នាព្រឹកថ្ងៃទី១០ ខែកុម្ភៈ ឆ្នាំ២០២៣ នៅក្នុងបរិវេណវត្តអម្ពរវ័ន្តស្វាយដង្គំ ហៅវត្តថ្មី ឃុំពួក ស្រុកពួក ខេត្តសៀមរាប មានរៀបចំវេទិកាសាធារណៈមួយ ដើម្បីត្រួតពិនិត្យ និងគាំទ្រការអនុវត្ត កម្មវិធីគោលនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា ក្រោមអធិបតីភាពលោកជំទាវ សេង វណ្ណសាយ រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការងារថ្នាក់ជាតិចុះមូលដ្ឋានស្រុកពួក ដោយមានការចូលរួមពីតំណាងមន្ទីរអង្គភាពជុំវិញខេត្ត ក្រុមការងារចុះជួយមូលដ្ឋានស្រុកពួក អាជ្ញាធរមូលដ្ឋាន និងប្រជាពលរដ្ឋមកពីឃុំពួក ឃុំល្វា និងឃុំដូនកែវ ជាច្រើននាក់។
មានប្រសាសន៏ក្នុងឱកាសនោះ លោកជំទាវ សេង វណ្ណសាយ បានបញ្ជាក់ថា វេទិកានាពេលនេះ ធ្វើឡើងក្នុងគោលបំណងចង់ឱ្យប្រជាពលរដ្ឋបានចូលរួមបញ្ចេញមតិយោបល់ជុំវិញបញ្ហាប្រឈម និងតម្រូវការចាំបាច់ដើម្បីឱ្យក្រុមការងារធ្វើការដោះស្រាយឲ្យបានសមស្របតាមស្ថានភាពជាក់ស្ដែង ព្រមទាំងជម្រាបជូនអំពីបញ្ហាប្រឈម និងដំណោះស្រាយក្នុងអង្គវេទិកានាពេលនេះ គឺដើម្បីជួយដោះស្រាយនូវទុក្ខកង្វល់របស់ប្រជាពលរដ្ឋនៅមូលដ្ឋាន ទាក់ទងលើបញ្ហាសណ្ដាប់ធ្នាប់សាធារណៈ អំពើហិង្សាក្នុងគ្រួសារ កសិកម្ម ការបង្កបង្កើនផលស្រូវ ការគ្រប់គ្រងធនធានទឹក ធារាសាស្រ្ត ការចិញ្ចឹមសត្វ ពាណិជ្ជកម្ម ការបម្រើសេវាសាធារណៈ សេវាសុខាភិបាល សិក្សាអប់រំ និងសាសនា។ ជាមួយនោះក៏សូមឲ្យប្រជាពលរដ្ឋសួរសំណួរឲ្យចំបញ្ហា ដែលក្រុមការងារស្រុកបានរៀបចំគឺ ហេដ្ឋារចនាសម្ព័ន្ធជាដើម។
សូមជម្រាបថា សម្រាប់វេទិកានាពេលនេះដែរ ក្រុមការងារបានទទួលនូវសំណួរ-សំណូមពរផ្ទាល់មាត់ចំនួន២១ សំណួរ និងសំណូមពរ ដ៏ល្អៗទាក់ទងនឹងបញ្ហាហេដ្ឋារចនាសម្ព័ន្ធ បរិស្ថាន និងធារាសាស្ត្រជាដើម ក្នុងនោះសមាជិកក្រុមការងារពាក់ព័ន្ធក៏បានឆ្លើយតប និងបំភ្លឺបានមួយចំនួនផងដែរ។
មានប្រសាសន៍បិទអង្គវេទិកា លោកជំទាវ សេង វណ្ណសាយ បានបញ្ជាក់ថា ទាក់ទងនឹងបញ្ហាផ្លូវពីខាងកើតស្ថានីយ៍ថ្លឹងរថយន្តទៅស្រែប្រាំង គឺអាជ្ញាធរនឹងស្នើសុំដល់ជំនាញខេត្តចុះពិនិត្យ និងសិក្សាគម្រោង។ ចំពោះបញ្ហាសំរាម និងបញ្ហាឆក់ត្រីនៅក្នុងឃុំល្វា សូមឱ្យអាជ្ញាធរក្នុងមូលដ្ឋានណែនាំដល់ប្រជាពលរដ្ឋឡើងវិញ។ ហើយទាក់ទងនឹងសំណើសុំផ្លូវប្រវែង ២,៥០០ម៉ែត្រ ស្ថិតនៅភូមិព្រះអង្គទ្រង់ ឃុំល្វា គឺសូមឱ្យអាជ្ញាធរឃុំ ដាក់សំណើមកកាន់រដ្ឋបាលស្រុក រីឯសំណើសុំធ្វើផ្លូវនៅក្នុងភូមិជ្រាស់ ឃុំល្វា គឺជាគម្រោងរបស់មន្ទីរអភិវឌ្ឍន៍ជនបទខេត្ត។ ដោយឡែកបញ្ហាបើកផ្លូវចាស់របស់ប្រជាជននៅក្នុងភូមិគោកចាស់ ឃុំសសរស្តម្ភ គឺសូមឱ្យអាជ្ញាធរឃុំ និងស្រុកចុះពិនិត្យ និងដោះស្រាយ។ ចំណែកឯបញ្ហាសំរាមដែលខាងភាស៊ីផ្សារយកទៅចោល សូមឱ្យអាជ្ញាធរធ្វើការសម្របសម្រួលឡើងវិញ។ ចំពោះបញ្ហាផ្លូវនៅភូមិព្រះអង្គទ្រង់ សូមឱ្យអាជ្ញាធរពិនិត្យមើលលទ្ធភាពឡើងវិញ និងចំពោះការស្នើសុំបើកមុខទឹកសូមឱ្យជំនាញចុះពិនិត្យទីតាំងជាក់ស្តែង៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
