ក្នុងដំណើរទស្សនកិច្ចនៅសារមន្ទីរសន្តិភាពសកម្មភាពកំចាត់មីន នៅខេត្តសៀមរាប នារសៀលថ្ងៃទី៩ ខែកុម្ភៈ ឆ្នាំ២០២៣នេះ ឯកឧត្តម វេណូ អាត់សុស៊ី (Ueno Atsushi) អគ្គរាជទូតជប៉ុនប្រចាំកម្ពុជា បានស្វែងយល់ពីការងារបោសសំអាតមីននៅកម្ពុជា និងពិនិត្យមើលគម្រោងសាងសង់អគារសារមន្ទីរសន្តិភាពសកម្មភាពកំចាត់មីន ដែលនឹងចំណាយថវិកាប្រមាណ២,៤៥៤លានយេន ឬប្រហាក់ប្រហែលនឹង ១៨លានដុល្លារអាមេរិក ជាជំនួយរបស់ប្រទេសជប៉ុន។
ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃមជ្ឈមណ្ឌលសកម្មភាពមីនកម្ពុជា បង្ហាញឱ្យដឹងថា អគារនេះមានទំហំ ៥២ម៉ែត្របួនជ្រុង ដែលធ្វើឡើងមានរាងដូចជាគ្រាប់មីន និងមានតែមួយគត់នៅលើកពិភពលោក។ គោលបំណងនៃការបង្កើតអគារសារមន្ទីរសន្តិភាពសកម្មភាពកំចាត់មីននេះ គឺដើម្បីរក្សាទុកជាឃ្លាំងព័ត៌មាន ឯកសារ និងវត្ថុតាំងជាក់ស្តែង ដើម្បីឱ្យយុវជនជំនាន់ក្រោយៗបានសិក្សា ស្វែងយល់ពីផលលំបាកនៃសង្គ្រាម និងក្រោយសង្គ្រាម។
ឯកឧត្តមបានបន្តថា សារមន្ទីរនេះ ជាសារមន្ទីរស៊ីវិលដែលបង្ហាញពីប្រជាពលរដ្ឋ ដែលបានទទួលរងគ្រោះថ្នាក់ដោយសារសង្គ្រាម និងប្រជាពលរដ្ឋដែលរស់នៅក្រោយសង្គមថា តើពួកគាត់បានជួបនូវរឿងអ្វីខ្លះ? ពិបាក ឈឺចាប់បែបណា និងរងការគំរាមគំហែងបែបណាដោយសារគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះ។ ហើយសកម្មភាពទាំងនេះមានអត្តន័យយ៉ាងធំធេង នឹងបញ្ជាក់ឱ្យឃើញពីតម្លៃនៃសន្តិភាព ជាពិសេសនោះ គឺអាចឱ្យយុវជនជំនាន់ក្រោយបានយល់កាន់តែច្បាស់អំពីតម្លៃនៃសន្តិភាព ដែលត្រូវថែរក្សាឱ្យគង់វង្ស។
ព័ត៌មានជាតិ ថ្មីៗ
ឯកឧត្តម ក៏បានបង្ហាញដែរថា នៅក្នុងសារមន្ទីរនេះ នឹងមានដាក់តាំងអំពីព្រឹត្តិការណ៍ជាច្រើនដូចជា ប្រទេសកម្ពុជាមុនពេលមានសង្គ្រាម បន្ទាប់មកបង្ហាញពីសមរភូមិក្នុងសង្គ្រាម បន្ទាប់មកទៀតបង្ហាញពីសំណល់ជាតិផ្ទុះក្រោយសង្គ្រាម និងបង្ហាញពីកាកសំណល់ផ្សេងៗ ដែលយើងដោះបានរួមទាំងអាវុធធុនស្រាលដែលបង្កឱ្យមានគ្រោះថ្នាក់ រួមជាមួយរឿងរ៉ាវជាច្រើនទៀត។ហើយជាចុងក្រោយ គឺបង្ហាញពីសន្តិភាពនៅកម្ពុជា ដែលមានតែការសប្បាយរីករាយ ដើម្បីឱ្យយុវជនយើងចងចាំ និងថែរក្សាសន្តិភាពនៅកម្ពុជាយើងនេះឱ្យបានជារាងរហូត៕
អត្ថបទ និងរូបភាព៖ លោក សាវី និងលោក ឃុត សៅ
កែសម្រួល៖ លោក សេង ផល្លី
