគមយូណេស្កូជប៉ុនប្រចាំកម្ពុជា បានបញ្ជាក់ថា មជ្ឈមណ្ឌលសិក្សាពេញមួយជីវិតវ៉ារិន ដែលសម្ពោធដាក់ឲ្យប្រើប្រាស់នាពេលនេះ មានបណ្តោយ ១៥ម៉ែត្រ និងទទឹង ៨ម៉ែត្រ មានចំនួន ៣បន្ទប់ ចំណាយថវិកាសរុបចំនួន ១០ម៉ឺនដុល្លា។ ក្រៅពីនេះក្នុងអាគារក៏មានការបំពាក់គ្រឿងសង្ហារឹម បរិក្ខាថាមពលអគ្គីសនី បន្ទប់អនាម័យ អណ្ដូងស្នប់ ម៉ាស៊ីនបន្សុទទឹកសុទ្ធជាដើម។ មជ្ឈមណ្ឌលសិក្សាពេញមួយជីវិត ជាសមិទ្ឋផលថ្មីមួយ ដែលបានចាត់ទុកវាជាកន្លែងសិក្សាដែលស្ថិតជាមួយសហគមន៍ និងជាសង្គមសិក្សាមួយ ដែលស្ថិតនៅក្នុងកម្មវិធីអប់រំក្រៅប្រព័ន្ឋសម្រាប់ប្រជាពលរដ្ឋទូទៅក្នុងការផ្តល់សេវាអប់រំ ការផ្តល់មុខជំនាញវិជ្ជាជីវៈ បំណិនជីវិត និងប្រាក់ចំណូលដល់សហគមន៌។ ដូច្នេះមជ្ឈមណ្ឌលសិក្សាពេញមួយជីវិត គឺនឹងដើរតួនាទីជាអ្នកវិនិយោគទុនដល់គ្រួសារសហគមន៌ និងផ្តល់ឱកាសទទួលបានសេវាអប់រំដែលជាមូលដ្ឋានគ្រឹះ នៃការបង្កើតមុខរបរការងារ និងជួយជំរុញកំណើនសេដ្ឋកិច្ចគ្រួសារក៏ដូចជាសង្គមជាតិ សំដៅកែលម្អគុណភាពរស់នៅរបស់ប្រជាពលរដ្ឋតាមសហគមន៍។
ព័ត៌មានជាតិ ថ្មីៗ
លោក នង វុត្ថា ក៏បានឲ្យដឹងថា អង្គការសហព័ន្ធជាតិនៃសមាគមយូណេស្កូជប៉ុន បានបង្កើត និងអភិវឌ្ឍមជ្ឈមណ្ឌលសិក្សាសហគមន៍ (ម.ស.ស) ក្រោយពីការដាក់ចេញនូវគោលនយោបាលជាតិមកមជ្ឈមណ្ឌលសិក្សាសហគមន៍ ត្រូវបានធ្វើបរិវត្តកម្មទៅជាមជ្ឈមណ្ឌលសិក្សាពេញមួយជីវិត (ម.ស.ជ) ចំនួន ២០កន្លែងកន្លងមកហើយ។ ចាប់តាំងពីឆ្នាំ២០០៦ នៅសហគមន៍ចុងឃ្នៀសជាជំហ៊ានដំបូង សរុបជាទឹកប្រាក់ប្រមាណជិត ៤លានដុល្លា និងបានចូលរួមសង្រ្គោះកុមារបោះបង់ចោលសាលា និងប្រជាជនងាយរងគ្រោះមិនចេះអក្សរ និងក្រីក្រប្រមាណ ២ម៉ឺននាក់។
ក្នុងឱកាសនោះ លោក ស្រី ម៉ននី រង្សី មានប្រសាសន៍ថា មជ្ឈមណ្ឌលសិក្សាពេញមួយជីវិត ពិតជាមធ្យោបាយដ៏ល្អប្រសើរ និងមានប្រសិទ្ធភាពបំផុត ក្នុងការបង្កើនចំណេះដឹងពហុវិស័យ ដើម្បីពង្រីកនិងពង្រឹងសមត្ថភាពប្រជាជន ក្នុងការទទួលយកព័ត៌មានចំណេះដឹង និងជំនាញសម្រាប់លើកស្ទួយជីវភាពរស់នៅប្រចាំថ្ងៃ។ ម្យ៉ាងវិញទៀតជាកន្លែងដែលផ្តល់ឱកាសឱ្យយើងអាចរៀនសូត្រពេញមួយជីវិត ជាកន្លែងដែលយើងចែករំលែកបទពិសោធន៍ឱ្យគ្នាទៅវិញទៅមក និងជាកន្លែងដែលយើងអាចផ្ទេរចំណេះដឹងជាកេរ្តិ៍មរតកវប្បធម៌ពីដូនតាដល់កូនចៅជំនាន់ក្រោយជាបន្តបន្ទាប់កុំឱ្យបាត់បង់សាបសូន្យ។ កម្ពុជាក្រោមការដឹកនាំដ៏ឈ្លាសវៃ របស់សម្ដេចតេជោ ហ៊ុន សែន បានធ្វើឱ្យប្រទេសជាតិមានសន្ទុះរីកចម្រើនជឿនលឿនលើគ្រប់វិស័យ។ ក្នុងនោះវិស័យសិក្សាធិការអប់រំ គឺជាវិស័យអាទិភាពមួយដែលបាននឹងកំពុងជម្រុញពង្រីក ហើយមានភាពឈានឡើងទាំងបរិមាណ និងគុណភាពឥតឈប់ឈរគួរជាទីមោទនៈ ព្រោះរាជរដ្ឋាភិបាល ពិសេសក្រសួងអប់រំយល់ថា ការអភិវឌ្ឍធនធានមនុស្ស គឺជាការងារមួយដ៏ចាំបាច់បំផុតដែលមិនអាចខ្វះបាន ដើម្បីរួមចំណែកអភិវឌ្ឍប្រទេសជាតិ ស្របតាម កាលៈទេសៈនៃការរីកចំរើនទាំងផ្នែកវិទ្យាសាស្រ្ត និងបច្ចេកវិទ្យាទំនើប។ ការកសាងធនធានមនុស្សទាមទារនូវសេវាអប់រំ ប្រកបដោយគុណភាព ដើម្បីធានាបាននូវធនធានមនុស្សដែលមានសមត្ថភាពពេញលេញ។ ការអប់រំបានដើរតួនាទីយ៉ាងសំខាន់ ក្នុងការអភិវឌ្ឍធនធានមនុស្ស និងជាឆ្អឹងខ្នងនៃការអភិវឌ្ឍសេដ្ឋកិច្ចជាតិ។ ការអប់រំតាមគ្រប់រូបភាពទាំងក្នុងប្រព័ន្ធ ក្រៅប្រព័ន្ធ និងមិនផ្លូវការ ជាមធ្យោបាយសក្តិសិទ្ធិក្នុងការធានាឱ្យការសិក្សាមានគុណភាពប្រកបដោយសមធម៌ បរិយាបន្ន និងការលើកកម្ពស់ឱកាសសិក្សាពេញមួយជីវិតសម្រាប់ទាំងអស់គ្នា។
លោក ធិននី វិធូ អភិបាលស្រុកវ៉ារិន បានសម្តែងនូវការកោតសរសើរ និងអរគុណចំពោះកិច្ចសហប្រតិបត្តិការរបស់ក្រសួងអប់រំ យុវជន និងកីទ្បា ក៏ដូចជាមន្ទីរអប់រំខេត្តសៀមរាប និងដៃគូអភិវឌ្ឍន៍នានា ជាពិសេសអង្គការសហព័ន្ធជាតិនៃសមាគមយូណេស្កូជប៉ុន ដែលតែងតែជួយផ្តល់ការគាំទ្រដ៏ធំធេង ប្រកបដោយកាយវិការសប្បុរសធម៌ក្នុងការរួមចំណែកធ្វើឱ្យសំរេចគោលដៅអប់រំនៃព្រះរាជាណាចក្រកម្ពុជា។ លោកថា មជ្ឈមណ្ឌលសិក្សាពេញមួយជីវិត ពិតជាមានសារៈសំខាន់ណាស់ នឹងជួយដល់ប្រជាពលរដ្ឋ និងសិស្សានុសិស្សក្នុងឃុំវ៉ារិន។ ក្រោយពីទទួលបាននូវមជ្ឈមណ្ឌលនៅទីនេះ វានឹងជាឱកាសបង្កើននូវសកម្មភាពអប់រំ ឲ្យពលរដ្ឋ និងសិស្សានុសិស្ស ចេះអានចេះសរសេរ ចេះគិតលេខបានត្រឹមត្រូវ និងទទួលបានបន្ថែមទៀត នូវចំណេះដឹងផ្នែកវិជ្ជាជីវៈជាហូរហែ ដែលអាចជួយឱ្យពួកយើងបង្កើតមុខរបរប្រាក់ចំណូលសម្រាប់ផ្គត់ផ្គង់គ្រួសារបានគ្រប់គ្រាន់ ព្រមទាំងធ្វើឱ្យសហគមន៍យើងមានការរីកចម្រើនទៀតផង៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
