នាថ្ងៃទី១៣ ខែកុម្ភ: ឆ្នាំ២០២៣ រដ្ឋបាលខេត្តសៀមរាប សហការជាមួយសហភាពសហព័ន្ធយុវជនកម្ពុជាខេត្ត បានរៀបចំកិច្ចប្រជុំ ស្តីពីព្រឹត្តិការណ៍អង្គរសង្ក្រាន្ត ឆ្នាំ២០២៣ ដោយមានការអញ្ជើញជាអធិបតីភាព ពីលោកស្រី ម៉ននី រង្សី អភិបាលរង តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប និងមានការចូលរួមពីអភិបាលក្រុង ស្រុក កងកម្លាំងប្រដាប់អាវុធទាំងបីប្រភេទ មន្ទីរអង្គភាព និងបណ្ដាលអង្គភាពឯកជន ជុំវិញខេត្ត ។
លោកស្រី ម៉ននី រង្សី អភិបាលរងខេត្ត បានមានប្រសាសថា ព្រឹត្តិការណ៍អង្គរសង្ក្រាន្តឆ្នាំ២០២៣ នេះជាខួបគម្រប់ ១០ឆ្នាំ នៃព្រឹត្តិការណ៍អង្គរសង្ក្រាន្ត ក្រោមប្រធានបទ « ក្ដីស្រមៃ និងក្ដីសង្ឃឹម » ដែលមានព្រឹត្តិការណ៍សំខាន់ៗ ក្នុងនោះមាន ការប្រកួតរាំម៉ាឌីហ្សុនបំបែកឯកត្តកម្មពិភពលោក និងBeyond The Games ឬបត់បេះដូងក្រដាស់ បំបែកឯកត្តកម្មពិភពលោក ។
ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ជាមហាគ្រួសារខ្មែរតែមួយ និងលើកស្ទួយកិត្យានុភាពជាតិលើឆាកអន្តរជាតិ ផ្តល់ឱកាសដល់យុវជន ប្រជាពលរដ្ឋ ភ្ញៀវទេសចរជាតិ និងអន្តរជាតិ បានសិក្សាអំពីកិត្តិនាម ភាពចម្រុះនៃវប្បធម៌ អរិយធម៌ ប្រពៃណី សាសនា និងអបអរសាទរកម្ពុជាធ្វើម្ចាស់ផ្ទះ ព្រឺត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ផងដែរ។
លោកស្រី ម៉ននី រង្សី បានមានប្រសាសបន្តទៀតថា ការបំបែកឯកត្តកម្មពិភពលោក ទាំងពីរនេះ ត្រូវការការចូលរួមពីយុវជន ប្រជាពលរដ្ឋ យើងទាំងអស់គ្នា ដើម្បីសម្រេចបានក្នុងការបំបែកឯកត្តកម្មពិភពលោកនេះ ។ ពាក្យសុំចុះឈ្មោះចូលរួម ក្នុងការបំបែកឯកត្តកម្មពិភពលោក ក្រុមការងារសហភាពសហព័ន្ធយុវជនកម្ពុជាខេត្ត ចុះផ្ដល់ជូនពាក្យ និងផ្សព្វផ្សាយ តាមបណ្ដាសាលាគោលដៅ ឬអង្គភាពឯកជន ចង់ចូលរួមក្នុងព្រឹត្តិការណ៍នេះ អាចទំនាក់ទំនងទៅក្រុមការងារសហភាពសហព័ន្ធយុវជនកម្ពុជាខេត្តដោយផ្ទាល់បាន។ ជាមួយនេះ សូមក្រុមការងារ និងអ្នកពាក់ព័ន្ធ ជាពិសេសយុវជន យុវនារី ព្រមទាំងប្រជាពលរដ្ឋ ចូលរួមផ្សព្វផ្សាយឲ្យបានទូលំទូលាយ ដើម្បីឲ្យកិច្ចការនេះដំណើរការបានទៅដោយជោគជ័យ ៕
រូបភាព និងអត្ថបទ: លោកហាំ ម៉េងហួត កែសម្រួលដោយ លីវ សុខុន!!!
