មន្ទីរការងារ និងបណ្តុះបណ្តាលវិជ្ជាជីវៈ ខេត្តសៀមរាប នៅថ្ងៃទី១៥ ខែកុម្ភៈ ឆ្នាំ២០២៣ បានបើកយុទ្ធនាការណ៏ផ្សព្វផ្សាយច្បាប់ ស្តីពីការទប់ស្កាត់ពលកម្មកុមារក្នុងវិស័យសិប្បកម្មផលិតឥដ្ឋ និងវិស័យកសិឧស្សាហកម្ម (ចំការដំឡូងមី) នៅក្នុងស្រុកចំនួន៣ នៃខេត្តសៀមរាប គឺស្រុកអង្គរធំ បន្ទាយស្រី និងក្រឡាញ់ ដែលមានរយៈពេល ២ថ្ងៃ គឺពីថ្ងៃទី១៤-១៥ ខែកុម្ភៈ ឆ្នាំ២០២៣ ដែលពិធីនេះធ្វើឡើងក្នុងបរិវេនសាលាបឋមសិក្សាកំពង់ថ្កូវ ឃុំកំពង់ថ្កូវ ស្រុកក្រឡាញ់ ខេត្តសៀមរាប។
បើតាមលោកស្រី ប៊ុន ច្រិប អនុប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត បានបញ្ជាក់ថា ក្នុងឆ្នាំ២០២២កន្លងទៅ មន្ទីរការងារ និងបណ្តុះបណ្តាលវិជ្ជាជីវៈខេត្ត បានធ្វើបទអន្តរាគមន៍ ស្តីអីពីវឌ្ឍនភាពសង្ខេប និងបញ្ហាប្រឈមនានា ស្តីពីការទប់ស្កាត់ពលកម្មកុមារក្នុងវិស័យសិប្បកម្មផលិតឥដ្ឋ និងវិស័យកសិឧស្សាហកម្មក្នុងខេត្តជាបន្តបន្ទាប់។ ជាលទ្ធផលក្រុមអធិការកិច្ចរបស់មន្ទីរ បានដកហូតទប់ស្កាត់ពលកម្មកុមារក្មុងវិស័យផលិតឥដ្ឋ និងកសិកម្ម បានចំនួន ១០០នាក់ ស្រី ៥៨នាក់ ក្នុងនោះ៖ ទប់ស្កាត់ ៩០នាក់ ស្រី៥០នាក់, ដកហូត ១០នាក់ ស្រី ៨នាក់។
លោក សុខ ណារ៉េត អភិបាលស្រុកក្រឡាញ់ មានប្រសាសន៍ថា រាជរដ្ឋាភិបាលកម្ពុជានីតិកាលទី៦ នៃរដ្ឋសភា ដែលមានសម្តេចតេជោ ជាប្រមុខដឹកនាំដ៏ឆ្នើម នឹងបន្តពុះពារជំនះការលំបាកឧបសគ្គនានា ដឹកនាំជោគវាសនាកម្ពុជា ដើម្បីឈានទៅសម្រេចបាននូវសមិទ្ធផលបន្ថែមទៀត ក្នុងកិច្ចអភិវឌ្ឍសេដ្ឋកិច្ចសង្គម សំដៅកាត់បន្ថយភាពក្រីក្ររបស់ប្រជាពលរដ្ឋ តាមរយៈការជម្រុញឲ្យមានស្ថិរភាព កំណើនសេដ្ឋកិច្ចជាតិ ការពង្រឹងសន្តិភាព ស្ថិរភាពនយោបាយ និងបង្កើតកិច្ចសហប្រតិបត្តិការអន្តរជាតិ ជាមួយបណ្តាប្រទេសនានានៅក្នុងសកលលោក។ ក្នុងបរិបទនេះ រដ្ឋបាលស្រុកក្រឡាញ់ ក៏ដូចជារដ្ឋបាលខេត្តសៀមរាប ក្រោមការដឹកនាំរបស់រាជរដ្ឋាភិបាល ក៏ដូចជាក្រសួងមហាផ្ទៃ និងក្រសួង-ស្ថាប័ននានា នឹងបន្តជម្រុញឲ្យមានការអភិវឌ្ឍបន្ថែមទៀត នូវកម្រិតជីវភាពរបស់ប្រជាពលរដ្ឋ តាមរយៈការពង្រឹងការអនុវត្តជាប្រចាំនូវគោលនយោបាយភូមិឃុំមានសុវត្ថិភាព ធានានូវសន្តិសុខទាំងតាមទីជនបទក៏ដូចជាទីប្រជុំជន សំដៅបង្កលក្ខណៈងាយស្រួល ជូនបងប្អូនប្រជាពលរដ្ឋប្រកបមុខរបរ ទទួលទានដោយសុខសុវត្ថិភាព និងធ្វើការវិនិយោគលើគ្រប់វិស័យ រួមចំណែកឈានទៅសម្រេចបាននូវគោលដៅអភិវឌ្ឍប្រកបដោយចីរភាព។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះដែរ លោកជំទាវ ប៉ុក ករុណា អគ្គលេខាធិការស្តីទី នៃអគ្គលេខាធិការគណៈកម្មាធិការជាតិប្រឆាំងពលកម្មកុមារ និងជាប្រធាននាយកដ្ឋានការងារកុមារស្តីទី មានប្រសាសន៏ថា កន្លងមកបើទោះបីជាក្រុមការងាររបស់ក្រសួងការងារ និងមន្ទីរបានខិតខំប្រឹងប្រែងបំពេញកិច្ចការយ៉ាងណាក្តី ក៏នៅតែមានការប្រឈមមួយចំនួន ចំពោះនិយោជក និងអាណាព្យាបាលដែលបម្រើការងារនៅក្នុងវិស័យសិប្បកម្មផលិតឥដ្ឋ និងវិស័យកសិឧស្សាហកម្មនៅតែមានការប្រើប្រាស់ពលកម្មកុមារ។ ដូច្នេះមានតែយើងទាំងអស់គ្នាទាំងអជ្ញាធរមូលដ្ឋាន និងម្ចាស់ក្នុងវិស័យសិប្បកម្មឡឥដ្ឋ វិស័យកសិកម្ម វិស័យឧស្សាហកម្ម ព្រមទាំងអាណាព្យាបាលសិស្ស គឺត្រូវចូលរួមអនុវត្ត និងទប់ស្កាត់ការប្រើប្រាស់ពលកម្មកុមារជាចាំបាច់។
លោកជំទាវ បន្តទៀតថា ក្រសួងការងារ និងបណ្តុះបណ្តាលវិជ្ជាជីវៈ និងមន្ទីការងារខេត្ត ដែលតែងតែគិតគួរដល់កុមារងាយរងគ្រោះនោះ គម្រោងដកហូត និងទប់ស្កាត់ពលកម្មកុមារសម្រាប់ឆ្នំា២០២២ ក្នុងវិស័យសិប្បកម្មផលិតឥដ្ឋ និងវិស័យកសិឧហ្សាកម្ម នៅក្នុងនោះក៏មានការឧបត្ថម្ភពីក្រសួងការងារមានសម្ភារៈសិក្សា រួមមាន៖ កង់ សំលៀកបំពាក់ កាបូបសិក្សា សៀវភៅ ប៊ិច ខ្មៅដៃ ដល់កុមារដែលបានដកហូត និងទប់ស្កាត់ពលកម្មកុមារតាមឡឥដ្ឋ និងចំការដំឡូងមីផងដែរ។ ជាក់ស្តែងនៅថ្ងៃនេះ ក្រុមការងារក្រសួង និងមន្ទីរ បានរៀបចំចែកជូនកង់ និងសម្ភារៈសិក្សាដល់សិស្សានុសិស្សចំនួន ៩០នាក់ ស្រី៥០នាក់ នៅសាលាឋមសិក្សាខ្ទីង និងបឋមសិក្សាជប់ប្រសាទ ក្នុងស្រុកអង្គរធំ បឋមសិក្សាកណ្តឹងក្នុងស្រុកបន្ទាយស្រី ព្រមទាំងសាលាបឋមសិក្សាកំពង់ថ្កូវ ស្រុកក្នុងក្រឡាញ់ ខេត្តសៀមរាបផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
